مكتبة كلمات أغاني الراحل مصطفى سيد أحمد..

[manda]

أغنيات وشعراء الأستاذ / الراحل المقيم مصطفي سيد أحمد..

1. طوبى للرجال العصافير - فيصل محمد صالح

2. لمحتك - عبد القادر الكتيابي

3. الطيور - حافظ عباس

4. يا مطر - محمد الحسن سالم حميد

5. يا ضلنا - يحي فضل الله

6. يا جمة حشا المغبون - حميد

7. عرق الجباه الشم - حميد

8. البت الحديقة - خطاب حسن احمد

9. طيبة - حميد

10. عم عبد الرحيم - حميد

11. زمن حظر التجول - الفرجوني

12. عجاج البحر - حسن بيومي

13. المسافة - صلاح حاج سعيد

14. قالوا مرحلة - المقبول سيد احمد المقبول

15. في عينيك عشم باكر - ؟

16. ضليت - قاسم ابو زيد

17. اسئلة - يحي فضل الله

18. غناء العزلة - الصادق الرضي

19. سمحة وسمرية - القدال

20. هردت لهاتي بالغنوات - حميد

21. معتوقة ومعتقة ومنعتقة - عاطف خيري

22. على بابك - الكتيابي

23. غربة ومطر - عبد العال السيد

24. علمي عيوني السفر - مدني النخلي

25. حاجة فيك - هاشم صديق

26. وضاحة - ازهري محمد علي

27. مشرع الحلم الفسيح - ازهري محمد علي

28. لما اتلامس بيني وبينك - انا إنسانك - ازهري محمد علي

29. اقتراح - عاطف خيري

30. شهيق/ عاطف خيري

31. الممشى العريض - العميـــــــري

32. الملام - هلاوي

33. سلمات عليك يا بوي انت السما وقمرو

34. وجيدة - قريب الله محمد عبد القادر

35. نفسي قولك من زمان - صلاح حاج سعيد

36. نفسي في داخلك اعاين د. بشرى الفاضل

37. سحابات الهموم - الدوش

38. يا خطوتك - يحي فضل الله

39. اديني احساس بالامل - مدني النخلي

40. مريم الاخرى - شمو

41. ابيت الكلام المغتغت وفاضي وخمج - القدال

42. لا بالحزن الفينا بنرضى - تاج السر الطيب

43. واقف براك - النخلي

44. الزمن الفلاني - نجاة عثمان

45. من جديد جيت تاني تكسر - النخلي

46. استلاب - يحي فضل الله

47. خليني اقراك مرة صاح - عاطف خيري

48. زهرة الصبار - مظفر النواب

49. يا جرح عزة هوانا - قاسم ابو زيد

50. عباد الشمس - قاسم ابو زيد

51. املنا الباقي يسرح بي أهاجر لي زمن تاني - ............

52. بت العرب النوبية - حميد

53. عينيك وطن - صلاح حاج سعيد

54. مسافر - قاسم ابو زيد

55. أظنك عرفتي - جمال حسن سعيد

56. نشوة ريد - قاسم ابو زيد

57. بقول غنوات - القدال

58. قلت ليها - صلاح حاج سعيد

59. ايها المصلوب كالنجم - ............

60. ليه غبتي يا قمرا - قاسم ابو زيد

61. طوريتك في الطين مرمية - عدة شعراء

62. يا جراحك - د. طلال

63. عد فات - صلاح حاج سعيد

64. اليابسة - عاطف خيري

65. والله ايام يا زمان - ............

66. المزار - عبد العال السيد

67. في عيونك - ابوزر الغفاري

68. الرحيل في الليل - عبد الرحيم ابو زكرى

69. عشقت ابتسامتك - ............

70. تحرمني منك - مصطفى

71. يا بت يا نيل - مصطفى سيد احمد

72. طالما ف بحرك في مي - حميد

73. قمر الزمان - صلاح حاج سعيد

74. شوك الشوق للشوف يا خي - حميد

75. شيخ تلب - القدال

76. مساماتك - يحي فضل الله

77. جلبت ليك من بلاد الله البعيدة - خطاب حسن احمد

78. حبالنا الجوة ما تخنت - يحى فضل الله

79. إدفقي - قاسم ابو زيد

80. القاكي وين - قاسم ابو زيد

81. رجعلك قليبي المهضلم - القدال

82. جمعنا قدر - ............

83. زمنا بروح وزمنا بجي - ............

84. باكر ضواي - حميد

85. معاك كنت - مدني النخلي

86. رعشة الشوق - محجوب الحاج

87. كيف أنساك - محمد مريخا

88. مت في قلبي - د. عبد القيوم ومصطفى سيد احمد

89. يا سر مكتوم - ............

90. أخوان الإنسانية - محمد المهدي عبد الوهاب

91. قولي الكلمة - قاسم ابو زيد

92. صابرين - القدال

93. الحزن النبيل - صلاح حاج سعيد

94. إذا عادت بنا الأيام - عوض مالك

95. ماني غرقان في التمني - محمد المهدي عبد الوهاب

96. بلابل الدوح - ............

97. حتى الفصول صابا الجفاف - عدة شعراء

98. ولمانديلا اغني - ............

99. ما بان عليك سفر العمر - ............

100. باكر ضواي - حميد

ــــــــــــــــــــــــــــــــــــــــــــــــــ ــــــــــــ

دي أغلب أغاني الراحل المقيم / مصطفى سيد أحمد..

* (............) ودي يعني لسع ما لقيت شاعرها.. وفتشوا معاي..

