مشاهدة النسخة كاملة : مكتبة الاستاذ محجوب شريف
الاستاذ محجوب شريف
عشرة مقاطع للحياة
( 1 )
غطى الجبال الليل
لكن هدير السيل
لكن صهيل الخيل
نار الغضب والجوع
تحت الجبل مسموع
يضووا عز الليل
( 2 )
والموج شديد الظلام
غطى الشهيد الهمام
لكن دماهو بتقيد
لكن طريقو المجيد
ابداً شديد الزحام
رايات ترفرف غمام
ينزل رزاز النشيد
والنجمة تلمع هناك
رغم المكان البعيد
( 3 )
والنهر عبر السنين
يزحف بعنف وبلين
في الليل بيلمع يبين
فارس بسيفو السنين
يحمينا حضنو الامين
نطلع بكتفوا الشمال
ننزل بكتفوا اليمين
لكنو مين يقدر يقول
أنا سيدو مين
( 4 )
في منحنى الدرب الطويل
الحبة تفلت من جراب
عابر سبيل مسكين هزيل
عطشان يموت في السكة
ما يتم الرحيل
تكبر تشيل تلبس جميل
تصبح مقيل عابر سبيل
( 5 )
عصفورة من أخر بلاد
في رحلة لي أخر بلاد
تعرف مواعيد الحصاد
وكل دورات الفصول
وأنضر ايام الحقول
وتعادي أسراب الجراد
وتنادي لوكركب زناد
صياد على العش والولاد
( 6 )
أنسانة ابسط ما يقال
لو صاح
اعز من النساوين الرجال
أنثى ولا دستة رجال
تمشي وما بتطأطي
ما بين بير وشاطي
تطلع عالي واطي
نهارها مع السواقي
وليلها مع الطواقي
وعمرها للجهال
( 7 )
والنملة في الصف العجيب
وعلى انفراد
نفس النشاط والأنضباط
نفس الحماس
تسعى وتجيب ولا من رقيب
ولا حتي في الأمر التباس
ولا في اختلاس
أحسن كتير من بعض ناس
ولا في اختلاس
وهيلا .. وهيلا هيلا .. هيلا
تلقى تفسها في سفينة
وهيلا .. وهيلا هيلا .. هيلا
تاني في شارع مدينة
والحكمة بنفس الحماس
تلقاها في الصف العجيب
كم مرة تهرب من مداس
من طفل عابث ومن لهيب
بالحبة تمسك في عناد
الحبة ملك الاتحاد
( 8 )
والحكمة في مر السحاب
والعلاقة البينو ما بين الجذور
واللسة في الباطن بذور
وغنا الطيور
والمعركة الدارت تصلصل
بسيوفها وبالحراب
والعلاقة البينو بين الغابة والهبابة
والربابة والمنديل
ومجرى النيل وضلفة باب
وبكية طفلة في الكتّاب
تفتش عن قلم رصاص
وقع في الباص
وحس رصاص هدر في ناحية
فيها العيش حكر للجيش
بتاكل من زمن مافيش
وتشرب من زمن مافيش
وكان اضراب
( 9 )
والشمس تطلع يبين
ادق ما في الجبال
تبدأ الموانئ العظيمة الهدور
وتصحى المصانه بيهمة وتدور
ووتملأ الشوارع وكل الجسور
وتشفى الصدور
جموع الشغيله خطاها ثقيلة
تخلى القصور تحس بالفتور
وحمى الزوال
( 10 )
تصحى المدينة
تقوم تستحم وتولع سيجارة
تدخن تسخن بشاى الصباح
وحق الملاح وسيد الجزارة
وتقعد تدندن تخيط زرارة
ترتق هدوما وتفتق هموما
وتسب الحكومة وتفن الريال
وتنفض سريعاً غبار النعال
وتنزل تواجه مشاكل عويصه
تشرّط قميصا وتدق العيال
ليه العيال يعيش النضال
يخلى الحكومة تدخن تسخن
بنار الكفاح
وتقعد تطنطن لحدي الصباح
بتطلع بتطلع حزينة وكتومة
تشرّط هدوما وتحش المصحة
يعيش الأصح يعيش النضال
وضروري النضال
مريم ومى بنياتي وحشتنى ولعبتن بى
تحياتى ..
تصحووا امامى اشواقاّ تهز النبض وتتاقى
عميقاُ من شعاب النور الاقى الذكرى بتاتى
سلاماً يا حماماتى اسكنن فى مسامتى
سلاماً يا غماماتى البتدني ابتساماتى
مريم ومى بنياتي وحشتنى ولعبتن بى..
