المساعد الشخصي الرقمي

مشاهدة النسخة كاملة : قصيدة عيد الاذاعه

ابو نون
27-Dec-2008, 01:47 AM
بسم الله الرحمن الرحيم اللهم صل على محمد وعلى آله وصحبه أجمعين
هذه القصيده كتبت فى عيد الاذاعه السابق وقدمت للمدير العام للهئيه القوميه للاذاعه السودانيه
وتم قراءة اجزاء منها فى اذاعة البيت السودانى
وهى تحكى تاريخ ومسيرة الاذاعه منذ نشاتها وحتى الان ومراحل التطور البرامجى والتقنى والرؤيه والاهداف


عيد الاذاعه
1عيد الاذاعه
1
فى دعه ووداعه فى رقه وبراعه
اكتب فى تجرد قدر الاستطاعه
عن امهر صناعه فى عيد الاذاعه
اكتب عن جمال عن عظمة رجال
عن قوه وتفانى عن حلم وامال
كيف المايكروفون تحول لى اذاعه
من البوسته كانت مايكروفونها واحد
فى نص ساعه زانت ليها العصر شاهد
مستر فنش داوسون لاستعمارنا بوق
ودعايه للحلفاء كان ترويج وسوق
لمتولى عيد تكريم وتعظيم
محمود الفكى وبيت فى السوق قديم
تجانى وفهمى وخاطر وتاج حمد
لى ابوعاقله يوسف لى ود البلد
طه وود العبيد والعمرابى كانو
مع عبد الواحد وصالحين قط ما هانو
التجانى الطيب ومحمود ابو العزائم
ومحمد سليمان اصحاب العزائم
صالح محمد صالح والخاتم الفاضل
صلاح الدين الفاضل وعوض جادين المناضل
معتصم وصل واحيى العمل
تاريخ النضال لمعتصم فضل
عن قيم الفضيله من اسمى المعانى
اخبار العوالم عن احلى الامانى
اخبار الرياضه ورشاد القياده
عن وحدة بلدنا وفاقها واتحادها
عن حلم السلام ومعانى السياده
عن عز البلاد فى قوة اراده
الخير والشمائل وطرق الرياده
الناس والحياه وفترات الظهيره
مسارات الاماسى وعن كل المراسى
محطات السلام مراحيل الرواسى
ابو نون
27-Dec-2008, 01:49 AM
بسم الله الرحمن الرحيم اللهم صل على محمد وعلى آله وصحبه أجمعين

من خارج الاستيديو ومعنى الانشراح
اجمل الاغانى للحب والسلام
برامج المنوعات عن احلى الكلام
عن فنان وشاعر وكلام الخواطر
عن نبض الدواخل وبروق الفواطر
عن فن الحقيبه عن قصة مدينه
عن لحظات رتيبه عن احلام دفينه
رساله بتحكى قصه عن واجب وحصه
عن اطيار تغرد لمن تلقى فرصه
عن ناجح دراما للوجدان مغازله
عن كوميديا جاده وتراجيديا هازله
عن اسس الحياه وطرائق المعيشه
عن خدمة بلادنا عن شعبها وجيشها
ما يطلبه الجنود والمستمعون كتير
عن خرطة برامج كل يوم فى تغيير
نفحات الصباح ورمضان كريم
مائدة الصيام تلحين وترنيم
مراعاة الفروق بين الاقاليم
اوقات الصلاه تاخير وتقديم
لاذاعات كثيره بعد المايكروفون
تخصص فى البرامج وحراك للسكون
من قران كريم من اول مذيع
عبيد عبد النور وبرنامج بديع
من اذاعة جوبا لى وحده وطنيه
اصبح ليها صوت الامه السودانيه
من الاسطوانه لشريط مغناطيسى
برناماج فرنسى وبرنامج انجليزى
من الصومال بدت ايات امتنان
امدر لمقديشو ومقديشو لامدرمان
بت وراق وسهير وقطر الهم يشيل
محطات التلاقى ولحظات الرحيل
الموسيقى حالمه الحان وانغام
ساحات الحروب والحان السلام
ابو نون