[manda]

علميني الاحتمال
كلمات / يحي فضل اللة وقاسم أبو زيد

علمينى الإحتمال
وكيف أجاوب عن هواك
لما يغلبنى السؤال
لما يتأرجح منانا
بين مظنة وإحتمال
ما بحسِّـك دونك .. إنتى
ما الحقايق .. ما الظلال
والحرِف بِعرِفْ مداهو
حتى لو جفّ الخيال
علمينى الإحتمال
ونحنا كيف نقدر نقاوم
فى بلد ملّ الحِوار
صرخة بتموت فى المزارع
زيف مشتّت فى الشوارع
بين مداينّـا الكُتار
علمينى الإحتمال
ونحن كيف نقدر نقاوم
هجمة الزمن التتار
وكيف نحصِّل ومضة الأمل
البيشرِد كل مرة
وفى إنتظارى
إنتى والشوق فى المجرّة
برق خفّق من خدودك
ورعد يفتح لى حروفك
وغيث يخدر فى سهولك
علمينى الأحتمال
ونحن كيف نقدر نجمّع
لى ملامح الليل
بنوصل من مدار
علمينى الإحتمال
وكيف قواى تقدر تقاوم
فى بلد ملّيت صِفوفة
ولاّ أمشى على المزالِق
فى بلد نقرت دِفوفة
ولاّ أشيلِك وإحتِمالِك
إمّا أدّيك فى إحتمالى
يا أشيل منِّك ظروفك
ولاّ أرجّع ليك حروفِك
غنية تمرُق من جروفك
برجا هجعة ليل طيوفك
علمينى الإحتمال
ولاّ نتعاهد نواصِل ..
فى الدروب القاسية نمشى
وفرحة الأطفال نشوفة
ومضة تمحوها الظلال
ولا نتعاهد نواصل
ونظرة تغنيك عن سؤال
فى خيالك .. وغيم ظلالك
بين ظلالك واحتمالى
لمّا يتجاوب سؤالك
ترفع الأحزان ظروفة
وتنقر الأفراح دفوفة
لمّا نتقابل نحقّق
فى وجودى .. وفى وجودِك
أحلى شوفة0000

[manda]

عدى فات
كلمات / الشاعر صلاح حاج سعيد


عدّى فـات ..
زمن العيون الإلفـة
والحضن الملاذ
ورهـافة الحس البلوّن .
ضحكة الناس العـزاز
بعد الحنان .. الكان زمان
إستوطن المطر .. الحراز
روّح زمانى .. وفى رجاك
عانيت قساوة الإنـتـظار ..
فى ضل شبابيك السفر000
صادقت ليلات الموانئ..
الـساكنة فى بحر
الأمانى بتنتظـر
لو يوم طيوف لحظك تفوت
تعبر خيالاتك تمر
قلق المواعيد الضّجر
سهر العيون ... الإحتراز
إتعزز النوم ..فىالخزار ...
وإتمدد الشقا فى العمر
ملّيت تباريح الجراحات البقت
بعدك أسى وزمناً قسا
وحالاً أسيف
ومشيت أفتش عن
خطاويك القبيل .
واضّارى من زمناً ..
وراك ملانى خـوف
أشتقـت ليك ..
اشتقت أرتاح فى عيون
فيهن ملامحك ذاتا
من غير أىّ .. زيف
وإشتقت لى ضحكة صباحك .
والدعاش عطر رزاز مطر الخريف
أنا وإنت والدنيا الزمان
الناس وفـا وخلة صفـا
ودفء المشاعر الشاتية صيف
أنا وإنت والدنيا الزمان
زمن الغناوى الطالعة من قلباً ..
رضى وحسّاً ندى و زوقاً رهيف
أنا وإنت والـدنيـا الأمـان
ما العمر شتّان بين
أوان زمناً حييتو
وعمر ما بتقدر بتعرف ..
بكرة يصبح حالو .. كيف

[manda]

كان نفسي قولك من زمان
كلمات / الشاعر صلاح حاج سعيد


كان نفسى قولك من زمان
بالكاتمو فى سرى ومكتم
فى حشاى مدسوس سنين
كان نفسى قولك من زمان
بالشايلو فى عينى معزة وفى القلب
ريدا يخاف الغربة والشوق والحنين
زاملنى زى خاطر الفرح
وكتين يقاسم الهم عذاء
وقتين مدامعى تكون جزا
وتفتح مباهج الليل ظنون

كان نفسى قولك من زمان
سطوة محاسنك عندى ما كسرة جفون
وكت العيون تعبرنى زى خاطر المسا
سطوة محاسنك ما الرخام الفى الحرير
وكت الثغير يفجعنى بى حرفاً قسا
سطوة محاسنك عندى وكتين كبريائك ينهزم
لى طيبتى بى لفظة حنان
وكتين مشاعرك تنسجم فى عمرى
تنفح قلبى بى رعشة امان
سطوة محاسنك عندى وكتين شوقى يصبح فى هواك
.. ليل عزة ما بتعرف هوان

كان نفسى قولك من زمان
عينيك وحاتك غربتى وأهلى
وبلادى الفيها ضائع لى زمن..
عينيك وحاتك شوقى لى زولا ولوف..
من بعدو ساب عينى سهن
وأنا كنت دايرك من زمان
أشرح حكايتى معاك الِـف
أحكيك وأزيد القول ولف
وأتمنى لو قلبك عرف كان من زمان
من قبل مافى قلبى يتحكر
زمان الفرقة فى جرح لأسى
من قبل ما حرف الحقيقة الحلوة يتبدل عسى
ويصبح امانى كتيرة فى خاطر الحنان
كان نفسى اقولك من زمان