**
يسافر قلبى صوتي يرن يسابق الريح
قلب (الوالد) انت صحيح تحن وتهم
حذاراك من الجواك وحذراك من جرى التبريح
حتهرب منه جلدك وين ويوماً ما حتسكت تم
واخط رأسى وافارق دنيتى وناسى
واخلى وراي كراسى
وما أسود سطر بالشين
وما تعود اساك العين
وما تشمت عدوي فينى
مريم ومى بنياتي وحشتنى ولعبتن بى
***
طريق الشعب اوسع من زحام الطين
وقلب الشعب ارحب من رحاب الضو
ونبض الشعب كلو حلم بداه بيتم
وتطلع من شقوق الارض آلاف المدن قامات
ويطلع حتى من قلب الحجر والصى
شجر متشابك الهامات
وجيل جاى حلو الشهد
صبايا وفتية يمرحوا فى صباح الغد
عيونهم برقهن لماح سؤالهم رد
خفاف ولطاف وثابين أوان الجد
دفاعا عن حياض السلم والافصاح
سلموا لى عليهم
سلموا لى عليهم جملة
حتى اللسه قبل الخلق والتكوين
صناع الحياة اليوماتى ملح الارض
نبض الشعر والموسيقى والتلوين
هدامين قلاع الخوف
كانت هذه الدراجة يوماً ما كلاشنكوف
مابين منارات السمع والشوف
نقاشين فى جدار الصمت
نساجين خيوط الشمس كهربجيةالظلمات
واجمل ما تكون الدنيا
رسامين حفاريين مجارى العصر
نصرا نصر حروفاً واحلالى تشمهن ترتاح
ح حرية ت تغيير ت تعليم ك كتاب م مسمار
ح حرية ت تغيير ت تعليم ج جراح
سكة حديد تهز وترز
ب بحارة بحراُ عب وثار
وطن مدرار جرت تتلاحق الانهار
كما تتلاحق الاعراف
كما تتمازج الالوان
كما تتصافح الاديان
كما تتمازج الالوان
هجيناً من سلالات الفخار والعز
مرور النسمة وايضاً هبة الاعصار
علم فى نشرة الاخبار
وهيبة على امتداد الكون
علماً فى حماه الوردة حتى الزهرة والمريخ
شبه حرب النجوم انزاح
ايادى القهر خلف الظهر مكتوفين
افاعى السحت حيث مزابل التاريخ
***
سلموا لى عليهم جملة
حتى اللسة قبل الخلق والتكوين
بشوفهم كلهم أسه
عصافيراً ترك جنبى
نوافيراً ترش قلبى
حماماتى بتشرب حسه من ايدى
مريم ومى بنياتي سمعتن صوتى جيتن هى
مريم ومى بنياتي سمعتن حسى جيتن هى
طلعتن من زوايا السجن كاللبلاب
وبين السنكى والترباس وبالرقراق وحلق الباب
وعبر السور زى النجمة والعصفور
تجرن جدولاً رقاق
من حبل العشم فتلات
ومن حقل الوطن شتلات
امكن الفى قلب جيتن لى
من تيابها شراع
ومنديلأ خيوطو شعاع
وكراسا مسطر بالضحى اللماع
وخط ايدا وشعورا الحي
وقالت لى قالت لى وقالت لى
سلاماً ياابو مريم ومى
ثباتك شعلة فى ايدى
بنياتك خلي راسن فوق
وحاشاك الكلام النى
وحاتك ما انكسرنه وراك
ولابد أن يعود الحى
وفجراً كالكرِب حيبين
وشعب تترب حيقوم
ويملا شوارع الخرطوم
وتجري مدامع الحلال
تجر النم تسوى القوق
فوق فوق سودانا فوق سودانا فوق
***
بدل شاهيك اشرب دم اذا قلت الكلام النى
وانا الما عندى ليهن شىء
لا فى البنك ولا فى الدين سوى الكلمة الما بتنداس
ولا بصبح مكانا الرف ولا عصفورة جوه الكف
ولا صقراً يحلق فوق وينزل كف
نبض الشعب اجمل من بريق الماس
واجمل من حليب الستره ما حبيت مشارب كاس
و القمرية بين اغصانا اشرف من موائد ناس
واقرب للوطن من ناس
وخيراً جانا ما عم البلد وسواس
أذن فلتقرع الاجراس
مريم حضرى الكراس
مريم ومى تعالن جاى نغنى لاخر المشوار
نغنى لاخر الانفاس
نغنى لاخر المشوار
نغنى لاخر الانفاس
مريم ومى بنياتي وحشتنى ولعبتن بى
تحياتى ..
تصحووا امامى اشواقاّ تهز النبض وتتاقى
عميقاُ من شعاب النور الاقى الذكرى بتاتى
سلاماً يا حماماتى اسكنن فى مسامتى
سلاماً يا غماماتى البتدني ابتساماتى
مريم ومى بنياتي وحشتنى ولعبتن بى..
