قصائد في حب السودان

[alaadin2003]

عازة
خليل فرح

****


عازة في هواك عازا نحن الجبال
وللبخوض صفاك عازا نحن النبال
عازة ما بنوم الليل محــــال
وبحسب النجوم فوق الرحال
خلقة الزاد كمل وأنا حالي حال
متين أعود أشوف ظبياتنا الكحال
عازة ما سليت وطن الجمــال
ولا أبتغيت بديل غير الكمــال
***
وقلبي لي سواك ما شفتو مال
خذيني باليمين وانا راقد شمال
عازة ما نسيت جنــة بلال
وملعب الشباب تحت الظلال
ونحن كالزهور فوق التلال
نتشابي للنجوم وانا ضافر الهلال
عازة جسمي صار زي الخلال
وحظي في الركاب صابه الكلال
وقلبي لسه ما عرف الملال
أظنه ود قبيل وكريم الخلال
عازة ما أشتهيت نوم الحجال
ولا السوار بكي في يمينا جال
وعازة في الفريق لي ضيق مجال
قبيلة بت قبيل ملأ الكون رجال
***
عازة شفت كيف نهض العيال
جددوا القديم تركوا الخيال
روحك أم سماح سري كالسيال
شجوا الفؤاد حيوا محسور الليال
عازة في الفؤاد سحرك حلال
ونار هواك شفا وتيهك دلال
ودمعي في هواك حلو كالزلال
تزيدى كل يوم عظمة ازداد جلال
***
عازة في حذا الخرطوم قبال
وعازة من جنان شمبات حبال
وعازة لي ربوع ام در جبال
وعازة في الفؤاد دوا يشفي الوبال

[alaadin2003]

وطـــــــــن

عمر الطيب الدوش

****

حأسأل عن بلد رايح
وافتِّش عن بلد سايح
واسأل عن امانينا
الِّي ما بتدِّينا
صوت صايِح
وأسأل وين مخابينا
إذا جانا الزمن
لا فِح
واسأل عن بلد مجروح
وعارف الجارحو ليه جارِح
وابكى على بلد ممدوح
وعارف المادحو
ما مادِح
واحْلم بي حلم مسروق
لا هو الليَلهْ
لا امْبارِح
أعلِّق في جناح سَفَري
خطابات لي زمن فجْري
وادْخُل من درِب سرِّي
لِكُلِّ مضاجع الأحزان
واضفِّر من شجر بلد
بروقاً مارْقَهْ من صدري
حأسأل عن بلد غاطٍ
لحدِّ الليلهْ في الوجْعَهْ
أَنُط فوق سرْجي واتْحزَّم
أقوم من وقْعَةْ
لي وقعًهْ
أخُتْ ايدي البتوجِعْني
على السأم البِراجِعْني
واسأل..
يا وطن يا بيتنا
ليه شوقك مواجِهْني
ليه حُبّك مُجهْجِهني
وليه تاريخ زمن خسران
موكّر لسَّه في شجني؟
حأكْتب لي شجر مقطوع
مسادير
يمْكِن يتْحرك
خطابات لي طِفِل مجْدوع
يقُوم
يجرى
يَقَع
يبْرُك
رسالَهْ لكلِّ قُم
رسالَهْ لكلِّ قُمْريّه
إذا دم الشقا اتوزّع
على كل البيوت
ما تْرِك
واسأل
عن وطن رايِح
وادّيكم خبر جارح:
بأنّو جميع جُموع الناس
حيفْضَلوا لا كُراع
لا راس
ونشترى في الدكاكين يوم
مسابِح من دموع الناس
مساحيق من هموم الناس
زَهَج
يتْعَبّا في الأكياس
ونعْلن في المزاد علناً
وترْغي الجوقَهْ والأجراس:
"!نبيع الطِفلَهْ والكرّاس"
واصْرَخ
! ياوطن! يا بيتنا
ليه ما تبقى لينا الساس
قَدُر
قَدُر ما تجري فيك
أفكار
يزيدوا الحَبْس والحُرّاس
قَدُر ما تجري فيكْ الخيل
تَدُوس الهيبَهْ
والإحساس
واسأل
يا وطن رايح
اذا كل القبور دَخَلت
بيوت الناس
بلا اسئذان
بلا صلوات
بلا أكفان
جريمَهْ اسائل الدّفَان؟
حريمَهْ طَلَب تَمَن قبري
من البايع في أيِّ مكان؟
واقولكَ يا وطن
رايح
واقولك يا وطن
آمر
سلام النّفْسِ ما كافر
ولا كافر
ولا كافر