[manda]

عِـرفتــــــي
كلمات / جمال حسن سعيد


أظنك عرفتى
عواصفك مهبـّى
أبارى فى خيالك .. يسوقنى ويودّى
ونهرك يعدى
ويجهل مصبّى
هواجسى البتزرع
وظنـّى البربى
****
لقيتك خواطر
بتصحى .. وتساور
وطيفك يزاور
وروحك تحاور
وروحك تحاور
موشـّح أساور
أقول بس نسيتك
وجرحك .. يتاوِر
****
أظنك عرفتى عذاب المغنى
وطبلو المجدّع
شظايا التمنى
حروفو البتجزع
فى لحظة تجنى
خطاهو البتهرع
متين تطمئنى
****
مسرِّج خيالك .. حصانى القبيل
معربد غبارو
وخلّى الصهيل
مسافر .. مسافر .. وفاقِد دليل
أظنـِّك عرفتى ..
أظنـِّك عرفتى ..

[manda]

عينيك مدن
كلمات / الشاعر صلاح حاج سعيد

عينيك مدن
منسية فى كتب التواريخ والزمن
عينيك وطن
مشدود على وتر التباريح والشجن
مشدود على حروف الكتابة
مكدود عَنا .. ومكتول صبابة
وفيهو حطّ النيل .. سكنْ
***********
عينيك سفر
مكتوب أعيش فى غربتو
وأعشق عذابو .. وحُرقَتو
وليلو الطويل
وأتخيـّلك يا حلوة زى نسمة سحر
جيتى ومعاك .. حلمى المطوِّل منتظر .. وعدو الجميل
عشقك زمان .. جوّاى رحل
وإتناهى فى الأعماق .. أمل
ضمخ رؤاى .. إحساس نبيل
أذهل طيوف خاطرى القبيل
.. جاشت ملامحك روعتو
وضجّ السكون .. فى وحشتو
والكان أمل فى عيونى .. لاح
ذوب مدارات فرحة الوهج النضير
المزدهر .. بالإرتياح
.. فجأة إنحصد قبضة رياح
وسكت الكلام يا حلوة .. فى القول المباح
وغام الصباح .. بعدِك رحل
**********
والكان أمل فى غيم سماك .. أيقنت إنـّو عدم بلاك
وإنـِّك قدر
وإنـّو البيحلم بى عُلاكْ
بختار ظروف أحلاها .. مُر
عينيكى لو تصدق معايا الأمنية
عينيكى .. لو أعرف خِتام الأغنية
بدء الكلام .. والمنتهى .. المستطاب والمشتهى
كل المباهج الفى المواويل .. والغنا
والعاشقيك قلبى .. وأنا
هزتنا فى عينيك تصاوير المنى
يا أمنيات من كم سنة
يا أغنيات كل الأماسى .. المستحيلة .. وممكنة
المستحيل عينيك تهون
البستحيل قلبك .. يخون
ما الغدر ما طبع الوفا
والصدق ما شرط .. إنتفى
وأنا حالى فى بعدك .. كفى
وأنا حالى من بعدك كفاهو ..
المغنى والحب .. والشجن
والوحشة والشوق للوطن
ما العمر قبلك ضاع سدىً
والعمر بعدك أيه يكون ... لو يبقى بى حساب الزمن

[manda]

الممشى العريض
كلمات عبد العزيز العميري


مكتوبة في الممشى العريض ...
شيلة خطوتك للبنية
مرسومة بالخط العنيد
في ذمة الحاضر وصية ...
شاهدة التواريخ والسير والإنتظار
أدوني من قبلك مناديل الوصول ..
وفردت أجنحة العشم
في ساحة الوطن البتول ..
وضحكت ما هماني شئ ..
وبكيت ولا هماني شئ
عندك وقفت من المشي ..
وغرقت في ضوء النهار

كانوا بتمنوك لو ترتاحي لحظة على الدرب ..
حبوك حب قدر الحروف الحائمة في بطن الكتب ..
قدر الخيال ما مد يدو على السحب ..
كل خاطر قال بريدك
إلا ريدك كان رسول الدهشة في كل الديار ..

وأنا زي عوائد الشعر فارس شد خيل الكلمة ليك ..
مصلوب على ظهر البداية القالوا آخرا بين يديك
وصرخت يا مهون تهون شان أجيك
كان أصل يوم لحضورك
كت بريدك ومشتيهك
وأنكسر فيني الترجي
ونلت من سفري الخسار ..

بس داير أقولك يا أصلية
لو تعب فينا التمني
وإنهتك وتر المغني ..
لو تسدي علينا طاقات البشائر
ينهزم يوم التجني
وأجيك لاهماني شئ
عندك وقفت من المشي
وغرقت في ضو النهار

[manda]

عم عبد الرحيم
كلمات : محمد الحسن سالم حميد


فتاح يا عليم .. رزاق يا كريم ..
صلى على عجل ..
همهم .. همهمة ..
حصن للعباد ... وهوزز سبحتو
ودنقر للتراب .. هم فوق همهمة ..
صنقع للسما ..
وكان في الجو في غيم ..
وكم نجمات بُعاد ..
وكان الدنيا صيف ..
لا قالتلو كيف ..
كيف أصبحت كيف ..
لا لمسة حنان .. لا لمسة وداد ..
لا رمشة طريف من قلباً وفي ..
زي أيام زمان ..
أيام الدفي ..
وكانت ماها في .. كانت في المراح ..
شدتلو الحمار ..
تحلب في الغنم لي شاي الصباح ..
والطير ما نضم ... ما رسل نغم ..