**
يسافر قلبى صوتي يرن يسابق الريح
قلب (الوالد) انت صحيح تحن وتهم
حذاراك من الجواك وحذراك من جرى التبريح
حتهرب منه جلدك وين ويوماً ما حتسكت تم
واخط رأسى وافارق دنيتى وناسى
واخلى وراي كراسى
وما أسود سطر بالشين
وما تعود اساك العين
وما تشمت عدوي فينى
مريم ومى بنياتي وحشتنى ولعبتن بى
***
طريق الشعب اوسع من زحام الطين
وقلب الشعب ارحب من رحاب الضو
ونبض الشعب كلو حلم بداه بيتم
وتطلع من شقوق الارض آلاف المدن قامات
ويطلع حتى من قلب الحجر والصى
شجر متشابك الهامات
وجيل جاى حلو الشهد
صبايا وفتية يمرحوا فى صباح الغد
عيونهم برقهن لماح سؤالهم رد
خفاف ولطاف وثابين أوان الجد
دفاعا عن حياض السلم والافصاح
سلموا لى عليهم
سلموا لى عليهم جملة
حتى اللسه قبل الخلق والتكوين
صناع الحياة اليوماتى ملح الارض
نبض الشعر والموسيقى والتلوين
هدامين قلاع الخوف
كانت هذه الدراجة يوماً ما كلاشنكوف
مابين منارات السمع والشوف
نقاشين فى جدار الصمت
نساجين خيوط الشمس كهربجيةالظلمات
واجمل ما تكون الدنيا
رسامين حفاريين مجارى العصر
نصرا نصر حروفاً واحلالى تشمهن ترتاح
ح حرية ت تغيير ت تعليم ك كتاب م مسمار
ح حرية ت تغيير ت تعليم ج جراح
سكة حديد تهز وترز
ب بحارة بحراُ عب وثار
وطن مدرار جرت تتلاحق الانهار
كما تتلاحق الاعراف
كما تتمازج الالوان
كما تتصافح الاديان
كما تتمازج الالوان
هجيناً من سلالات الفخار والعز
مرور النسمة وايضاً هبة الاعصار
علم فى نشرة الاخبار
وهيبة على امتداد الكون
علماً فى حماه الوردة حتى الزهرة والمريخ
شبه حرب النجوم انزاح
ايادى القهر خلف الظهر مكتوفين
افاعى السحت حيث مزابل التاريخ
***
سلموا لى عليهم جملة
حتى اللسة قبل الخلق والتكوين
بشوفهم كلهم أسه
عصافيراً ترك جنبى
نوافيراً ترش قلبى
حماماتى بتشرب حسه من ايدى
مريم ومى بنياتي سمعتن صوتى جيتن هى
مريم ومى بنياتي سمعتن حسى جيتن هى
طلعتن من زوايا السجن كاللبلاب
وبين السنكى والترباس وبالرقراق وحلق الباب
وعبر السور زى النجمة والعصفور
تجرن جدولاً رقاق
من حبل العشم فتلات
ومن حقل الوطن شتلات
امكن الفى قلب جيتن لى
من تيابها شراع
ومنديلأ خيوطو شعاع
وكراسا مسطر بالضحى اللماع
وخط ايدا وشعورا الحي
وقالت لى قالت لى وقالت لى
سلاماً ياابو مريم ومى
ثباتك شعلة فى ايدى
بنياتك خلي راسن فوق
وحاشاك الكلام النى
وحاتك ما انكسرنه وراك
ولابد أن يعود الحى
وفجراً كالكرِب حيبين
وشعب تترب حيقوم
ويملا شوارع الخرطوم
وتجري مدامع الحلال
تجر النم تسوى القوق
فوق فوق سودانا فوق سودانا فوق
***
بدل شاهيك اشرب دم اذا قلت الكلام النى
وانا الما عندى ليهن شىء
لا فى البنك ولا فى الدين سوى الكلمة الما بتنداس
ولا بصبح مكانا الرف ولا عصفورة جوه الكف
ولا صقراً يحلق فوق وينزل كف
نبض الشعب اجمل من بريق الماس
واجمل من حليب الستره ما حبيت مشارب كاس
و القمرية بين اغصانا اشرف من موائد ناس
واقرب للوطن من ناس
وخيراً جانا ما عم البلد وسواس
أذن فلتقرع الاجراس
مريم حضرى الكراس
مريم ومى تعالن جاى نغنى لاخر المشوار
نغنى لاخر الانفاس
نغنى لاخر المشوار
نغنى لاخر الانفاس
انسان
الاسم الكامل.....انسان
الشعب الطيب والدى
الحزب حبيبى وشريانى
ادانى بطاقة شخصية
من غيرو الدنيا وقبالو
قدامى جزائر وهمية
لا لون لا طعم ولا ريحة
وايام مطفية مصابيحا
زى نجمة بعيدة ومنسية
المهنة بناضل بتعلم
تلميذ فى مدرسة الشعب
المدرسة فاتحة على الشارع
والشارع فاتح فى القلب
والقلب مساكن شعبية
ودينى محل ماتودينى
شرد اخوانى واخواتى
فتش اصحابى وجيرانى
ارمينى فى سجنكوزانسانى
ارمينى وكتف ايدى
علشان مستقبل انسانى
من اجل الناس الطيبين
وعشان اطفالنا الجايين
والطالع ماشى الوردية
وحياة الشعب السودانى
فى وش المدفع تلقانى
قدام السونكى حاتلقانى
وانا بهتف تحت السكين
الثورة طريقى وشريانى
وايامى معدودة....
وتحيا الحرية
أشــــــوفـك
أشوفك جنبى..واتمّناك
واكذّب عينى إنى أراك
أصدق كيف بتحكى الشوق
وليل الغربه..لى مضناك
لى أنا..اللى بحلم بيك
ولى أنا..اللى بترجاك
يا حلمى البعيد..وعزيز
زمان يا حلمى مأ أقصاك
أعِد أيامى.. وأحسب بيك
ثوانى العمر ..واستناك
وما فكّرت يوم أنساك
ولو فكّرت كيف انساك؟
وذكراك يا أعزّ حبيب
دوام رغم الزمن ذكراك
انتَ الليله..جنبى قريب
بأىِّ مشاعر..أتلقّاك؟
وين أعصاب بتتحمل..