ضلمــــــــــت

أقـــول

والشمْسِ في عِزّ الامل

تُهْتَ ومشيتْ

أقول يا نحن يا انتو و

بكيتْ

يا مواعيد

يا صباح من غير وسِم

تُهْتَ ومشيت

ما ضَلّمَتْ

ما بْتَعْرِف الزول البِجِيك

ولا البِجيكَ

بيعْرِفَك

حتى الشبابيك

والزوايا الكان بِتَجْمَع

في حنايا الشكوك

ضلّمتْ

أغْشاكِ يا نفسي الغريبَهْ

من همومي اطلِّعِك

القاكِ واقْفَهْ على الطريق

أحزان بِتفْرح

وتشْتبِك

أفراح بِتحْزَن

وترْتَبِك

لمّنْ رحلتَ مع الغُنا

عِز الأماني و

ضلّمـــــت

مَدّيتْ على الأمل القريب

أشواق كتيرَه و

قَصّرَتْ

في زاويهْ من ضُل الشجون

جابتْ ظُنونا و

قيّلَتْ

كلّمتَ أشجار الخريف

عن شوق نَمَا

في الوحشَهْ والزمن الأسيف

دلّتني اْفتِّش

في المغارِب

والمشارِق

عَن علامات

أو رصيف

ترقُد الأزهار عليهو

يا بنفسج

كُحْلي غالي

وبُتقالي

امشوا انتو

أنا البقِيف

ما ضلّمَـــتْ

[alaadin2003]

في الفؤاد ترعاه العناية




في الفؤاد ترعاه العناية



بين ضلوعي الوطن العزيز



لي عداه بسوي النكاية



وان هزمت بلملم قواي



غير سلامتك ما لي غاية



إن شاء الله تسلم وطني العزيز



ليه ما ارعي الوطن الرعاني



والدهاه اشيله واعاني



الشباب والشيب شجعاني



قالوا نفدي الوطن العزيز



بقاسمه حظه سواده وبياضه



وايه مرادي انا غير مراده



ارعي نيله اشجع بلاده



يشيلوا حمل الوطن العزيز



عندي وطني بقضيلي حاجة



كيف اسيبه واروح لي خواجه



يغني وطني ويحيجني حاجة



لي عدوك ياوطني العزيز



طبيعي اعشق صيده ورماله



وما ببيعه واقول مالي ماله



وما بكون آلة البي حباله



داير يكتف وطني العزيز



علمونا اهل الحضارة



كيف اضوق شان وطني المرارة



والمحن برضاي اصلي ناره



خوفي تحرق وطني العزيز



شفنا فيه جواب فيافي



والبطير وبسابق السوافي



ما مراده عفارم عوافي



بس يعظم وطني العزيز



نحن للقومية النبيلة



ما بندور عصبية القبيلة



تربي فينا ضغائن وبيلة



تزيد مصايب الوطن العزيز

[alaadin2003]

وطنا البإسمك كتبنا ورطنا

أحبك ..

أحبك مكانك صميم الفؤاد

وباسمك اغنى..
تغنى السواقى
خيوط الطواقى
سلام التلاقى
ودموع الفراق

واحبك ملاذ
وناسك عزاز
أحبك حقيقه..
وأحبك مجاز

وأحبك بتضحك
وأحبك عبوس
بعزة جبالك ترك الشموس
وما بين ظلالك
افتش وأكوس

أفتش طفولتى وملامح صباى
بناتك عيونن صفاهن سماى
وهيبة رجالك بتسند قفاى

أحبك بتضحك
واحبك عبوس
صحى بتملا عينى..
وتشّرف غناى

بحضرة جلالك..
يطيب الجلوس
مهذب أمامك يكون الكلام
لأنك محنك
عميق الدروس
مجيد المهابة
مديد القوام
شبابك تشابك
شديد الزحام
أراهم وراهم غبار الحياه
مداين تعاين
كأمّ العروس
تهلل تكلل جبين الإمام
رزازاً يبلل أغانى الخليل

أصدق كلامك حقيقه وبخاف
أخاف الطريق اللى ما بودى ليك
وأعاف الصديق اللى ما بهم بيك
معاك انتظارى ولو بالكفاف
وعنك بعيداً أبيت الرحيل
وبيك اعتزاز الصباح الجميل
جميع الأغانى اتكالن عليك
جميع الأغانى اتكالن عليك

[alaadin2003]

أنا سوداني أنا


كل اجزائه لنا وطن اذ نباهي به نفتتن
نتغنى بحسنه ابدا دونه لا يروقنا حسن
حيث كنا حدت بنا ذكر ملؤها الشوق كلنا فداه
نتملى جماله لنرى هل لترفيه عيشه ثمن
خير هذي الدماء نبذلها كالفدائي حين يمتحن
بسخاء بجرأة بقوى لا يني جهدها ولا تهن
تستهين الخطوب عن جلد تلك تنهال وهي تتزن



أيها الناس نحن من نفر عمروا الارض حيث ما قطنوا
يذكر المجد كلما ذكروا وهو يعتز حين يقترن
حكموا العدل في الورى زمنا اترى هل يعود ذا الزمن
ردد الدهر حسن سيرتهم ما بها حطة ولا درن
نزحوا لا ليظلموا احدا لا ولا لااضطهاد من امنوا
وكثيرون في صدورهم تتنزى الاحقاد والاحن
دوحة العرب اصلها كرم والى العرب تنسب الفطن
ايقظ الدهر بينهم فتنا ولكم افنت الورى الفتن