عم عبد الرحيم أتوكل نزل ..
في المشرع لقى .. زملان الشقى
الجاء من الجريف .. الجاء من الجبل
عل الناس بخير ..
صبح هاظرم
نقنق ناقرم ..
غاظوه ونعل
وعم عبد الرحيم ما يخبر زعل ..
كل الناس هنا ما بتخبر زعل ..
تزعل من منو .. وتزعل في شِنو ..
كل الناس هنا .. كل الناس صحاب ..كل الناس أهل
والماهم قراب .. قربم العمل ..

الطاق اليطق عشت أبو الزمل ..
بالحالة العليك بالفال بالأمل ..
عم عبد الرحيم كُت فلاح في يوم ..
في أيدك تنوم .. على كيفك تقوم ..
لا دفتر حضور .. لا حصة فطور ..
تقرع بالقمر .. تزرع بالنجوم ..
لكن الزمن دوار لا بدوم ...

وعم عبد الرحيم ماشي على الشغل ..
في البال القديم
إتعارض تُكل ..
تنشايح جراح يا 000..
كيف الغسل ..
الدِنيا أم صلاح .. تبدأ من التُكل ..
في حق الملاح .. في اللبس الجديد ..
في القص القديم .. وبيناتن عشم ..
في الفرج البعيد ..

أمونه الصباح قالتلو النعال ..
والطِرق إنهرن ..ما قالتلو جيب
شيلن يا الحبيب .. غشهن النقُلتي والترزي القريب
بس يا أم الحسن ..
طقهن لا بفيد ....
إنطقن زمن ..
وإنطق الزمن لازمك توب جديد ..
وبأياً تمن ..
غصباً للظروف والحال الحرن ..
شان يا أم الرحوم .. ما تنكسفي يوم
لو جارتنا جن .. مارقات لي صفاح
أو بيريك نجاح .. ده الواجب إذن
وإيه الدنيا غير .. لمت ناس في خير
أو ساعة حزن ..

عم عبد الرحيم يا حر ..
ات ماك حر ..
ياريت التمر ياريت لو يشيل كل تلات اشر ..
ولا أيام زمان كانت ما بتمر ..
كان ما جاك هوان وما لاقاك ضر ..
كان لا ضقتي ضيق لا اتغرغر صبر ..
لا شابيت غريق لا طوح فقر ..
وكان ما كان ... وكان اكسيكي در ..

والماهية أُف .. عيشة هاك وكُف
في هذا الزمن .. تُف يا دنيا تُف
يا العبد الشقي .. ما إتعود شكِي
لكن الكفاف فوقك مُنتكي
والسوق فيك يسوق ..حالك ما بتسر ..
إلا كمان في ناس فايتاك بالصبر ..
ساكنين بالإيجار لا طين لا تمر ..
واحدين بالإيجار ما لاقين جُحر ..
سلعتم الضراع والعرق اليخر ..
عمال المدن .. كلات المواني ..
الغبش التعاني ..
بحارة السفن .. حشاشة القِصون ..
لقاطة القطن .. الجالب الحُبال
الفِطن الفرن .. الشغلانتو نار ..
والجو كيف سُخن ..
فرقاً شتى بين .. ناساً عيشا دين ..
مجرورة وتجر ..
تقدح بالأجر .. ومرة بلا أجر ..
عيشن كم هو .. وديشن هانقدر ..

وناساً حاله زين ..
مصنع .. مصنعين ..
طين في طين وين ..
ما مرابه مُر ..
بارد همها .. لا يعرق جبين ..
لا وشاً يصُر ..
عين والله عين ..
كلها كمها .. وعزها هان قدر ..
في الجنة أم نعيم .. في الجنة أم قصُر ..
يا عبد الرحيم إلا وراء القبر ..
ويُلكز في الحُمار .. لا تسرح كُتر
فتاح يا عليم ..
وإن كان القفر يا عبد الرحيم ..
أشبه بالكفر ..

حيكومات تجي .. وحيكومات تغور ..
تحكُم بالحُجي .. بالدجل الكجُور ..
ومرة العسكري كسار الجبُور ..
يوم باسم النبي تحكمك القبور ..
تعرف يا صبي ..
مرة تلف تدور .. ولا تقول برِي ..
أو تحرق بخور ..
هِم يا الفنجري .. يالجرف الصبور ..
كل السمتو مات .. باقي على التمور
وأرضك راقدي بُور ..
لا تيراب وصل .. لا بابور يدور
ونقرط للحمار .. نقريطة الحمار
لا تنسى النعال ..
الطِرقي .. الخضار .. اللبس الجديد
تسريح السفر للماشي الصعيد .. ماشي الديش نفر
والبال إشتغل .. والبال إشتعل بالآبى ما يعيد
الحول ما إشتغل ..
الغُبن الشديد .. السابا ورحل ..
الضيق المحل .. والفرج القريب ..
الجاء وما وصل ..
زي الحال ده يوم لا كان لا حصل .. والبال إشتغل

السكة الحديد يا عمو القطر ..
يا عبد الرحيم قدامك قطر ..
وسال الدم مطر ..
وطارت دمعتين ..وإنشايح وتر
يا طاحن الخبر ما بين القضا ومرحاكة القدر
الشهدوا الدموم .. والدمع الهدر ..
إيدهم في التراب .. والعين في القطر ..
عارفين الحصل .. عارفين في حذر ..
الخبر اليقين بوّخ وإنتشر ..
أطفال القرى وعمال الحضر ..
أدوه الطيور ودنو البحر ..
إنصاعد سحاب وإندافق مطر ..
عم عبد الرحيم في الشارع عَصر ..
لي تاله اليسار متفادي الكجر ..
دورية الكجر .. عربية الكجر ..
جفلت الحمار وطوّح زي حجر ..
وعم عبد الرحيم إتلافا القطر ..