وين أحرف بِقَدْر هواك؟
عشة...كلمينا
ميري...زكرينا
كل سنكي احسن يبقي مسطرينا
نحنا شعب اسطي
يلا جيبو مونا
نبني ..نبني..نبني
مسرحا ...ونادي
مصنعا وبوستة
حرب لالالا
كبري استبالة
صالة للثقافة
تسرح الغزالة
جنبها ...الزرافة
رك قمري طار
قيرة ..قيرة..قيرة
نطط الصغار
صفق الترولي
طمن القطار
حلقت وحلقت حمامة المطار
كل طلقة بينا نحن تبقي وفرة
سمسما وبفرة
سكرا وشاى
جاى..جاى..جاى
مافي حاجة ساى
كل عندو دين والكل عندو راي
بور وبور سودان
بارا والجنينة
عبري ولا واو
حاجة مش كويسة
كل زول براو
هي سودان بكرة من سودانا ناو
تكتب انت تقرأ
تعرف السياسة
في محل حراسة
حجرة الدراسة
تمشي انت تلقي
في الضلمة لمبة
الف ضحكة حلوة ...تسندك بي جنبة
بي تمن طبنجة احسن الكمنجة
احلي شكل منقة...احسن الحليب
ايد...وايد..وايد
تزرع الجديد
غابة النشيد
ايد...وايد...وايد
مافي بينا سيد
ايد.وايد..وايد نلحق البعيد
نحنا مش مرقنا
حتة واحدةجينا
جينا للسرقنا
حقنا وغصبنا
دمنا وعرقنا
ولعووووووووو الرتينة
وكل سنكي احسن يبقي مسطرينا
حنبنيهو ..
البنحلم بيهو يوماتى
وطن شامخ
وطن عاتى
وطن خيّر ديمقراطى
وطن مالك زمام أمرو
ومتوهج لهب جمرو
وطن غالى
نجومو تلالى فى العالى
إراده
سياده
حريّه
مكان الفرد تتقدم..
قيادتنا الجماعيّه
مكان السجنِ مستشفى
مكان المنفى كليّه
مكان الأسري..
ورديّه
مكان الحسره أغنيّه
مكان الطلقه
عصفوره
تحلق حول نافوره
تمازج شُفّع الروضه
حنبنيهو
البنحلم بيهو يوماتى
وطن للسلم أجنحتو
ضدّ الحرب أسلحتو
عدد مافوق ما تحتو
مدد للأرض محتله
سند للإيدو ملويّه
حنبنيهو..
البنحلم بيهو يوماتى
وطن حدّادى مدّادى
ما بنبنيهو فرّادى
ولا بالضجه فى الرادى
ولا الخطب الحماسيّه
وطن بالفيهو نتساوى
نحلم..
نقرا
نتداوى
مساكن
كهربا ومويه..
تحتنا الظلمه تتهاوى
نختّ الفجرِ طاقيّه
وتطلع شمس مقهوره
بخط الشعب ممهوره
تخلي الدنيا مبهوره
إراده
وحده شعبيّه
غنى ياخرطوم غنى
شدى أوتار المغنى
ضوى من جبهة شهيدك
أمسياتك واطمئنى
نحنا منك ريح وهبت
نار وشبت
فى وجوه الخانو اسمك ياجميلة
ونحن ياست الحبايب من ثمارك
فى دروب الليل نهارك
وقبل مايطول انتظارك
نحن جينا
وديل أنحنا القالو متنا
وقالوا للناس انتهينا
جينا زى ما كنا حضنك... يحتوينا
لما فارسك فينا هبَّ
وعبَّ حجرك بالمحبة وبالأماني
صحى نار الثورة تاني وجانا داخل
زي شعاع الشمس من كل المداخل
وهز بالمنشور وبشر
ياما فرهد فى عيونك غصن أخضر
وفرحة أكبر من شجونك
والسلاسل يا جميلة
يوم ما كان ميلاد شهيدك
يلا غني ولاقي عيدك
ولى ثمارك لقي ايديك
جيل مكافح حلَّ قيدك
فى غضبنا الحر ولافح
وياما باكر وفى زنازين العساكر
نبني مجدك ومهرجانك
وكل قطرة دم عشانك
ولى جديدك يا جميلة
يا اللي بتسمع والما بتسمع
لازم تفتح اضانك وتسمع
صوت الشارع لمن يدوي
كل قلاع الخونة بتهوي
وكل جباه الكهنة بتركع
وشمس الحق السرقو شعاعها
بكرة بامر الشعب بتطلع
ياللي بتسمع
والما بتسمع
نحن اسودا ما بتدجن
ونحن سدودا ما بتهدن
ونحن جبلا ما بتصدع
لملم ناسك ولحمة راسك
وارفع ايدك عننا ارفع
يا اللي بتسمع
والما بتسمع
لو بي بنادقك ما بترهبنا
ولو بى خنادقك ما بترعبنا
*****
والتاريخ يا جاهل بيشهد
والايام لسع بيناتنا
وكل الحق الضايع بيرجع
يا اللي بتسمع
والما بتسمع
اسأل كل العسكر قبلك
وكل الحاول فكر متلك
الاستأسد والاتنمر
مهما استعلا ومهما استكبر
برضو في يوم الغضبة بيهلك
وبيلقى مصيرو نفس المصرع