27-Dec-2008, 06:13 AM
بسم الله الرحمن الرحيم اللهم صل على محمد وعلى آله وصحبه أجمعين
النور موسى قدم موسيقى عربيه
ومدائح الرسول وسياحه روحيه
بشير عباس وبرعى وعلى مكى وجابر
فتاح الله جابو والفاتح الطاهر
علاء الدين حمزه والفاتح وشاكر
العاقب محمد عربى واحمد زاهر
اسمع ادهميه وشوف قطر الشمال
من نيل الحياه تعال نرويك زلال
الالحان شجيه ابراهيم وعجاج
لاقصى البلاد لابعد فجاج
الماحى سليمان وبدر التهامى
على ميرغنى واميقو ليهم سلامى
عبد الملك ابراهيم الموسيقى العصامى
ودعبدالمعين ومقام الزنجراب
لى ام قرقدى انواع واضراب
لى احمد بريش وود العبيد
ابوديه والضى انغام وترديد
احمد المبارك وخميس ود مقدم
عبد الماجد خليفه الديمه متقدم
الطيب خليفه والناسخ كنانه
جبريل والعبيد العزفو الحانا
ودجبريل حموده صلاح ود سعيد
لكل المراتب تعظيم وتمجيد
الكاشف كرومه وعثمان الشفيع
سرور احمد الطيب ابراهيم البديع
ابوعركى البخيت وعثمان ود حسين
ابو نون
27-Dec-2008, 06:14 AM
بسم الله الرحمن الرحيم اللهم صل على محمد وعلى آله وصحبه أجمعين
جابرى ووردى غنو مع ود الامين
عبد الرحمن عبدالله وعزيز المبارك
اونسه واسماعيل وبدركات المبارك
خوجلى وحمد وعلى ود البلد
خلف الله حمد غنا ماليهو حد
عبد القادر سالم وابراهيم عوض
خضر وحسن عطيه اسلوب انفرض
زيدان ابراهيم انغام وتطريب
عبيد عبد الرحمن وعبد المنعم حسيب
لى سيد خليفه ولى كابلى الاديب
محجوب عثمان مصطفى وصلاح الاريب
محمد ميرغنى وصلاح محمد عيسى
صلاح ود الباديه وابراهيم ود موسى
ابوداؤود عبدالرحمن ذو النكته الظريفه
احمد المصطفى والكوكبه اللطيفه
عائشه الفلاتيه والصوت الجميل
منى وفاطمه الحاج والايقاع تقيل
من شعراء وكتاب وما الانذكر
لالوم لاعتاب التاريخ ذكر
تصدير مذيعين للخارج وجب
ايوب ود الكبير لى صوت العرب
عزيزي المستمع برامج نص خفيفه
الحان وانغام ونوادر ظريفه
من كل الغرائب وعجائب الدنيا
معلومات مهمه من كلمات وغنيه
اهداف كم كتيره ورؤيا محدده
ابو نون
27-Dec-2008, 06:15 AM
بسم الله الرحمن الرحيم اللهم صل على محمد وعلى آله وصحبه أجمعين
5برامج منوعه دوام متجدده
توريك البراعه وجمال الصناعه
رقتها والوداعه فى دار الاذاعه
الاف التحايا لى جيل العطاء
رواد الاذاعه بالحب والوفاء
علمت المواطن كل معنى جميل
معنى الانتماء والخلق النبيل
تطوير الوسائل واحياء العقول
منافسة الاذاعات بالفعل والقول
جذب المستمع متابعه والتزام
تجديد البرامج وتحديث النظام
اسمى رساله توصل لى كل العوالم
من دار الاذاعه للواعى والحالم
ربطت البلاد جنوبها بشمالها
شرقها غربها لى نيلها ورمالها
ابرزت القضايا وحلت كم مشاكل
لسان حال المواطن فى كل الفواصل
ليك منى التحيه ياروح البلاد
مزيد من التقدم بى كل اعتداد
مزيد من النماء بعد الاجتهاد
لنجوم الاذاعه وبرامج مذاعه
لى جندى مجهول يعمل فى براعه
لفنى ومهندس لى مهرة صناعه
الاف التحايا ودعوات فى ضراعه