فتاح يا عليم .. سال الدم مطر ..
جرتق للتراب .. منشور بي كتاب ..
روشتة وجواب .. وماهية شهر ..
مفتاح آب غراب .. أورنيكين سهر ..
جنب لبدة حمار مقطوعين ضهر ..
عم عبد الرحيم يا كمين بشر ..
صحي الموت سلام ..
ما يغشاك شر

[manda]

سيناريو اليابسة
كلمات / عاطف خيري


نكــــر صــوتك صـــداك ...
غــالــطــني الـزمن فيك
شــهرت عــلى الجــفاف وعدك
بطاقاتنا الخريفيـة ....
رجــع فاضـي الكــلام مليان ...
معــاك إتــبـرجـت غـيـمة
وشهق جوايا صوت جدول ...
مـرقت على المطر حفيان
لـقـيـتــك والــرذاذ مــدخـل ..000.
ونـاديـتـك …أقـيـفـي مـعاي نشيل كتف الغناء الميل
ونتخيل حلم دونك بيتحقق ..
وقبلك خيل دماي واقفة علي شرياني تتشهق ..
وبرق صوتك صداك غنيتي ...

رشحت حلقك لإذاعات الشجر ...
والمنتظر من عودة المدعو المطر ..
وللمسادير و الطنابير ..
واللسة في رحم القصيد ...
والدابو هسة وفي سوق عكاظ
بين مزادات الحروف غيبت رسمك وإحتكرتك للظروف
للزمان الجاي واللحظة الى فاتت مني هسة ..

يا واقفه بين جرح السحاب
وبين شهقة الأرض البكر ..
ما كان ده ريد ..
كان إحتمال تغيير قوانين حركتك ..
ما بين حديثنا ولحظة الفعل الحقيقي ..
وإنتباهك إنت للشارع البيرجع تاني لنقطة بدايتو ..
و إنحيازك إنت للشارع البيرشح في مسام رمل التوقع ..
وما إتعرف قانون نهايتو ...
غايتوا أمشى في الدرب البطابق ..
فيه خطوك صوت حوافرك ...
يا فرس كل القبيلة تلجموا ..
ويكسر قناعاتا ..
ويفر يسكن مع البدو في الخلا ..
ما برضى غير الريح تجادلهُ وتقنعهُ ..

إفترضتك لون أساسي ...
يمنح اللوحة إزدواجية القراية ..
ويفتح الضوء بين خطوط الريشة والخط الإضافي ..
الجاي من شبكية الزول البشاهد ..
وإكتشفنا الرسمك وأنا برضو التوارد في الخواطر ..
نفس أرقام التذاكر ..
البيها سافرنا وشهدنا ...
إنفجارك في الأرض ..
يا سمرة يا واضحة ..

ما غنيت يوم جيتك صدفة ..
قبل أبداك كان غصنك بشر ..
يوم ما كان إحساسك مسى ..
عرج غيمك فيني ومطر ..
لحظة طار عصفور من صدرك ..
رتب فينا إحساس بالإلفة ..
ودوزن عصب الزمن الأشتر ..
وإتوكلت عليك وقلت ..
المارق منك داخل جرح الوردة ..
وراسم فوقا غناوي الطل ..
المارق منك ...
رجع للغابات العرب العاربة ..
وللعتمور الزنج الهاربة ..
وأدى الكون مفتاح الحل ..
المارق منك ...
شادد عصب الورقة وحرفي
وراصد في اللاوعي سكون مواعيد ..
صحوه ... وحلمه... ولونه ..
وشاري يقينك في ظني ...
وسارق لحظة إني أفكر ..
المارق منك ... مارق منك ..
أو مت شهيد ...

ما تتضاري ورى الدعوات ...
وما تتلبسي فرح الفات
يسكن فيك النغم الزايف ...
ويسرق حاسة شوفنا الواقفة
على رجلين جوانا ..
ونحن الهاويه والمطامن من الأرض ..
آه من نحلك ساعة يرحل ..
ولمن يكتب فينا الحنضل ..
ويختم عمره بفعل الشهد ..

قال الجدول :
طلوع النخلة مرور الريح واحد
لكن الريح بتعانق حقل ..
ونحنا بنطلع نخلة وننزل ..
ونكتب في ذاكرة الصفق الأخضر ..
سجنا الريح في الورق الأبيض ..
وجهناها ضد التمر الناعس ..
يسقط زي قبعة الحارس ..
زي الكان بيناتنا وفات ..

قالت غيمة
بين قوسين غيمة لئيمة:
أولاد الشارع فهرس لي كل المدن ..
التهرس جوفك بالأسمنت ..

قالت ريح :
شوف الناس قنديل ..
لو ما نور يحرق كوخ ...
وباقي الحلة تنور ..
أو جبة جوخ أو ينزل بوخ ...
يقول للنسمة الزايفة أقيفي ..
لو تتفرد ريح ...
تتشرد ريح ...
ريح الخوف ...
لو تتفرد ريح
تبدأ تفرتق ضفائر المدن الكاذبة ... تعيد تسريحتك ..