واننا أمة عظية اصيلة
لينا خصايص ما في مثيلها
وفينا طباع بالفطرة نبيلة
والاسلام ما جانا الليلة
ولا اخلاقو علينا دخيلة
الايمان من بدري سبيلنا
والقرآن في الصدر دليلنا
انقى وارقى واسمى وارفع
يا اللي بتسمع
والما بتسمع
نحكي ليك لو كان ما بتعرف
حاجة بسيطة بس عن ماضينا
انحنا رضعنا الثورة رضاعة
وبالوطنية انحنا ربينا
التدجيل ما بنفع فينا
والتضليل ما بيمشي علينا
انحنا عبرنا السكة مشينا
وشفنا عدونا وشفنا صفينا
وما بنهاب لا سيخ لا مدفع
يا اللي بتسمع
والما بتسمع
الانقاذ ما بالدبابة
ولا احلام شايلاها سحابة
ولا اوهام عالم كضابة
ولا ارقام خاوية وخلابة
والاصلاح ما جربندية
الاصلاح ما بالزندية
الاصلاح عدل وحرية
الاصلاح موضوع وقضية
الاصلاح عزقة وطورية
نحن بنفكر بتاريخنا
يا اللي بتسمع
والما بتسمع
نحن اولاد الوطن الواحد
متسامحين من يوم ما قمنا
عشنا حبايب ولسه حبايب
ما اتخاصمنا ولا اتصادقنا
فينا مساجد بتهليلها
وفينا كنايس بي انجيلها
وفينا معابد يسرج ليلها
ربنا واحد وشعبنا واحد
وحبنا واحد ودربنا واحد
يا اللي بتسمع
والما بتسمع
دايرين نختم نحن كلامنا
ودايرين نحسن نحن ختامنا
للاحرار نديها تحية
وللثوار تعظيم وسلام
نحن الفوق الشمس مقامنا
ونحن جبين الثمسر مرامنا
ونحن وقود الحارة ونارها
ونحن منية الباغي سهامها
الا ارادة المولى ارادت
حكمت فينا وفي حكامنا
بعد ما ازهري كان هو زعيمنا
بعد المهدي الصلى امامنا
بعده الغرد الضوو جبينا
بعد الدرر الزانو زمانا
جات البقرة عشان تحكمنا
وام رخم الله مشت قدامنا
جل جلالة الملك الواحد
يأتي وينزع
ويعطي ويمنع
ويخفض ويوفع
يا اللي بتسمع
والما بتسمع
يومك قرب يا ظالمنا
وبكرة حناخد منك تارنا وما بنرجاهو حساب الآخرة
داكا حصابا من غفارنا
يمكن يصفح ويمكن يسمح
ويمكن يعدك من اشرارنا
الا انحنا حسابنا براهو
يوم الحارة بتوقد نارنا
تحصد كل الداسو حقوقنا
تحرق كل الخربو ديارنا
دايرين نعرف وين شهدانا
دايرين نعرف وين ابرارنا
والشرفا الراحو اوانطة من طلابنا ومن احرارنا
والآلاف الشردتوها من خبراتنا ومن اخيارنا
والمؤتمرات الدبلجتوها من اخوانا ومن اعمارنا
نحن عرفنا البير وغطاها
ونحن خلاص قرارنا
ونحن حنضرب كل العملا
ونحن حنصلب كل الجهلا
نحن حنغبن عصابة القتلة
ومن الباغي حناخد تارنا
وعالية ترفرف راية العزة
وغالية عزيزة حترجع دارنا
ونور الفجر القادم يسطع
يا اللي بتسمع
والما بتسمع
ست البنات إتمالكت اعصابا
بيبانا إتكت...
بكت .. الشبابيك التي
نورا انطفا..
فقدت حنان الهمبريب والإلفة
والشمس البتضحك
وانسياب الدردشة...
نار الكوانين انطفت
الا البتوقد في الحشا..
حق الفطور .. يمه..
العشا...
حق الفطور يمه.. العشا
ما بابى ليكم يا جناي
اصبر كفى...
ادت رضيع الاشهر الاولى
القفا..
ثم انكفت غرقت غرق
في دمعتا ...
عشم العشم نقطة حليباً بسكويتاً
ولا حتى حتة كسره
تسند من مشى ...
ما أهون الدمع الجسور اذا جرى
من عين والدة سعت
بكل ما ملكت يداها وصِحتا..
صِحت هموما الصَحتا ..
مرقت تفتش في الشغل
كم مهنة حامت كاستا..
نكتت شهادات الزمن
ما كان تخلي دراستا ...
رمت اللقيمات الدَغَش
والكِسره قامت عاستا..
كم حاجة عندها باعتا..
كل الاواني بتاعتا..
دبلة زواجا وساعتا ....
ترخص حياتا وكل شي
بس سمعتا .. بس سمعتا ..
يالله ما اطول خميسا وجمعتا ...
احدٌ.. احد
احدٌ.. احد
اليوم يجر التاني
والتالت كما ود الاحد...
احدَ ..احد
احدٌ..احد
حيلا انتهى
حيلا انتهي
حيلا انتهى....