انصاف لى حقوقهم فى امانه ووداعه
اسجل فى تواضع لى دار الاذاعه
اكتب عن رساله توقظ للمشاعر
عن قيمه ومعنى عن فنان وشاعر
عن بذل وعطاء وتفانى وفناء
فى لمسة وفاء بى شكر وثناء
عن عامل صغير وادارى كبير
اكتب عن ممثل وملحن قدير
كل عمل مميز من عبر الاثير
خطوبة سهير ودكان ود البصير
عن شاعر تفرد او كاتب تمرد
على اسلوب قديم اوغير وجدد
فى اثواب قشيبه او كلمات نجيبه
بدل للمعانى وانماطها الرتيبه
او موسيقى ابرز لى الحان جميله
تنساب فى توافق ازهار فى خميله
ابو نون
27-Dec-2008, 06:16 AM
بسم الله الرحمن الرحيم اللهم صل على محمد وعلى آله وصحبه أجمعين
او شاعر يصور لمعانى الفضيله
والخير والكرامه واعمالنا النبيله
او مذيع يقدم فى قوه وجزاله
او مذيعه ترسم صوره نشوف جمالها
اصوات جد قويه فى الفاظ رصينه
نابعه من القرى او داخل المدينه
او ادارى ناجح يعمل فى تفانى
ناكر ذاتو ابدا لافتور لاتوانى
صابح يومو شاهد ساهر ليلو ساهد
يخرج للروائع فى نظم المشاهد
سهره جميله ترسم لوحه من الجمال
تبرز لى تراثنا تعبر عن اجيال
عن رؤيه فنيه وتعالج قضيه
عن احلام فتيه امال سرمديه
تأرخ لى بلادنا ولفنونها الشعبيه
للعز والاصاله بالكلمه القويه
وتنقل مننا جمال الفنون
وتنقلنا للعالم عبر المايكروفون
وتربطنا بالشارع بى كل البلاد
تمزج للثقافات بى جد واجتهاد
مسجله فى المصاف فى قمة مناره
فى نقلة حصاره وفنون الاداره
فى قوه وجساره واثار العماره
تنقل للفنون وتبث الحضاره
بى جوده وتميز دوام سائره فى مسارها
اعلام فى بنودها فوق لراسها نارها
افخرى يا بلدنا بمهاره وبراعه
لو مافيك حاجه تكفيك الاذاعه
فلنهتف ونهتف فلتحيا الاذاعه
الهادى احمد محمد دفع الله
بانوراما عيد الاذاعه
12
\6
\2007
ابواحمد
27-Dec-2008, 05:31 PM
ولك التحيه اخي الفاضل لما تتحفنا به من الروائع....
ابو نون
27-Dec-2008, 07:23 PM
بسم الله الرحمن الرحيم اللهم صل على محمد وعلى آله وصحبه أجمعين شكرا لمرورك على موضوعي وهذا شرف لي ووسام على صدري
الكردفاني
27-Dec-2008, 08:34 PM
لك التحية أستاذنا الهادي علي هذه الكلمات التوثيقة لذلك الصرح الشامخ (هنا أمدرمان) فهي منارة من منارات الوطن الحبيب... مزيدا من الإبداع يا أبوالنون يارائع.
مع الود
ابو نون
29-Dec-2008, 01:08 AM
بسم الله الرحمن الرحيم اللهم صل على محمد وعلى آله وصحبه أجمعين
تشكرات على المرور والتعليق اخى عماد
عاشقه امدرمان
29-Dec-2008, 06:29 AM
ياسلااام عليك يابونون
خليييك قريب
لاننا في انتظار المزيد
مامون مهنا
30-Dec-2008, 11:07 AM
هى ليست مجرد قصيدة بل هى سفر تاريخى يحكى لنا عن هنا ام درمان يديك العافية الرقيق الشفيف ابونون ,,,,,,,,
ابو نون
30-Dec-2008, 09:45 PM
بسم الله الرحمن الرحيم اللهم صل على محمد وعلى آله وصحبه أجمعين
كلماتك الرقيقه المجامله تحلق بى فى سموات الزهو والفخر بارك الله فيك
ورفع درجاتك كما رفعت من روحى