يوم سمايتك شكل قامتك ..
كيف تموتي وتحيي تاني ..
ويوم قيامتك ..
هو البيدينا الثبات ..
يا مجلوبه في قافلة رق ..
ما بستحمل صدرك رصاصة ظلم ..
يا صابت رحم الفال يا قطعت حبل الحلم ..
يا كنا نبيعك يا نسرق ..
إخترنا النار الضلها بيحرق ..
طمناك إنو الدنيا بخشها ضوء ..
يجرح جلد العتمة ..
لما الليل قربان فجرك ..

يا بت يا نيل ... يا بت يا نيل ..
لو نامت قمحة على الأبيض ... واتشرت زيو ..
وزاد الأبيض في غيو..
ومدد رجلة اليسرى ..
ما كان الكسرة جاتك من بره .... صفرا ومنكسرة

زوجناك الشهداء أولاد الكد ..
الماتو عشان الشعب ..
زوجناك ما عندك ضرة ..
زوجناك ما جاتك ضرة ..
ما إنشاف ماعونك ... في الحلة يساسق
ويلقى فتات ...

قال الأبيض للأزرق :
يبقى ضد الانتباه ..
وضد تواريخ التمازج ..
بيني بينك ..
وده البشوفك في مراهقة الخرائط ..
وفينا من وجع المسافرين ..
واطه مالاقت هوية ..

رد الأزرق :
مطر الحبش لو كان نبش ... جواك سقف
وهد حيلك في الدواخل ... وشد عصبك في المداخل
صوت مراكبي وايد بتسأل في القمح ..
وفينا من فرح المسافرين ..
قصة الشمس القضية ..

يا أعشاب النيل الأبيض ..
ماتتضاري ورى الدعوات ..
أقرا تاريخك ... أخاف ..
أقرا تاريخي … أخاف ..
أسأل جبين الفجر ...
ألقى الفجر مطعون في القفا ..
هل سافرت في دمعك المحقون جفا ..
حبة غضب ..
ما شلنا جمرك وإنطفا ..
جوانا نارك والمطر ..
جايين بالكتابة ..
وضربة الناس المهابة ..
لو هز نخلك باشبزق ..
ما فارق التمر السبيط ..
وما ساور الطورية شك ..
إنو الأرض أنثي ... وبتحمل بالحلال
مين اللي قال إنو المسافة ..
البينا بين الشمس طاقة ..
أو مياه النيل بتدخل ..
في عروق السنبلة ..
المسقية بي عرق ..
الجعانين والمساهرين بالبطاقة ..

أقرأ تاريخي وأقيف ..
أقرا تاريخك وأقيف ..
جواك والزمن النضيف ..
جواي من جواك غضب ..
سلم مفاتيح السؤال ..
جيل الشمس موكب حريق ..
واقف على باب الدخول ..
بيناتو بينات الوصول ...
لحظة شهيق..

[manda]

ما طال في بحرك في مي
كلمات / محمد الحسن سالم حميد


ما طال في بحرك في مي

وتمرك مفدع بالجريد

شدرك امد حد السمى

طينك معتق بالطمي

نبيتك اكيد نبيتك هوى

نبيتك ايوة سوا ..سوا من جديد .. نبيتك جديد

ايد ابوي على ايد اخوي على ايد انا

على ايد على ايد تجدع بعيد في اللجة في من راس ميضنة

حيكومة الفقر الدمار

الكضبن والصهينة

اللي ناقص ايامنا كاس

اليالطيف سوس البحر نردم قفاهو حجر .. حجر

من ها الرصيف

الما قدر قدام سريحة الموج يقيف

الما انستر الرزقية وناس وايه

نسقيها كاس اسقينا

نوريها كيف عشق الحياة

سنانا فوق حجر القصاص

سوانا ناس ضرب البحر

جوانا احد من الرصاص

يا ضو حبيبين القسا

طول ما انت غرقان في الاسى

تبت يدين ما ترمي ساس

ما تبني مجدك من جديد

تفتح شبابيك الخلاص

تدخل نسيمات النشيد

بيت القصيد يستقبله

مستقبله والحاضر الماضي التليد

يا بلدي يا فردة جناحي التاني

وكت الناس تطيرلي عالمة

وا فجعة الزول البيجيك

ما يلقى فيك غير الهجير ناسا تواي مسالمة

مل البشاشات القبيل تلقاها ميتة مسممة

والجاته جاتة من الارض ما جاته من السما

ما اعتى غبنك يا ولد

واعدل قضيتك واعظمة

لا ترجع السيف الجفير

والدنيا فايرة مصادمة

من غير تجيب تار البلد

ريح العوارض تهزمة

تطرد مع ابليس الاخير دعة الضلال

من جنتك ادمة

تأكل من الشجر الحلال

يغشاك نعاس في ضل رمى

تختال هضاريب الصعب

كربة ليالي المظلمة

يا نيل قبل خاطرك يطيب

ارضك تفزع باللهيب

تكشح تواريب الغضب صعب المراس

نوبة و زنوج وبجة وحلب

رطانة عربان مواشو

ومولدين تلقانا او نلقاك ضو

ظلمة لياليك العجاف

رعشة نهاراتنا النشاف

امنا بيك وموحدين

في ايدينا فاس وقلم رصاص

شتلة وكمنجة ومسطرين

وطبنجة في خط التماس

[manda]

مريـم الآخــــرى
كلمات / محمد عبد الله شمو

هاهى الأرض تغطت بالتعب
البحار إتخذت شكل الفراغ
وأنا مقياس رسم للتواصل .. والرحيل
وأنا الآن الترقب .. وإنتظار المستحيل
أنجبتنى مريم الأخرى قطاراً وحقيبة
أرضعتنى مريم الأخرى قوافى
ثم أهدتنى المنافى
هكذا قد خبرونى .. ثم قالوا لى ترجـّل


ثم أنتِ .. أنت ياكل المحاور .. والدوائر
يا حكايات الصبا
تحفظين السر .. والمجد الذى مابين نهديك .. إختبا
ليس يعنيك الذى قد ضاع من عمرى هباء
وأنا .. يا صغيرتى .. لست أدرى ما الذى يدفعنى دفعاً .. إليك
ما الذى يجعلنى أبدو حزيناً
حين أرتاد التسكع .. فى مرايا وجنتيك
لا عليك
فعلي هذه السفوح .. المطمئنة
نحن قاتلنا سنيناً .. وأقتتلنا
نحن سجلنا التآلف .. فى إنفعالات الأجنة
وأحتوانا البحر .. والمد اليقاوم .. والشراع
يا هذه البنت التى
تمتد فى دنيايا سهلاً .. وربوعاً .. وبقاع
ما الذى قد صبّ فى عينيك شيئاً من تراجيديا الصراع


والمدى يمتد وجداً عابراً هذى المدينة
خبرينى هل أنا أبدو حزينا
هل أنا القاتل .. والمقتول حيناً .. والرهينة
هل أنا البحر الذى لا يأمن الآن السفينة ؟
خبئينى بين جدران المسام
قبلينى مرةً فى كل عام
فأنا أحتاج أن ألقاكِ فى كل عام
أنا أحتاج أن ألقاكِ فى ذرات جسمى
فى الشرايين المليئة بإنقلابات المزاج
فى إنعكاس الضوء
فى النافذة الأولى .. وبلـّور الزجاج
.. هكذا قد خبرونى .. ثم قالوا لى ترجل


وعلى أطروحة الحلم المسافر .. ألتقيك
على حمى الرحيل المستمر .. الآن .. فى كل المواطن ألتقيك
فى مساحات التوهج .. فى جبينى .. ألتقيك
فى إنشطار الوقت .. فى كل الذرى
وفى حكايات الطفولة .. إذ يعود بنا الزمان .. القهقرى
آه لو تأتين يا سيدتى .. من كل فجٍ .. وأتجاه
من عميق الموج من صلب المياه
تستطيعين التنقل بين أرجائى وظلى
تستطيعين التوهج .. عند لحظات التجلى
ولعينيك إمتلاك وثائقى .. حتماً .. وقلبى
ولعينيك التنصل .. عن مواثيقى ودربى
هكذا قد خبرونى .. ثم قالوا لى ترجل


وأنا أبحث عن صيغة هذا البعد .. هذا اللاّ نهائى
عن قرار الشعر .. عن لون التـّغرُّب
بين جدران المقاهى
آه لو تأتين ... آهِ
تجدين الإِلف الممتد سهولاً .. بإنتظارك
وأنا .. كالحذر المنساب .. خوفاً
بين صالات الجمارك
كالرحيل .. كالترقب .. وإنتظار المستحيل
هكذا قد خبرونى
ثم قالوا لى ترجل

[manda]

الطـيــــــــور
كلمات / حــافظ عـباس


والله نحنّ مع الطيور..

الما بتعرف ليها خرطة

ولا فى إيدا جواز سفر

نمشى فى كل المدائن

نبنى عشنا بالغناوى

.. وننثر الأفراح .. درر

والربيع يسكن جوارنا

والسنابل تملا دارنا

والرياحين .. والمطر

*********

والحبيبة تغنى لينا

لا هموم تسكن دروبنا

.. ولا يلاقينا الخطر

*********

إلاّ باكر يا حليوة

لمـّا أولادنا السمر

يبقوا أفراحنا البنمسح بيها .. أحزان الزمن

نمشى فى كل الدروب الواسعة .. ديك

والرواكيب الصغيرة .. تبقى أكبر من مدن

إيدى فى إيدك نغنى

والله نحنّ .. مع الطيور

الما بتعرف ليها خرطة

ولا فى إيدا جواز سفر

[manda]

ادفقي
قاسم ابوزيد

ادفقي ما تبقي رقراق

ابقي ياضل ياشموس

غطي الساحات بالوضوح

انهضي الشوق البدوح

وهجك شوارع ذاتي في ليل اليباب

ما تشفقي العطش الرحيل

النيل ركيزة ودمعة الاحباب سحاب

ما تخافي من دم الغروب

لو رتش اللوحة الضباب

ما دام ضمير الفينا حي

ما دام عريق العشق حي

ملحوقة يامدن السراب

نديانة بفرح التساب

ادفقي فيضان عمر وفجي الوجع

دمع الالم ما يهددك ما خاب غناك

فارسك رجع ..

اتوهجي انت الشمس اتلهجي

نورك سطع نور بوادينا الكساح

رقصت مزامير الصباح

مبكية قرية وقنبلة

مسقية دمعة وسنبلة

الليلة في ايدنا السلاح

ريشة ..وكدنكة .. ومطرقة ..

نبنيك احسن يا ظروف ..

مخضرة دانية القطوف ..

نطوي المسافات نسبقا

ادفقي بلدك فداك .. اتوهطي

وري البنيات العزيز

محمية بعرق الترابلة ونغمتك

مسقية بالريد العتيق ..

انغام ربباتك تشيل معزوفة الليل والرفيق

ما تصغري تكبر اماني السنبلة هيا اكبري

تصغر معاني القنبلة

ما ترجعي الصد للمدائن والقرى

شيلي الشحوب والاصفرار

ادي البويتات مظرا

ادفقي في كل شارع وكل بيت

في روابينا المحنة في ضمائرنا السهول

ادفقي في كل حتة وكل زول

وابقي شان تحي الحصول

[manda]

ليـه غبتـي يا قمـــره
كلمات / قاسم أبو زيد


ليه غبتى يا قمرة
نركب جياد الليل
وإنشرّ بينّا صباح
سفر العتامير .. ليل
نرجاكَ فى المطرة
أرجع تعال .. يا شليل
دِرع الأميرة .. سـِرِق
سووهو حِدوة خيل
بحر العطاشا .. نِشِف
نشرب بواقى السيل


صُدْ لى ملامحك .. يا حراز
ريح العوارِض ... غرّبتْ
فرتِق ضفايرك .. لى الرزاز
... جية العصافير .. قرّبتْ

[manda]

مزيــكة الحـواري
كلمات/ محمد المهدي عبد الوهاب


مانى غرقان فى التمنى
ولانى سارح بالأمانى
زارنى خاطراً بلّ شوقى .. وإحتوانى
النخل إتلاقى .. غنى
وردد النيل الأغانى
النجوم لامع بريقا
الورود النايمة .. فاقت
عطرت كل الجزاير بى رحيقا
الندى الراقد بفوقا
صفّقت جنحاتو غنت .. لى هوايا

دقوا مزيكة الحوارى
رقصوا البنوت .. أعرضوا
النخل زايد فى عرضو .. وفى علاهو
البيوت غرقت وراهو
وبرضو زايد فى علاهو
يحكى للدنيا الجميلة
سر عظمتو .. وسر بهاهو

ضى عيونك يا بنية
يضوى من بلداً بعيدة
تحملك لينا الغمامة
ويكتمل للروح .. نشيدا
وفى الدروب اللّيك تودى
بنسرج الخيل العنيدة
والحزن من نور عيونك
يلبس الفرحة الجديدة

وأنا راكب يا مراكب
لا الرياح توقف خطايا
لا الجبال .. تحجب رؤايا
ست شموس الكون .. منايا
ليك مسافر
ومن كتير الزاد .. مسافر بى غنايا
نوصل الشمس البعيدة
نبقى عيدا
نزرع الحب البيوقد
لى النهاية

[manda]

وهج الشعاع
كلمات / الشاعر مدنى يوسف النخلى


يا ريتنى زى وهج الشعاع تمتد سحابات الغروب سر روعتو

وزى قدر المسافر لمدن محهولة لما تضيع خطاوى البهجة

فى همس الكتوم

حبك صبح أشتات ظلال وأطلال خيال خرافات قصتو

برحل عشان أنساك وأسيب الذكرى فى وجع الطريق

وأمسح دموع شمس الهوى المصلوبة فى صمت الغروب

وأمسح دموع قلبى التعب كان فى هواك

يقدر يتوب ما كان عشم قلبى الحزين

مترجى من عينيك حدود كان عندى فى سفر الأمل

تلقى البودع ليك وعود والليلة يا قلبى اللى راح

بروعة أشراق الورود مد الغروب المادى أيدو

ضاعت أحلام الورود زى ما بموت وهج الشعاع

[مامون مهنا]

ماندا ظنى فيك لم ولن يخيب فقد احدثت حراك راقى وجميل بالمنتديات يديك العافية على الجمال والطرح الانيق .

[manda]

سلمت يمناك

صديقي الإلكتروني

دمت في سلام..

[مامون مهنا]

صديقي الإلكتروني


:shocked::shocked::shocked::no::no:

[manda]

سعدت بملامستك هذا البوست..

لك كل ما يروق لك من حجم السعادة .. وبهو زهورها العطرة..

سأكون حاضراً بحضورك.. واتحسس ملامح خطوتك نحو زهول ..

دمت بيننا هكذا..

نبض حقيقة..

ونفس..

[رجاء داؤد]

اختيار بروعة العزيز الراحل .. سلمت يداك

[manda]

لك كل الروائع .. يا رائعة ..

رجاء يا شفيفة بقدر شفافية الجمال وبحجم السعادة ..

ايها الراحل فيها .. أيها الراحل فينا..

[piano man]

ياسلاام اخي ماندا شكرا علي المشاركه الحلوه
تقبل مروري
تحياتي
piano man

[manda]

ياسلاام اخي ماندا شكرا علي المشاركه الحلوه
تقبل مروري
تحياتي
piano man


تسلم بيانوا مان ..

سعدت بمرورك ..

ومافي احلى من ما تقدم لنا يا رائع..

[manda]

فلنحي ذكر لهذا الراحل الذي قدم لنا ..

تحف هذا الزمن والأزمان التي بعدت عنا..

التحية له وربنا يسعد ابناءه..

تحياتي..

[محمد بخيت]

كل الود لك عزيزي manda وانت تمزج كل الوان الشفافية التي فقدناها برحيل الكبير مصطفى سيد احمد ( لازمن حبك حقيقة ولا تعب زمنك فرح ياخطوتك يالوجع الجرح)..... تحياتي
بالنسبة للقصائد الما لقيت شعراؤها نحاول نضيف على قدر معرفتنا :
ياسر مكتوم - العزيز هاشم صديق
ما بان عليك سفر العمر - مدني النخلي

[الكردفاني]

الجميل ماندا

[فقط الأعضاء المسجلين والمفعلين يمكنهم رؤية الروابط]

[manda]

الشكر لكل الامس هذه الكلمات العسجد..

تحياتي ..

وودي للقامة مصطفى سيد أحمد..