يا منتهى .. الصبر البخلي الستره
غاب قوسين وادنى
من الذي ما بشبها
يابـا مـع السـلامـة يـا سـكـة سـلامـة
فـــي الــحــزن الـمـطـيـر
يـــا كـالـنـخـلـة هــامــة
قــامـــة واسـتـقــامــة
هـيـبـة مـــع الـبـسـاطـة
أصـــدق مـــا يــكــون
راحـة إيـديـك تمـامـاً مـتـل الضفتـيـن
ضـلـك كـم تـرامـى حضـنـاً لليـتـامـى
خـبـزاً لـلـذيـن هــم لا يـمـلـكـون
بنـفـس البسـاطـة والـهـمـس الـحـنـون
ترحل يا حبيبي من باب الحيـاة لبـاب المنـون
روحـك كالحمـامـة بـتـرفـرف هـنـاك
كـم سيـرة وسريـرا مـن حـولـك ضـراك
والـنـاس الـذيـن خـلـيـتـم وراك
وعـيـونـم حـزيـنـة بتـبـلـل ثــراك
أبــواب المـديـنـة بتـسـلـم عـلـيـك
والـشـارع يـتـاوق يتـنـفـس هــواك
يـا حليلـك حليلـك يـا حلـيـل الحـكـاوي
تتونـس كأنـك يـوم مـا كـنـت نـاوي
تجمـع لـم تفـرِّق بـيـن الـنـاس تـسـاوي
نـارك مـا بتـحـرِّق مـا بتـشـد تـلاوي
مـا بتحـب تفـرِّق مـن جيـبـك تـداوي
الحلم الجماعي والعدل اجتماعي والروح السماوي
والــحـــب الـكـبــيــر
فـي الزمـن المكـنـدك والـحـزن الاضـافـي
جينـا نقـول نفـرِّق نـجـي نلـقـاه مـافـي
لا سـافـر مـشـرِّق لافـتـران وغـافـي
ويـن عـمـي البـطـرٍِّق جـواي القـوافـي
يـا كرسيـه وسريـرو هـل مـا زلـت دافـي
يا مرتبتو امكن في مكتبتو قاعد يقرا وزهنو صافي
يـا تلـك الترامـس وينـو الصوتـو هـامـس
كالمُتـرار يساسِـق يمشـي كـمـا الحفـيـف
كم في الذهن عالق ثرثرة المعالق والشاي اللطيف
تصـطـف الكبـابـي أجـمـل مـن صبـايـا
بيـنـات الـروابـي والـضـل الـوريـف
أحـمـر زاهـي بـاهـي يلـفـت إنتبـاهـي
هـل سـكـر زيـادة ام سـكـر خـفـيـف
يـنـده للبـنـيـة يـديـهـا الـحـلاوة
والــخــاطــر يــطــيِّــب
يـدخـل جـنـو مـنـو محـبـوب الشـقـاوة
يـسـتـنــى الـنِـصَـيِّــب
الـدفـو والـنـداوة الـسـنـا والعـبـيـر
كالغـزلان هنـاك فـي الـوادي الخصـيـب
حيـث المويـة عـذبـة والغـصـن الرطـيـب
كـم تحـت المـخـدة أكـتـر مـن مـودة
لـلـجـنــا والــغــريــب
عـش وعشـب أخضـر جـدول مـن حلـيـب
يـابـا أبــوي يـــا يـابــا
الشـمـس البتطـلـع بـلـت مـنـو ريـقـا
والنجمـة البتسطـع فـيـه تـشـوف بريـقـا
النـدى فـي حركـتـو يطفيـهـا الحريـقـة
ننهـل مـن بركـتـو زي شـيـخ الطريـقـة
شاييـهـو وطرقـتـو والايـدي الصـديـقـة
يـلا نسـد فرقتـو حـب الـنـاس درقـتـو
يـا مـوت لـو تركتـو مننـا قـد سرقـتـو
كنـا نـقـول ده وقـتـو!!؟؟ لكـنـك حقيـقـة
النفاجـو فاتـح مـا بـيـن دِيـن ودِيـن
نـفـحـة محـمـديـة دفـئـاً كالـضـريـح
ميضنـة كـم تـلالـي جـيـداً فـي اليـالـي
مـجــداً فـــي الاعــالــي
مــريـــم والـمـســيــح
قلبـاً نبضـو واصـل مـا بيـن جيـل جـيـل
مـا بيـن كـان وحاصـل أو مـا قـد يـكـون
مـا بتـشـوف فـواصـل إلاّ الـذكـريـات
وآلام المفـاصـل بعـضـاً مـن شـجـون
يابـا مـع السـلامـة يـا سـكـة سـلامـة
فـــي الــحــزن الـمـطـيـر
تبتبا تبتبا تبتبا تبتب
باكر تعرف تقرا وتكتب
وياما ترتب
نحنا بنحلم وكم نتمنى
هي تحقق كل ما تحب
تبني حياتا الند بالند
اي مكانة وخانة تسد
هدهدا هدهد
كل الورد ينوم ويفرهد
زي عصفورة تطير وترك
تحبى وتمسك وتاني تفك
سيبا تفكفك
سيبا تلكلك عايزة تنطط
بكرة حترسم وياما تخطط
بكرة حا يبنوا مدائن ضو
ما بيعكر صفو الجو صفارة حرب
تشطب من قاموس الدنيا
الضرب الشك الخوف
ينعموا كم بالشم والشوف واغاني الحب
افتح بابك آمن تب
زي ما النهر بيلقى مصب
اي حمامة بتلقى الحب
تلقى الورده الندى في الكم
تلقى حداها جناها الام
يرضع صافي حليب الحب
نقدل نحنا الجد والعم
تملا عيونا كهارب سد
باباً جاب الهم والزم والصد ينسد
نفرح لما ندمع جد
مد البصر الامل يمتد
العمل يشتد البنا ينتم الغنا يمتد
هدهدا هدهد
اكتبي اكتبي الف المد
حمام وسلام وسعادة بجد
اكتبي اكتبي ياء المد
سرير وعصير وعبير ينشم
اكتبي اكتبي واو المد
حقول وعقول تقرا المجهول كتاب الغد
اكتبي علم وسلم
لا حد يئن لاتسمع بم
لا ينزف دم
لا يعجز رد
لا يعجز طب
لا دمعه في خد
تبتبا تبتبا تبتبا تبتب
أجمل إهداءللسودان هو روح الوطنية رغم اختلاف المذاهب ... فالسودان دماً يجري في عروقنا ... وحب لا يتوقف ابدا . ..
ابو نون
08-Jun-2009, 10:12 PM
بسم الله الرحمن الرحيم اللهم صل على محمد وعلى آله وصحبه أجمعين
نعم ما سقته من روائع الاستاذ
محجوب شريف
وما دبجته من تعليق
ابو عبد الحفيظ
08-Jun-2009, 11:57 PM
رهف ابداع منقطع النظير
اشكرك وانت تثرين صفحات كومي بهذه الدرر للرائع محجوب شريف
بسم الله الرحمن الرحيم اللهم صل على محمد وعلى آله وصحبه أجمعين
نعم ما سقته من روائع الاستاذ
محجوب شريف
وما دبجته من تعليق
الغالي ابو نون
اسعدني مرورك .... اسمتد منك القوة لكي انجح .... شكرا لك
نهى عطا المنان
09-Jun-2009, 12:44 AM
رهف الرووووووووووووووووووووووووووعه تتجلى فى اختيارك للعملاق محجوب شريف وحتى فى اختيارك للقصائد
الف شكر عزيزتى على الاجتهاد والقصائد الجميله
تقبلى تحياتى ومرورى
رهف ابداع منقطع النظير
اشكرك وانت تثرين صفحات كومي بهذه الدرر للرائع محجوب شريف
الغالي ابو عبد الحفيظ
سرورت بك وانت تنزين صفحتي بقلمك ..... بكم دائما اتقدم .... من اجل كومي انتر الدرر وأشكرك على تحريك سفن الشوق والبحث عن الوطن بعدما سكتت رياح البحث والأمل .
ودمت أيها الرائع
رهف الرووووووووووووووووووووووووووعه تتجلى فى اختيارك للعملاق محجوب شريف وحتى فى اختيارك للقصائد
الف شكر عزيزتى على الاجتهاد والقصائد الجميله
تقبلى تحياتى ومرورى
غاليتي نهي عطا
هناك كلمات تنزل علينا لتغمرنا بكلمات أرحب وأجمل ... وتسطر فى دواخلنا عبارات تتهافت
وحبا للوطن وتكريما لهذا الاديب اوثق شعرة .... كوني دائما معي
هيثم عبد اللطيف
09-Jun-2009, 08:47 AM
غطى الجبال الليل
لكن هدير السيل
لكن صهيل الخيل
نار الغضب والجوع
تحت الجبل مسموع
يضووا عز الليل
قمة الروعة والجمال من الاستاذ محجوب شريف الاخت رهف كل التحايا علي هذا الرقي المتدفق
الق المعانى
09-Jun-2009, 09:57 AM
لا حد يئن لاتسمع بم
لا ينزف دم
لا يعجز رد
لا يعجز طب
لا دمعه في خد
روعة واختيار موفق ,, مشكورة المرهفة حقاً رهف
كل المودة اختي
مزاجيه
09-Jun-2009, 10:14 AM
ابــدعتــي فــي الإنتقــآء ..
ألـــف الشكــر والتحــآيــآ لكــي عزيزتــــي ..
وكونــي بـ خيــر دومــــا" ..
أرض الخير
09-Jun-2009, 01:46 PM
تسلمي رهف اختيار جميل وممتاز ...
غطى الجبال الليل
لكن هدير السيل
لكن صهيل الخيل
نار الغضب والجوع
تحت الجبل مسموع
يضووا عز الليل
قمة الروعة والجمال من الاستاذ محجوب شريف الاخت رهف كل التحايا علي هذا الرقي المتدفق
الجمال في خاطرتك يتربع فوق عرش الكلمات
ليداعب الاحساس بشفافية صدق المعاني
واسلوب رائع00
شكرا لمرورك اخي هيثم
لا حد يئن لاتسمع بم
لا ينزف دم
لا يعجز رد
لا يعجز طب
لا دمعه في خد
روعة واختيار موفق ,, مشكورة المرهفة حقاً رهف
كل المودة اختي
الق المعاني
جئت وفي جعبتي الكثير وبدأت الكتابة فخاب الظن بالقلم
ولم أصل الى هامة خاطرتك .... كوني دائما معي
ابــدعتــي فــي الإنتقــآء ..
ألـــف الشكــر والتحــآيــآ لكــي عزيزتــــي ..
وكونــي بـ خيــر دومــــا" ..
مزاجيه
للقمة والابداع مذاق خاص
وها أنا أتذوقهم بين حروفك
سلمت لهذه الروعة
لك جل الإحترام والتقدير
تسلمي رهف اختيار جميل وممتاز ...
ارض الخير
اسعدني حضووووووووورك وتشريفك
والف شكر على كلامك وعلى ردك الراقي
وهذا من ذووووووووووقك المميز
تقديري واحترامي
manda
13-Jun-2009, 11:13 PM
محجوب شريف الرجل الذي عندما ينطق يقطر عسلاً دون أن ينقطع..
وحينما نذكره نجده في قائمة الذين قدم وماذالوا يقدم الكلم الطيب ..
وبما أنه صنع الكثير لشعب السودان وأهله..
وقدم ما قدم من نبع فيض من نهله ..
فإنه رجل المسافات الطويلة وصاحب الأشعار العتيقة ..
وهو من يرسم برشته الكلمات ويعتق ويعطر بها المكان ويكون قد أوصل رسالته ..
وهو الرائع دوماً فينا وابداً..
محجوب شريف .. يرسم نفسه بكلماته .. وحكي كلمماته عن نفس الشعب..
الرائعون دوماً وابداً يخلدون فينا ..
الشكر لك أختي رهب .. والتحية لك يا رائع بحجم هذا التواصل ..
الذي فتح لنا الباب بكل مصراعيه أمام لنرى محجوب شريف بعيون الكلمات..
سلمت يمناك .. وأماط الله عنك كل العقبات..
محجوب شريف الرجل الذي عندما ينطق يقطر عسلاً دون أن ينقطع..
وحينما نذكره نجده في قائمة الذين قدم وماذالوا يقدم الكلم الطيب ..
وبما أنه صنع الكثير لشعب السودان وأهله..
وقدم ما قدم من نبع فيض من نهله ..
فإنه رجل المسافات الطويلة وصاحب الأشعار العتيقة ..
وهو من يرسم برشته الكلمات ويعتق ويعطر بها المكان ويكون قد أوصل رسالته ..
وهو الرائع دوماً فينا وابداً..
محجوب شريف .. يرسم نفسه بكلماته .. وحكي كلمماته عن نفس الشعب..
الرائعون دوماً وابداً يخلدون فينا ..
الشكر لك أختي رهب .. والتحية لك يا رائع بحجم هذا التواصل ..
الذي فتح لنا الباب بكل مصراعيه أمام لنرى محجوب شريف بعيون الكلمات..
سلمت يمناك .. وأماط الله عنك كل العقبات..
بحروف جميله،ومنثوره رائعه
بارك الله فى نزف قلمك
manda
جميل بتواجد كريم
وحضورلكلمات مشاعرها قويه
من احساس دفين
دمت بود
manda
17-Jun-2009, 03:52 AM
سلمت اناملك يا راقية..
لك ملئ الكون ابتاسم ..
مع تمنياتي لك حياة بحجم السعادة..
manda
23-Jul-2009, 06:03 PM
بحث لمحجوب شريف القامة الشامخة..
عن نص ولم اجده .. وتذكرت أن لدينا مكتبة تخصة في كومي ..
وتوجهت اليه .. عبر نافذتكم يا روعة الكلم..
سعدت جداً بأن اجده مرة اخرى بين طيات هذا المنتدى الرائع..
سلمت اناملك رهف ..
محمد بخيت
24-Jul-2009, 05:38 PM
(يوم ماعرفتك اخترت سعيد البال لا جيتك قبيلة ولا رجيتك مال ويوم ماكنت في عينيا اجمل من بنات الحور جيتك عاشق بيتعلم من الايام ومن طعم الليالي البور ..)
الامضاء : محجوب شريف من اغنية السنبلاية للكبير محمد وردي
الرقيقة : رهف عالمها اجتماع عوالم لا تلتقي الا بعد توتر وتلاحم لذا بالفنون وحدها تكون تجبينا من سكون قوتها يملا الماعون مرة ومرتان بالفتون
محمد بخيت
12-Aug-2009, 09:16 PM
لماذا كل هذا التدفق المتجانس عزيزي محجوب شريف رائع انت كما النيل في بلادي رغم السنين انت فينا بكل احلامنا المستباحة.... تحياتي
الله يديني معاك طولة البال
manda
17-Aug-2009, 05:40 AM
بحثت للقامة / محجوب شريف الهامة الشامخة..
عن نص ولم اجده .. وتذكرت أن لدينا مكتبة تخصة في كومي ..
وتوجهت اليه .. عبر نافذتكم يا روعة الكلم..
سعدت جداً بأن اجده مرة اخرى بين طيات هذا المنتدى الرائع..
سلمت اناملك رهف ..
مكرر .. وسيتكرر كروعته ..
سلمت اناملك..
vBulletin® v3.8.4, Copyright ©2000-2012, Jelsoft Enterprises Ltd.