يا بلاددددددددددددددددى يا بلاددددددددى


يا بلادا حوت ماثرنا كالفراديس فيضها منن
فجر النيل في اباطحها يكفل العيش وهي تحتضن
رقصت تلكم الرياض له وتثنت غصونها اللدن
وتغنى هزارها فرحا كعشوق حدا به الشجن
حفل الشيب والشباب معا وبتقديسه القمين عنوا
نحن بالروح للسودان فدا فلتدم انت ايها الوطن


فلتدم أنت أيها الوطن


انا سودانى أنا

[مامون مهنا]

تسلم ياجميل على الروائع ,,,,,,,,

[alaadin2003]

لحظة من وسني
للشاعر / محمد الفيتوري




لو لحظة من وسني
تغسل عني حزني
تحملني
ترجعني
الى عيون وطني
يا وطني ..
يا وطني يا وطن الأحرار والصراع
الشمس في السماء كالشراع
تعانق الحقول والمراعي
واوجه العمال والزراع
يا وطني ..
أصبح الصبح كأن الزمن الماضي على الماء نقوش
فارفعي راية اكتوبر فالثورة مازالت تعيش
وانا مازلت في البعد انادي
يا بلادي
يا مغاني وطني ..
أجمل من فراشة مجنحة على ضفاف المقرن الجميل
أجمل من نوّارة مفتحة ترقد تحت ذهب الأصيل
أجمل من رائحة النضال لم أشم رائحة في صبحك الجليل
يا فخر هذا الجيل
يا وطني ..

[ابو نون]

بسم الله الرحمن الرحيم اللهم صل على محمد وعلى آله وصحبه أجمعين
ما اروعك وما اروع ما جلبت بوركت وكفيت وجزيت خيرا

[عزام السودانى]

كلمات معبره جدا جدا


تسلم جدا حبيبنا


ودمتم

[هاشم الرزقابى]

هناء أم درمان


هنا اُم درمان أنا أم درمان شموخ أمجاد وعِز إنسان


بطولات خلدا ألتاريخ بتحكي ملاحم الفرسان


أريج أفراح عِطر فواح بلابل تشدو ذي كروان


في أم درمان





ما صدقنا يا أم درمان يظهر في سماك شيطان


وفيك يطل شبح مخلوق دخيل وجبان


يروع ناسك الآمنين ويزهق فيك روح إنسان


راكع كان، ساجد كان، عابد كان


تغوص أعماقُه يتهجد يسبح ذاكر الرحمن


ويسمو عن كلام الناس يرتل آية من القرآن


يتوب لي ربة ُ يستغفر يردد طالب الغفران


وماصد قنا ياأم درمان


يحوم في حِماك سفاح دخيل وجبان


يغير بسمتك أحزان


يقوض فيك كل جميل ويخرس فيك صوت فنان


ونغم ألحان وطيف أشجان وعود وكمان


وتضيع البسمة من شفتيك ويغطي نسايمك الدخان


وتصبح ذي بقايا مكان وأطلال من وراء النسيان


عصور تاريخ بتحكي زمان عن الفرسان وأم درمان


لبصمات خلفتها رموز وعز سلطان وفي شيكان


وعند الطابية في أم درمان خليط للفرحة والأحزان


ويا أم درمان أشوف فيك عِزة الأوطان


وأفاخر بيك وكل إنسان من السودان


أشوف في عيونك الناعسات قوارب أمان


وأشوفك ذي عقد منظوم من المرجان


أغازل فيك نهر الريد وأشوف في شخصك الِحبان


و أسائل في ألأصيل نسمات عن أم درمان


وهناء أم درمان؟


وصوتك في مرافئ الغربة لما يطل هنا أم درمان


تزيد أشواقي فيك تحنان وتتجمد مشاعري كمان


أبث أشجاني في كتمان وأقول ماأصلي بيك ولهان


أصلي أنا عاشقك الغائب وليه زمان وبيك هيمان


بكرة يعود لام درمان


وتتبدل مخاوفو أمان


ويعودوا ولادك الغائبين عن الأوطان


تحضنيهم تضميهم وتسألي وينهم الأخوان


وين أدروب،وين إسحاق ،وين ملوال مع عثمان


تايهين في مجاهل الغربة يهدوا ليك قطوف ريحان


وباقات حب وشوق وحنان لام درمان

[هاشم الرزقابى]

وكان وكان وياما كان وكان في بلد إسمو السودان
فيه تزواج الابنوس مع النخلة وفيه تعايش السكان
فيه اسامه في نمولي وفيه ماجوك في ام درمان
تقدل ميري في الخرطوم وتفرح فاطمة في ملكان
لكن القدر فرق بقينا اعداء بدل اخـــــوان
انا زنجي وأبوي عربي وامي السُمرة في ألألوان

[ريحانة الأمل]

أسمح لي ان أقف لك ولقلمك أحترام

لروعة ما نثرت هنا


تقبل مروري هنا

فمان الله

ومبروووك عليكم العودة ..:emo: