مكتبة الشاعر سيد احمد الحردلو

[رهف]

سيد احمد الحردلو.....ستون عاما من الحداد ياعرب

ستون عاما... يا عرب

وأنتمو عرب... ولا عرب.

ستون عاما... يا عرب

وأنتمو شعب... من التعب

ستون عاما...

ليس فيها غاضب...

ولا غضب

كنتم جيوش الكر والفتح

فاصبحتم جيوشا...

من قصب

كنتم...!

وهأنتم تمارسون...

اليأس والنّصب

حباكم اللّه

بنعمة البترول...

واللؤلؤ... والذهب

وبالأنهار تجري تحتكم

وبالعيون...

والبحار... لا عجب!

وهأنتم...

قطعان معز...

تعلف الخشاش... والسغب!

(2)

حكامكم...

أمام أمريكا وإسرائيل...

جوقة من اللعب

عادوا إلى البث المباشر

في المذياع والتلفاز...

بالخطب

يهجون بعضهم...

ويقتلون بعضهم...

والأرض تنتحب

وإسرائيل فوق البر

والبحر...

وإسرائيل في الجولان والنقب

لم يبق

من دار العروبة...

غير بعض من حطب!

(3)

صرتم جميعا

في رحاب اللّه.. ياعرب

صار العراق

في رحاب اللّه... يا عرب

وفلسطين.. في رحاب الله...

ياعرب

ولبنان في رحاب الله..

يا عرب

وها هو السودان

كاد أن يكون...

في رحاب اللّه... يا عرب!

(4)

ورغم كل ذاك...

مازلتم بخير...

وانبساط!

فالفضائيات ما تزال

تزحم الفضاء

بالبنات العاريات

والأغاني الهابطات

ونراجيل الحشيش

ما تزال في مقاهيكم...

مغر غرات

والمراقص

ما تزال...

والصبايا الفاتنات

فما لكم ومال الباكيات

ومالكم ومال الثاكلات

وما لكم ومال (وامعتصماه!)

وما لكم ومال (وا... عروبتاه!)

وما لكم ومال فلسطين

أو لبنان

أو بغداد

فليحصد الرصاص

الاخضر واليابس...

ولا يبقى سوى الرماد

فالعالم العربي

صار في رحاب الله...

ولم يبق سوى الحداد!

(5)

وما يزال

كاوبوي امريكا هناك

وما تزال يد إسرائيل

ممسكةً على الزناد

تنوش كل عصفور...

من النيل...

إلى الفرات

فرحمة اللّه على العرب

كانوا هنا...

وذهبوا كقوم عاد

... لم يبق سوى الرماد!!

[رهف]

كتاب مفتوح إلي حضرة الأمام



يا حضرة الأمام ... يا حضرة الإمام

يا أيها الدرويش والرئيس
والمُلهِم والمُلهًم
والمشير والوزير
والغضنفر الضرغام


يا دارسا وفاهما وعالماً
في الفقه والتشريع والقضاء
والفكر والتاريخ والجغرافيا
والشعر والترتيل والغناء
والحرب والسلام والفضاء
والطهي والبلهارسيا
والحب والبكاء

يا أيها الوحي السماوي الذي كرمنا وجاء
لينقذ الإنسان والدنيا من الفناء


يا حضرة الأمام يا جعفر المنصور
بإذن الله يا أيها المهدي والقرشي
والمكي والكوفي والصوفي والأممي
يا مفجر الصحوة يا مبارك والطلعة
يا محرر الإنسان والإسلام
من كيد إبليس ومن شطيان أوربا وأمريكا
ومن إلحاد روسيا الحمراء

يا حضرة الإمام يا قاهر الكفار و التتار والأحبار و القوقاز
يا فاتح الأمصار من مصرٍ وأندلسٍ ومن واغٍ ومن أهواز
يا ناصر الأنصار من هند ومن سند ومن نجد ومن حجاز
ويا رئيسنا المحبوب من عشرين مليون
وعلي الحاكي وفي المذياع التلفاز

تبارك الذي سواك محبوبا ومرغوبا ومعشوقاً
من الداني وإلي القاصي
و من كوريا إلي فاس
تبارك الذي سواك محسودا ومطلوباً
من الأعداء في ليبيا وأثيوبيا
و أقيانوس بنت الروس
والأوغاد من أحفاد جنكيز خان
تبارك الذي سواك مظلوما ومهضوماً
من الكفار من أحفاد ترهاقا
ومن شهداءِ أمدرمانَ أو سنارَ أو شيكان
أ ومن معشر الكفارِ في السودان

تبارك الذي سواك مطلوبا سليما كنت أو ميتاً
من السودان من أهليه من قتلى
ومن جرحي ومن جوعى ومن عطشى
ومن ثكلى........ ومن أيتام



يا حضرة الأمام .. قول لي بحق الله
... كيف جاءك الوحي؟؟؟
أكان عارياً أم لابساً وخافياً أم كاشفا
وهل أتاك في الصبوح أم أتاك في ا لغروب
وفي أثناء سجدة أم في خلال قعدة
و في أي مغارة أتى عليك أفضل الصلاة والسلام
قل لي بحق الله كيف جاءك الإسلام يا مسيلمة الكذاب
وكيف أسلمت وكيف آمنت وأنت الصايع الضائع
والسكران والحيران والطبال والزمار والناصب
والمحتال والسارق والزاني وأنت العيب والحرام


يا حضرة الإمام وقل بحق الله والإسلام
من الذي أباح شرب الخمر في السودان
من الذي استباح زوجات المقربين والحكام؟؟
من الذي ادخل في قاموسنا الجميل والنبيل والأصيل
فاحش الأفــعال والكـــلام؟؟؟؟

يا حضرة الأمام من الذي بشر بالتعذيب والتنكيل والإعدام
من الذي أغرق هذا الوطن المسالم الطيب في الدماء والثارات والأحزان
من الذي أباح مالنا وأرضنا وزرعنا وضرعنا وعرضنا
من الذي حول وطني زريبة وشعبنا أغنام


من الذي جوعنا ــــ صيرنا شعبا من المهاجرين المدلجين في شوارع العالم
تحت الريح والأمطار والظلام


وعندنا السودان عندنا السودان وعندنا السودان
سلة الغذاء للدنيا وكسوة الشتاء للدنيا
والمنزل المفتوح للدنيا بالحب و البسمة والسلام


من الذي يا حضرة الدرويش والأمام
من الذي عاهدنا علي كتاب الله
أن يصون الحق و الدستور والقانون ثم خان


يا حضرة الإمام.... ياحضرة الإمام.... يا حضرة الإمام
كل الذين بايعوك كاذبون أو منافقون أو من سيفك المجنون خائفون
فكلهم يعرفوا أن كل همك البقاء والسطوة والسلطان والجنون
حتى علي أجداثنا حتى علي أعراضنا حتى علي تاريخنا
حتى علي أدياننا
لابد أن تبقى ويبقى حولك المهرجون والدونكيشوتيون والمنظرون
فكلنا يعرف أن إسلامك فرية و نكتة سخيفة
وحيلة أخيرة من ظالم وخاسر جبان
يريد أن يبقى علي الكرسي مهما كلف البقاء في الكرسي
هذا الشعب من موت ومن هوان
حذاري يا إمام ..........حذاري يا إمام
فالخلد والبقاء من صفات الله جل شأنه
و أنت من طين ومن تراب
وهالك وزائل
وكل حاكم مهما تناسلت أيامه وانتشرت أعلامه
وانتصبت أحكامه وصار شأنه
فإنه من التراب وعايد إلي التراب


ويبقى الشعب جل صبره وجل شأنه
وحين ما تحين لحظة الميلاد والقيام
وينهض الشعب بإذن الله تنهض الدنيا
وتنهض الأنهار والأشجار والأطيار والأحجار والغمام

ويغرق الظالم في الظـــــــــــلام
فالشعب كاسح وجارح وسائد ووالد
والشعب يا أمامنا وهو الإمام

[رهف]

تغير الناس
واصبحوا بلا طعم ولامذاق
وصار كل شئ مالح المذاق

فالحب لم يعد حباً
والشعر لم يعد شعراً
والفكر لم يعد فكراً
وصارت الدنيا لا أخلاق

الناس يشتمون
يصرخون .. يلعنون
صاروا يقولون .. ولايدرون
يسيرون .. ولا يمشون
ويضحكون أم يبكون .. لايدرون!

الفكر كافر
ان جاع بلدي
ومازال ينظرون

الفكر كافر
ان ساد في مدينتي المهرجون
يشرشحون وطني .. ويندبون!

ها نحن أصبحنا
زريبة من الخشب
وصار كل واحد فينا
جزيرة معزولة من الحطب
لافرح فيها .. ولاغضب!

كنا مدينة من الشعر
وعاصمة من الادب
والان لم يعد في بلدي شعر ولا أدب

هذا أبو لهب
مازال قابعاً في بيتنا .. أبو لهب
(وامرأته حمالة الحطب)
في جيدها بنك من الذهب !

تغير كل شئ
تبدل كل شئ
تغيرت أشياؤنا الجميلة
وهاجرت أخلاقنا النبيلة!

تغير النيل
فلم يعد نيلاً .. وليس يحزنون!
تغير الشاطئ
صار مثل سارق يهرب من عساكر السجون
وكان موعداً للحب .. تعلمون !

تبدل كل شئ
فالحسن لم يعد يطربني
وشكسبير لم يعد يفرحني
والمتنبئ لم يعد يدهشني
والقهوة لم تعد تعجبني
والتبغ لم يعد يلهمني
تغير كل شئ

تبدل كل شئ
لم يبق أي شئ
فأين - مثلا - مدينه أم درمان!
بحثت في كل زمان
سألت في كل مكان
لم أترك الرواة والنحاة والركبان
فأين ام درمان!
حاضرة المهدي والصوفي والقرآن
وساحة النهضة والكورة والتيمان
وملتقي الأنهار والأفكار والألحان
فأين ام درمان!
هل مرة ركضت فوق جسرها
هل مرة حلفت بالحبيبة ام درمان
هل مرة رأيت فيها مايري الفنان
فأين ام درمان!
وأين ذهب الغناء
أين هاجر التم تم
كيف أعلن العصيان!

تبدل الناس ...
تغيروا كثيراً
وكان الناس اما شاعراً
أو ناثراً وأميرا
وكان الحب في ديارهم ...
مستوطناً أثيرا
وكانت المرأة حق صندل ...
يوزع العبيرا
فما الذي جري
حتي غدونا كلنا قبورا!

كيف - اذن -
يفكر المفكرون

كيف - اذن -
ينظر المنظرون

وكيف سوف يحكمون بلداً...
قد أورثوه الحقد والجنون!؟

[رهف]

1-
ملعون أبو الغُربه
وملعون أبو عِلانْ ،
القالْ تهاجر .. يجيكْ
شِيتاً كتيرْ . . بلحيلْ
شِيتاً يجيكْ بالوَعَا ..
وشيتاً يجيكْ بالليلْ
ناساً يجوكْ طاشينْ
وواحدين يجوك ْ نازلينْ
من السَما العشرينْ ،
زىّ الخِدرْ .. داجينْ
شايلين كلامَ الكتابْ
وشايلين كتابَ الكلامْ ،
وشايلينْ . . كمان شايلين
كلّ السَمحْ .. والزينْ ،
-2-
سمِعْ كلام السَفِيهْ
وقُمتَ دَجيتَ
ومشيتْ وراكْ يا سرابْ
ناماً .. أنا حِفيتَ ،
كُلْ ما أدور أرتاحْ ..
أشم دُعاشَكْ قريبْ
وأتابعَ السِكة ،
يا سكة آخرِك وين
يا سكه وين الوصول
داير لى ضلا زين
وزول يقول لى الزين
يقعد حداى يكب الجبنه .. فنجانين
وأقول كفاى .. ويقول .. تدفنى .. تانى .. اتنين
يا حليل ضلول الضحا
ويا حليل بيوت الطين
ويا حليلن الطيبين
العندهم حقك .. حتى ولكان ملين
-3-
يا حليلْ نسايم الليلْ
فى مقرن النيلين
وحليوة الحلوينْ
عينيها براقين
شايلين خريف وشتا
وصابين علينا . . حنينْ
-4-
يا حليلْ أهلنا الكتار
والمو أهَل . . وكتار
يجوك وكت الفرح
ويجوك ساعة الترح
وبينن ساعة الترح
وبينن اللتنين
يجوك خفاف وسراع
ويقولو ليكا .. سلام
ويجيك معاهم سلام
-5-
يا حليلْ كَبوبنا وعَجاجنا
ويا حليل سجمنا ورمادنا
وزعلنا دون أسباب
وفرحنا دون أسباب
وبُكانا دون أسباب
يا حليلو هُه الما غابْ
راقد تقول تمساح
حارس العقاب بالناب
راقد تقول محدود
فى الدنيا . . من غير حد
طيب . . وزين . . وفقير
وغروره فايت الحد
يا اخوانا – بالله
قولو لى كيف الزول
يقدر يخون بلده
مهما تكون بلده
تعبانه . . فايته الحد ،

[ودالامتداد]

ابداع وما بعده ابداع اختى رهف
ونحن حقا نطمع فى تلك المكتبات
واختيارك للعمالقه هو شىء رائع
ومميز
وننتظر المزيد من اشعار الحردلو
دمتى ودام وجودك قبس به اسطل
لكى الف شكر

[ابواحمد]

اننا نتابع معكم قصادر شاعرنا المبدع هو من فحول الشعراء ببلادي ...

[مزاجيه]

يســلمو غــآليتــــي رهــف علــى الانتقــآء الرآئــع والمميـــز ..
وبإنتظـــآر المزيـــد منـــكــي ..
دمتـــي بخيــــر ..

[افاش]

انه يجيد الابداع فى اي وقت





يتغلب على اصعب الانواع





مسكون بإبداع غريب


حير من يستطيعون فهم شعره




انه ملك زمانه

[رهف]

سيد احمد الحردلو......حصل
يا جَنَا .. أبداً جَرَالَكْ أمرْ مِن هَذَا القبيلْ ،

إنك مسافر فى بلاد بره .. وزول عابر سبيلْ

تلقاك بنية حليوة .. زى موية السبيلْ ،

والدنيا حرْ ..

والجوف عليلْ ،

تنده عليكْ

يا ماشى زى الغابة .. يا زولْ .. يا جميلْ

وَقفْ .. وهاكنى معاكْ .. وسافِرْ .. يا جميلْ ،

- أيوه حَصَلْ ،

بس المطرْ كان قاجى .. والليل كان جميلْ

والبندقية .. جزيرة الطِليان ..

يمين . . مليانة شيلْ

والبحرِ رايقْ .. والمزاجْ . .

والجيب تقيلْ ،

وشربنا . . ناماً شُفنا ايطاليا مدنقرة فى المحيطْ،

وتقول ياليلْ

ويمين – حلفنا – نعومْ .. وكان الكيفْ تقيلْ

والواطة ليلْ ،

يا زول حَصَلْ .. زى ما حَصَل . .

ما الدنيا ليلْ

والزول مسافرْ

والطلايناتْ ديكْ . . يا ليلْ ،

- أيوه حَصَلْ

. . . بَس المطر كان قاجى .. والليل كان جميلْ

[رهف]

- 1 -

تانى قام واحد جميل فى بلدنا ... ماتْ

وكان بغنى للمساكين .. والمسولتين .. والحفاتْ

وكان بغنى للمنافى .. والعصافير .. والرعاتْ

وكان بغنى لى بلد فى الحلم ... جاي .. أغنياتْ

وكان بطنبر .. وكان بدوبى .. للحياةْ

- 2 -

تانى قام واحد ملك ... روّح .. وفاتْ

وكان ملك فى الريد ... وإنسان فى الصفاتْ

وكان مهاجر فى دموع كل البكاتْ

وكان وتر مشدود ... ومسكون دندناتْ

وكان - عليه سلام - تقول مازول حياةْ

- 3 -

يا مصطفى .....

فاكر الجماعة الكانوا ساكنّك دوام

من منفى لى منفى

ومن عود ... لى سفرْ

فاكر العصافير المسافرات دون جواز

فاكر اللى داجّين فى المطرْ

.... عبدالرحيم ... وهلم جرْ

فاكر القطر

فاكر النخيل .. فاكر الحراز

... الليلة كانوا جميع هناك

قسماً يمين .. كان الجميع باكين عليك

كان المطار فارش عليك

كان الجميع مشتاق إليك

ياسلام عليك

لمّان تكون زولاً عزيزْ

عنْ ناس عزازْ

- 4 -

يعنى كان لازم تفوتْ

والحزن مشرور فى البيوتْ

والدنيا مازال فيها حوتْ

.... وفيها لسع .. عنكبوتْ !!

.... يعنى كان لازم تفوتْ

وتخلّى أوتارك سكوتْ

ولسة عندنا ريد جديدْ

ولسة عندنا ليك قصيدْ

...... يعنى كان لازم تفوتْ

وتخلى هذا الحب يموتْ !

- 5 -

ياسلام عليك

لمّان تكون زولاً عزيزْ

عنْ ناس عزازْ

يا سلام عليكْ
من اجمل ماقيل فى رثاء الراحل النورس الفنان مصطفى سيد احمد

[رهف]

-1-
كُتْ قايل صحيحْ الهجرة تِرياق للجراحاتْ
ورَاح أرتاح من أحْزانى القديماتْ ،
وقُمْ طشيتَ فى دُنياتْ .. بعيداتْ
برايا جريحْ
أكاتل الريحْ
وأكوس فوق التخاياتْ ،
وأغلب الشوقْ .. ،
وأقول أصبُر خلاس فِضْلن شِوياتْ
عشان ترتاح من أوجاع حُبَك الفاتْ ،
وكم مرات
أحِنْ للارضِ .. والناس الحليوينْ
وادَفْدِف فوق بُلود الغيرْ مِطيراتْ ،
وكم مراتْ ،
... أوَاصلَ الهجرة فى الذاتْ ،
... ورُحتَ بعيدْ
وضيَّعتَ المسافاتْ
وضيّعتَ العناوين والجواباتْ ،
وقُتَ خلاسْ
خلاس الماضِى قد ماتْ ،
وودعتَ الجراحاتْ
-2-
.. ومرت بيّا زى شوبتينْ
وزىْ شِيتاً حميمْ .. ودفينْ
يجيكْ وكتَ الوجع .. والشينْ
يجيكْ زىَّ العديل ... والزينْ
حضرنى شعورْ
شعورْ بحضورْ
حُضور محضورْ
وسادِى الدنيا .. جايى عليّا .. زفة نورْ
.. واتلَفَتَ .. بى هجمة فرحْ .. مسحورْ
وجُوه النورْ
بَشُوفِك نورْ
شَلَح تَالاىْ
تقول مَقطعْ من الدوباىْ
بِفتش ليهو .. لى غناىْ ،
أتاريكْ .. كُتِ دِيمه معاىْ
مهاجرة .. وفى الضُلوع .. جُواىْ ،
-3-
أتاريكْ .. رُحتِ قبلى هناكْ
وشلتِ معاكى كل الفاتْ ،
-4-
لِقيتِك واقفه فى كل المطاراتْ
ومتظرانى بالشوق والبسماتْ
وايدِك راعشة بِتقول لىْ .. سلاماتْ ،
لقيتك فى محطات القطاراتْ
والتُلوج نازلات على وِشيشك وصاباتْ ،
وإنتِ تحاحى بالتوبْ .. الدِميعاتْ
-5-
أتاريكْ رُحتِ قبلى هناكْ
وشلتِ معاكى .. كل الفاتْ ،
-6-
لِقيتِك فى الشوارع والمطوراتْ
وجارية معايا مرات للضُلولاتْ
وواقفه معايا مرات فى الشموساتْ ،
وقاعدة معايا فى قهواية مراتْ
وتحكى لىْ حكاياتْ ،
وأشوف عينيكى ضاواتْ
كما أُمبارحْ ...
ومليانات محناتْ ،
-7-
أتاريكْ رحتِ قبلى هناكْ .
وشلتِ معاكى .. كل الفاتْ
تَّصاويرنا
وغناوينا
وفريحاتنا .. ومشاويرنا ،
وحاجاتنا الصغيرونات
والخليتَه تذكاراتْ
ورايا هناكْ
لِقيتَه معاىْ
بِتمشى معاى
وتقعد جَنْبى تتكلمْ
تعيد ليا جميعَ الفاتْ ،
-8-
أتاريكْ .. رُحتِ قبلى هناكْ
وشلتِ معاكى .. كل الفاتْ ،
-9-
وكُتْ قايل .. صَحيح الهجرة بتداوى
ولقيتَ الهجرة .. بتكاوى ،
وتَفتِحْ لينا ماَضينا
وتخلينا
مساجينُو ،
وكُلْ مادُرنا نَهرُبْ مِنوُ ...
نَلقانا ... مساجينوُ ،
-10-
أتاريكْ . . رُحتِ قبلى هناكْ
وشلتِ معاكى . . كُلَّ الفاتْ

[رهف]

-1-
أنا ، واستغفْر المولى ،
من قولة .. أنا .. ، أدبى ،
شاردْ من التاريخْ
ونازل بدون تصريحْ
وشايل قَلمْ دهبى
وقرطاسْ ورقْ عربى ،
وبكتب كلامْ أدبى
وما عندى غيرو أنا فى الدنيا .. من أرَبِ
-2-
كلامْ عشان الحُزُنْ .. والناسْ ..
كلام أدبى ،
ما عندى غيرو أنا فى الدنيا . . من أرَبِ ،
لا خزنة . . لا سُلطانْ
لا غيرا .. من طَلبِ
الناسْ مطالبى أنا . . والحبُ للأدبِ ،
-3-
يا أيُها مطرودْ
إنى أنا زولَكْ
وأيُها محزونْ
إنى أنا هُولَكْ ،
هَادِى مطالبى أنا ..
والحبُ للأدبِ

[رهف]

1-
تقول لِى شنو
وتقولى لِى منو ،
-2-
أنحنَا السَّاسْ
ونَحنا الرَّاسْ
ونحن الدّنيا جبناهَا
وبَنيناها..
بِويت ..فى بِويتْ
وأسْعل جدى ترهاقَا
وخلى الفَاقة .. والقَاقا
-3-
تقول لِى شنو
وتقول لِى منو ،
-4-
تَالا أبوى .. بعنخى لَزَمْ
وتَالا اللُمْ..أَبوىْ أوْلبَابْ
وأمى مهيرة بتْ عبودْ
وأخويا المهدى ..سيد السيفْ
والخلى النصارى تقيفْ
هناك ..فى القيفْ ،
-5-
تقول لِى شنو
وتقول لِى منو ،
-6-
ونحن الشينْ
ونحن الزينْ
ونحن العقبه والعتمور
ونحن القِبله .. والقرعانْ
ونحن الشانْ
ونحن النانْ
أتينا عشانْ
نسوى الدّنيا للإنسانْ
تقول لِى شنو
وتقول لِى منو ،
-8-
ونحن الصّافى
والوَافى ،
ونحن الشّافى
والكافِى ،
ونحن الزادْ
ونحن العِينه
والزِيّنه ،
ونحن – يمين – أهالينا
أهلى سرورْ
ووكَتين ينزل المستورْ
تَرَانَه النور
-9-
تقول لِى شنو
وتقول لِى منو ،
-10-
ونحن الجبنه واللبريقْ
ونحن قداحنا سَاوات ضيقْ
ونحن بيوتنا مفتوحاتْ
مَسَاىْ .. وَصباحْ
ونحن وشُوشنا
مطروحاتْ
مَسَاىْ وصباحْ
ونحن السَمحه
والقَمحه
ونحن الطله .. واللمحه ،
ونحن الصِيدْ
ونحن العيدْ ،
-11-
تقولى لِى شنو
وتقولى لِى منو ،
-12-
ونحن عُزَازْ
ونحن حَرَازْ
ونحن هَشَابْ
ونحن قُمُوحْ
ونحن تُمُورْ
ونحن عُيُوشْ
ونحن النيلْ
وَكضَاب – يا زويل – منْ قالْ
إنّك .. تانى لينا متيلْ ،
تقولى لِى شنو
وتقولى لِى منو ،
-13-
ونحن الحَجه والتوبه ،
ونحن الهِجره .. والأوبه ،
ونحن كُتَارْ
ونحن كُبَارْ ،
ونحن – يمين – جُمَال الشيلْ
ونحن – يمين –نَضِمنا قليلْ ،
-14-
تقول لِى شنو
وتقول لِى منو ،
-15-
ونحن مِحايه
نحن طِرايه
نحن فِدايه
نحن سِمايه
نحن حجاب
ونحن اللوحْ
ونحن شَرَافه فى الدنيا
ونحن كِتاب عِلمْ مفتوحْ
على كل البُلودات ..نُورْ ،
ونحن – يمين – مَداين نورْ ،
ووشنا نورْ ،
-16-
تقول لِى شنو
وتقول لِى منو ،
-17-
ونحن الحِنه والجرتقْ
ونحن الزفه والسيره ،
ونحن ..أبشرى والشبال ،
ونحن السَىْ
ونحن الوَىْ
ونحن الرقبه .. والتُمْ تُمْ
ونحن اللَمْ ..
يكون فى الدنيا ..متلنا ..لمْ
-18-
تقولى لِى شنو
وتقول لِى منو ،
-19-
ونحن العَاجْ
ونحن الصَاجْ
ونحن البوشْ
ونحن الحوشْ
ونحن الناسْ
وكتين الديارا ..يباس
وإن درت العديل والزين
تعال يا زول ،
وإن كست الكعب والشين
أرح .. يا زول
-20-
تقولى لى شنو
وتقول لى منو ،
-21-
ونحن السورْ
ونحن الحُورْ ،
ونحن بناتنا محروساتْ
ونحن وِلادنا ضُلالاتْ
ونحن أُماتنا ياهِنْ ..ديلْ ،
وجِيب ورينى زيىِّ منو ،
وتقول لِى شنو
وتقول لِى منو ،
-22-
ونحن فَزَعْ
ونحن وجَعْ
ونحن اليُمه ..واليَابَا
ونحن أريتو بالتَابَه ،
ونحن – يمين – إذا حَرّتْ ،
نخلى الواطه ..رُقَابه ،
-23-
تقولى لِى شنو
وتقولى لِى منو ،
-24-
ونحن زَغَاوه والعطرونْ
ونحن الدُونَا ..مافيشُ دونُ
ونحن وِلاد مَلك خِرتيتْ
وسَابَ الجرْ
وحجَر السِكه ،
والتاكا ،
وسيّدنا الفى الجبل ..دَاكَا
ونحن – يمين – نضِمنا كُتُرْ
وشيَتنا كُتُرْ
وأسعَل ناس كَرن والطُورْ ،
وأسعَل كَررى .. والعَتْمُورْ
وأسعل – يا جنَاَ – الخرتُومْ ،
وشوف كيفن زعلنا كُتُرْ ،
وشوف كيفن فرحنا كُتُرْ ،
أنحنا الـ للرجال خُوسَه ،
ونحن –يمين – جِنَات موسى ،
-25-
تقولى لِى شنو
وتقول لِى منو ،
-26-
ونحن الدوكه
والضُلاله ، والدونكه ،
ونحن الدانقه ،
والراكوبه ، والواطه ،
ونحن الفَكَه
والشِبكَه
ونحن الحجزه .. والعكَه ،
ونحن الجُودْ ،
ونحن أسودْ ،
ونحن النَانْ ،
حديثنا إذا أرِدتو رُطَانْ
وحين دايرين ..نسوى بَيَانْ ،
-27-
تقول لِى شنو
وتقول لِى منو ،
-28-
ونحن الخَلوهَ والدايره ،
ونحن تَكيه العايره ،
ونحن الضُّلْ ،
ونحن الكُلْ ،
ونحن سبيل غريب الليلْ ،
ونحن صباح مسافر الليلْ ،
ونحن فَنَاجرةَ الدّنيا ،
ونحن حَبَابْ
حديثنا حَبَابْ
تعال شَرِف .. وشوفنى منو ،
وتقولِى شنو ،
وتقولِى منو ،
-29-
أقيف لِسَعْ
وأقيف وأسمعْ ،
ونحن صديرى منضوم ويلْ
ونحن القَرمصيص ..بلحيلْ ،
ونحن التوبْ
ونحن الووبْ
وناس حبوبْ
وناس حَرّمْ
ونحن إذا رأينا كبيرْ
نقيف طولنا ..ونقولْ لُه ..حَبَابْ
ونديه البُكَان ..ترحابْ
ونحن. اليَانَا ديل .. يا زولْ
وتسعلنى .. وتقول لِى منو
وتقولِى شنو ،
-30-
أقيف لسعْ
وأقيف .. وأسمعْ
ونحن التَايَهْ
والاندايَهْ
والزِريعهْ
والعيزومهْ
واتفضلْ ،
ونحن الرايَه مرفُوعه
ونحن الكُلفَه مرفُوعه
ونحن حلفتَ ... مدفوعه
-31-
تقول لِى شنو
وتقول لِى منو ،
-32-
وأما عجيبْ
وأما غريبْ ،
وأقيف لسعْ
وأقيف .. وأسمعْ ،
-33-
أنا الكَعَب البسوى الويلْ
وأنا الزول السَمِحْ ..بلحيل ،
وداير ..منَِّهُمْ .. يَاتُو ..،
تقولى لِى شنو
وتقول لِى منو ،

[رهف]

-

دائماً في الزحام

حين يرتطم الوجه بالوجه

والصوت بالصوت....،

يطلع وجهك عاصفةً ...

من خلال الزحام.

فيزرعني في الشوارع ...لُغماً ...

ويغزو يقيني ....

ويدحرني ...

فألوذ الى الصمت .. وهو كلام.

... بأي اللغات ..

أمارس حق التحية

حق الرحيل ....

حق اللجوء إليك ...

وحق السلام.

وكيف يحج اليك المحبون

كيف يجيئون ...

كيف يكونون عند التحية ...

عند السلام.

-2-

أنا مستهام،

عاشقٌ من زمان المحبين ..

ضيّعني العشق ...

ضيّعت عنوانه .. في زحام

زمن الشرك

واليأس ..

والجاهلية ..

والوأد .. والإنقسامْ.

فزمان المحبين ولى

وجاء زمان الفجاجة ..

والنثر ...

والقهر .. والانهزام .

فبأي اللغات – إذن –

يحمل العاشقوك .. تشاويقهم ..

وبأيّ ضروب الكلام.

أمنحيني السلام،

فأنت جميع اللغات..

جميع القصائد ...

ما كان منها ...

وما لم يكن،

وإني لصاحبك المستهام

[رهف]

إنى أجيئك يا بغداد … يا بغداد
خالعاً عن جسدي عروبة الأقوال .. ...
إن عروبة الأفعال
دائماً ... بغداد
إنى أجيئك
واهباً ما كان ... أو سيكون ...
كيما . دائماً
تبقين ست الكون والأمجاد
فيا بغداد ... يا بغداد ... يا بغداد
ظلي لنا .. عاصمة الصمود ...
بل كوني لنا ...
ميسرة الأبطال ...
أو ميمنة الجهاد
إن الذين يخطبون رأس بغداد ..
عليهمو . من قبل.
أن ينكسوا أعلامهم ...
ويعلنوا الحداد
لأن بغداد لنا باقية
لأن بغداد بنا باقية
لأنها عصية
لأنها وصية الأجداد .. للأحفاد!

[رهف]

يا معشرَ الخزرجْ
صِفوا ليَ الحربَ ،
كيف تقاتلون من يبدأُ بالعداءْ
ويستبيحُ مدنَ الأطفالِ والنساءْ .
قال كبيرُهم :
نرميه بالنبِل وبالرماحِ ..
ثم نمشي بالسيوفِ ،
حتى يسقط الأعجلُ منا ..أو من العدو ،
فنحنُ أهلُ حربْ .
-2-
يا معشَر العربْ
(من الخليجِ الثائرِ إلى المحيطِ الهادرِ).
صِفوا ليَ الحربَ ،
كيف تقاتلون مَنْ يبدأُ بالعداءْ
ويستبيحُ مدنَ الأطفالِ والنساءْ .
قال خطيبهُم :-
نُحرضُ الجرائدَ الصفراءْ
ونعرضُ السيوفَ في المذياعِ والتلفازْ
ونُحسنُ القصائدَ العصماءْ
ثم نجلدُ البعضَ ،
فبعضُنا جاسوسْ
وبعضُنا كابوسْ
وبعضُنا ينخُر فيه السُوسْ ،
ثم نمشي بالوعيدِ ..
حتى يسمع الأعجلُ منا .. أو مِن العدوْ ،
فنحن أهلُ نَصْبْ .
-3-
تكلم الماضي ...
فسكت المضارعْ
ولطمتْ خدودَها الشوارعْ
واستغرق العالمُ في المدامعْ.

[رهف]

1-
ليس لي غيَّركِ الآنَّ – سيدتي –
ليس لي مِنْ وطْر
ولا مِنْ مفْر ،
فكلُّ المخارجِ مغلقة’’ في طريقِ السفرْ
وكلُّ المداخلِ موصدة’’ في سبيلِ الإيابْ ،
لا مناص أمامي – إذنْ –
نهض البحر قّدام خيلي..
وعلمها الإنسحابْ.
-2-
فأنتِ جميعُ النساءِ اللواتي
تربعنّ فوق ذرى الأَمكنه
وأنتِ جميعُ النساءِ اللواتي
سيولدن في مُقبلِ الأزمنه
ويمنحنَ شعراً جديداً .. وفكراً ،
ويكتُبْنَنا وطناً أحسنا .
-3-
وأنتِ هجرتي إلى مدائنِ الشعرِ
وصولتي في باحةِ النثرِ ،
وسيفيَ المسلولُ عند حومَةِ الوغى..
وخيليَ المقتحمه
حين تحين لحظةُ المصادمه ،
وأنتِ رحلةُ الإيابْ –
للفارسِ الظافرِ –
سالماً وغَانما
ورابحاً تجارةً وفيره ،
وأنتِ – يا أميره –
تلامسين قلبي مثلما
يلامس السحابُ قُننَ الجباْل
فيهمر المطْر
يسقي الحقولَ والأنهارَ والأطيارَ والوهادْ
فتورقُ الرحمةُ..
ثم يبدأُ الميلادْ.
-4-
سيدتي المتوجة
بالوهِج والدهشةِ والحضورْ ،
سيدتي الموسمه
بالحبِ .. والغبطةِ والسرورْ ،
أعترفُ الآنْ
بأنْ أبقى لديكِ
عاشقاً متوجاً
وفارساً موّسما
تلامسين قلبَه كما يلامس السحابُ قُننَ الجبال ،
فيهمر المطْر
وتطرح الأرض الغلالَ والظلالَ .. والأطفاْل.

[رهف]

1)
لم يَعدْ يعجبنا
شيء هنالكْ
كل مافي بيتنا
صار كذلكْ
(2)
لم نعد نفهم شيئا
ضاقت الأرض علينا
والمسالكْ
كلما قلنا نجونا
ألقتِ الدنيا
مزيداً من مهالكْ
(3)
لست أدري
أين نمضي
لست أدري... فيمَ ذلكْ
(4)
يابلاداً
كل مافيها... هَلوكٌ...
وابن هالكْ
(5)
يابلاداً
كانتِ الدنيا لها بعضَ الممالكْ...
حين كانت أهْلَ ذلكْ
(6)
لم تعودي
غير أرضٍ بين قوسين..
ونهرٍ غير سالكْ
(7)
لم تعودي
غير تذكارٍ من التاريخ..
مرميٍّ.. ومنسيٍّ.. كذلكْ
رغم ذلك...
ماتزالين بلادي... يابلادي
رغم ذلكْ

[رهف]

الفاتحة:
نفتتحُ الآنَ
باسمِ العروبةِ
والقهرِ .. والجاهليه
حفلَ السقوطِ
وحفلَ البكاءِ
وموتِ القضية
ونقرأُ في البدءِ
فاتحةَ الضارعين
على أُّمةٍ عربيه ،
الشهادة:
ها نحن ما بين دجلة والنيلِ
نلقى الأمّرينْ
فها هي بغدادُ
ما بين قوسينْ
وها هي بيروتُ
ما بين نارينْ ،
فيا ربُّ اشهد
بأنّا احتربنا
وكنا شقيقينْ
وكان العدو على البابِ يطرقُ
أو قاب قوسينْ ،
الخروج:
يا وطنَ الشعرِ
والشمسِ
والفتحِ .. والقادسية
يا وطنَ السيفِ
والخيلِ
والفكرِ .. والعبقرية
ويا وطنَ الراحِ
والرّوحِ والرّيحِ .. والأريحيّة ،
ماذا دهاكَ
ومَنْ ذا رماكَ
لعصر من اليأسِ والجاهليه ؟
وكيف كبوتَ
وكانت خيولُك
تختالُ مقدامةً للمنية
وكيف انكفأتَ
وعُفَّر وجهُك
بالقهرِ والحزنِ .. والبربرية ؟
الدخول:
هاهم الآنَ
من كلَّ فاصلةٍ فيكَ يا وطني
يطلعونْ
وهاهم الآنَ
من كلَّ جارحةٍ فيكَ يا وطني
يخرجونْ
بكلِّ المداخلِ – يا سيدي – يدخلونْ
فها هم يُقيمون في طولِ شارعك العربيّ
وهاهم ينامون في عرضِ تاريخك العربّي
وها هم يبيعون رسمَك للسائحِ الأجنبيّ
وهاهم يبولون في حرمِ المسجدِ الأمويّ
وها هم يبيحون كلَّ حفيداتِ بيتِ عليّ ،
وها أنتَ
لم يبق منكَ
سوى اسمك العربّي
الخاتمة:
نختتمُ الآن
باسمِ العروبةِ
والقهرِ .. والجاهلية
حفلَ السقوطِ
وحفلَ البكاءِ
وموتِ القضيه ،
فمدوا مباهجكم
أيها العربُ الأوفياءْ
ارفعوا الكأسَ
فالأرضُ دارتْ
وعدنا إلى زمنِ الهمجية ،
فها هي أيامُنا جاهلية
وها هي راياتُنا فارسيه
وها نحن في آخرِ الأمرِ عدنا
بدون هوية
ودون قضية

[رهف]

عاتبَتْني حبيبتي وأدارت وجهها الحلوَ... ثم فاضت خِصاما
وتهاوى الياسمين من مقلتيها وتداعى... وراح يروي كلاما
كيف - بالله - هانَ عندكَ قلبي كيف صار الهوى لديك اتهاما
وأنا كنت من سمائك شمساً ونخيلاً ونرجساً وخزامى
وأنا كنت فوق رأسكَ تاجاً وأنا كنت للحقول غَماما
كيف- بالله - ياأنيس حياتي- صار حبي الكبير... صار حطاما!
******** ********
(2)
نحن كنا.. ومانزال لأنا نحن من علَّم الغرامَ... الغراما
نحن جئنا به وكان يتيماً وسقيناه نحن عشْق اليتامى
نحن شلناهُ في البلاد رسولاً وبعثناه للعباد... إماما
نحن من أيقظ المشاعرَ في الأر ض... ومن قبلُ... كانت نياما
وسنمضي إلى النهاية إنا نحن من صيَّر الحياةَ.. هُياما
********* ********
(3)
اعذريني إن كنتُ أغلظتُ شوقي فهو شوق المتيَّمين القدامى
أَوَتدرين كيف يعتمل الحب حين تمضي الأيام عاماً.. فعاما
إنه صرخة المشاعر في النا سِ, وصوت المعذبين اليتامى

[رهف]

أُمبارحْ
بى قِليلْ
وكت الليلْ
فَلْفَلْ . . بلحيلْ
. . شُفتَ منامْ
-خير إنْ شَا الله
- خيرْ
شُفتِكْ لا بسة بياضْ . . فى بياضْ
والدنيا دِى . . فوقِك . . زى العاجْ ،
فوق راسِك . . تاجْ
وسيف مسلولْ
والحِنه تزغرتْ فوق ايديكْ
وحريرة
ونور بيضوى عليكْ . .
- خيرْ ان شَا الله ،
- خيرْ
شُفتِك قاعدة . . تقول فوق عرشْ
والعالم كُلو . . بقول .. لبيكْ ،
-2-
وجَنْبِك ميه بتْ فرحانه
- خيرْ إنْ شا الله
- خيرْ
وناسْ
وزحامْ
وكلامْ
وسلامْ
وغناوى . . ونور
وحكاوى . . تدورْ
وشُفتَ كمانْ
واحد فرحانْ
قاعد جَنبْك
- خيرْ انْ شا الله
- خيرْ
أقول زى لا بسْ
نورْ فى نورْ
وبعاين ليكْ . . زى المسحورْ
-خيرْ إنْ شا الله
-خيرْ
وجنبو جماعه ،
كُتَارْ بلحيلْ
نازلين فى الداره ،
تقول الخيلْ
والليل شبالْ ،
والليل تُمْ . . تُمْ
والليل دلوكه ،
غناها . . نَضِمْ .
والليلْ . . يا ليلْ
مجنون . . بلحيلْ .
-3-
خيرْ إنْ شَا الله ،
خيرْ إن شَا الله
- خيرْ

[رهف]

-
لازمْ نقول الحقْ
ما الحقْ ده سُودانى
مولودْ فى جرفَ النيلْ
شاربْ من الجدولْ
ولا بِسْلُو جِبه قُطنْ
ودارعْ صديرى نخيلْ
وتَقْيَان كَما السودانْ
ومارقْ يقولْ .. يا ليلْ
-2-
لازم نقول الحقْ
م الجنسْ سودانى
والأصلْ سودانى
والفصلْ سودانى
يا سلامْ عليكْ يا جَنَا
يا ابنِ سُودانى
-3-
شايل معاكْ البَحَرْ
والنهرِ ... والغابه
وشايلَ خِصالَ الخلا
والخلوه والداره
وشايل السَمحْ شاره
وطالعْ وَسَطْ خُضْرَه
ونازلْ وَسَطْ نُضْرَه
وقادلْ وَسَطْ سُمرَه
والهِمه غَلابه
-4-
لازمْ نقول الحقْ
ما الحق دَه سُودانى
والاصلْ سُودانى
يا سلامْ عليكْ يا جَنا..
يا ابنِ سُودانى

[رهف]

أجيكْ عاشقْ مسافرْ ليلْ
واجيكْ ولداً جَنَبْ بلحيلْ
اجيكْ لا خَاتِراً مكسورْ
ولا فارساً مَهيِضَ الحيْل
أجيكْ سيفاً سنينْ مسلولْ
وراكزْ ضُمه فوقَ الخيلْ
أجيكْ مسدارْ من الدوبايْ
واجيكَ دُعَاشْ وراهُ السيلْ
واجيكْ لا خَاتي ... لا ظالمْ
واجيكْ في القدلة زيَّ النيلْ
واجيكْ يا مُبتَدا التاريخْ
ويا خَبرَ اللِي كانوا قِبيلْ
لأنَكْ ديمة كُنتَ معايْ
مسولتْ بَيْ نهارْ في ليلْ
ودايماً كُنتَ ليّا أصيلّ
ولاكْ بَرَاني .. لانِي عَميلْ
ودايماً كُنتَ بيّا كبيرْ
ولاكْ هَيِّنْ .. ولانِي قليلْ
وأهلَكْ ديله ..هُمْ أَهَلِي
البِشيِلو الشيله فوق الشيلْ
وانتَ أبويْ .. وأنتَ أخويْ
وانتَ الهُولي .. ما هُولْ زولْ
بشوفَكْ هَالي في حلفا
وفي نِمُولي .. وفي توتيلْ
واجيكْ يا موطنَ الحلوينْ
ويا نيلاً ضُلُولُه نخيلْ
عَشَانْ ما زالْ لدينا كلامْ ...
كلاماً كُلُّه زينْ وعديلْ
أجيكْ الليله شَانْ أفديكْ
وشَانْ تَبْقَالنَا ديِمه دليكْ
وشَانْ أديكَ عُمري الفاتْ
وكُلَّ الجايي .. جيلْ في جيلْ
عَشَانْ أشقي
وعَشَانْ تلقي
وعَشَانْ تَبْقَالنَا ديِمة جميلْ !

[رهف]

1-
كنتَ قايلِك لىْ ضَهَرْ أركزْ عليهُ
وكنتَ قايلك لىْ صَدُر أهجعْ اليهُ
وكنتَ قايلكِ حُبْ كبيرْ ..
دقيتَ صدرى أباهى بيهُ
ورُحتَ أقدل فى البلدْ
وأدوبى ليكى .. أنِمّ ليهُ
وكنتَ قايلك لى زمنْ لِسَعْ...
وقايلِك جايه بيه
وفيه أطفالْ .. فيه أشعارْ
فيه خيرْ وسلامْ .. وفيه
وفيه سُودانا البنحلم بيه
والدايماً نكاتل نِحن ليه
-2-
كنتَ قايلْ ما فى بعدكِ
تانى زولاً أشتهيهُ
ولا جمالاً غير جمالِك
فى بلدنا نفيستى فيه
ولا وطنْ غيرك سَكَنْ
يدينى .. ما تدينى ليه
وجيتْ برايا إلى ضَراكِ
إتضارى من أحزانى بيه
مُحبْ مُطاردْ من بلاده
والعجيبه بلادهُ فيه
خافقه فى كُلْ نبضة ليه
وشايله أمطارْ فى عينيه
-3-
جيتَ قايلِك لىْ ضَرايه
ولىْ صَدُر يهجعْ معايا
وكنتَ شايلِك لىْ تميمه
وكنتَ كاتبِك لىْ محايه
ولما جات الحارة دايره
ودارتْ الأيامْ عليّا
لقيتكْ إنتِ غريبة عنى ...
وواقفه فى جانبْ عِدايا
كأنه يومْ ما كنتِ ليّا
وكنتَ ليكى هدفْ وغايه
كنت قايلِكْ لى برايا ...
وفى النهاية .. بقيتْ برايا !

[رهف]

مسافره خلاسْ !
ونحنَ الدوبنا
يا دوبْ جينا
شايلينْ فى العُيونْ أمطارْ
وجايينْ
من ليالى الشوقْ
ودايرِنكْ تكونى نهارْ
وجيناكْ
قُلنا نبقى سَوا
ونكون للحبْ أهلْ وديارْ
وجيناكْ
شانْ تكونْ ريدتنا
للعُشَاقْ وطنْ ومزارْ
عشَانْ الدنيا
تبقى حديقه
من أطفالْ .. ومنْ أطيارْ
تقومى تسافرى !
شِنْ يَبْقَالنَا
مِنْ بَعْدِكْ
وشِنْ يَبْقَالنَا من أشعارْ !
-2-
مسافره خلاسْ !
ولكينْ كيفْ
مُنو البِكرِمْ
مَعَايا الضيفْ
مُنو البِرْكِزْ
معاىْ فى الحاره
فوق القيفْ
مُنو البتحدى فى تَالاَيا
بردَ الليلْ
وحرَ الصيفْ
مُنو السَّوانى
أبقى جميلْ
بَعَدْ ما كتَ زىَّ الطيفْ
بحبِكْ
أيوه يا حليوه
لأنكْ لىْ دُعاشْ وخريفْ
لأنكْ
لىْ وَطنْ جايى
من التاريخْ ... بحدَّ السيفْ

[رهف]

يا سودانية يا اعظم ناس
علمتوا الدنيا وشلتوا الكاس
ما انتو قبيل ختيتوا الساس
بقيتو اساس
للدنيا وراس
وبقيتو الناس
ما انتو قبيل في الزمن الاول
قمتو بنيتوا الهرم الاول
وكنتو اسياد الفكر الاول
والتاريخ البدا في البركل
شال افكاركم وبحر وقبل
نورتو الماضي وشرفتونا
واهلا بيكم في المستقبل
كل الناس فيكم اتلاقو بالاحضان
وبقيتو لكل الناس عنوان
ومن وحدتكم
ومن عزتكم
ومن احلامكم.. جا السودان
وياما شقيتو
وياما حفيتو
عشانه.. زمان
وياما سال الدم.. ازمان
وياما استشهدوا ناس علشان
يبقي السودان
فابقو عشرة علي السودان
واوعو يرجع تاني دخيل
واوعو يطلع تاني عميل
يهين الشعب الاصلو جميل

[مامون مهنا]

بسم الله ماشاء الله ,,,
رهف يديكم العافية جهد كبير وهو يعد كنز ثمين تفخر به منتديات كومى افيضى علينا وابل جمال الحروف علنا نرتشف عذب المعانى .

[رهف]

بسم الله ماشاء الله ,,,
رهف يديكم العافية جهد كبير وهو يعد كنز ثمين تفخر به منتديات كومى افيضى علينا وابل جمال الحروف علنا نرتشف عذب المعانى .

دوذنت لنا بيراعك ...... تلك الكلمات الجملية ...... فلك منى كل الود ......... كل الجمال