@@@@@@يا هالة خلي باللك منهم@@@@@@@@

[زيكس]

يا هاله من نور يا طعم الهنا
يا دوحة في بيد أيامي أنا
يا بدر ليلي يا عذوبة الدندنة
يا أحلى أيامي أنت يا معنى المنى

يا هالة من نور يا ضوء القمر
يا روح روحي أنت يا طعم المطر
أنت البوادي كلها أنت الحضر
أنت المدينة كلها أنت السمر
لا بدر غيرك في ليل أيامي ظهر
يا هالة من نور يا وحي الحقيقة
أنت يا كل الأماني يا رقيقه
أنت يا كل الأزاهر في الحديقة
أنت يا أحلى ويا أغلى رفيقه..


***************************




قلت ليك كل الكلام
الفي القلب مكتوم زمن
عشت آمالي العراض
ودعت صورتك يا شجن
وبقيتي زادي البشتهي
وجدت في عينيك وطن
وطن الفرح وطن الأمل
عينيك شعت في الدجى
صورتك مطرزه زي وشاح
بتوحشك بدل الحزن
صوتك يمنحني الأمان
تتردد أنغامو وترن
أنا في إنتظار ريدك دوام
يداوي ليَ جرح المحن

تغازلي ضفائر الأطفال
ويطلع من جبينك نور
ينوَر سكة الأطفال
وأشتل في مشاتل الريد
مساحات للفرح والفال
وأحصد من غصونها ثمار
بدونك كان حصادها محال

تظهري ليَ وتحكي ليَ
عن الحب البقالو زمان
مكتم في قليب رياد معاهو حنان
وأحكي ليك عن الريده البقت قصه وحقيقة كمان
أشيل عينيك وأرحل
لبلد فيها البريدو حُنان

وعدتك إني ما بنساك
محال يا سمحه يلقى
قليبي راحه بلاك
أفوت عينيك أقبَل وين
محال تعشق عيوني سواك
بس يا حلوه ما تنسي
وعودك لي عشان
يا ريدتي ما أنساك..


*************************



بتخيلك

بتخيلك حزمة فرح ..
جاييين نقاسمك فرحتك ..
و بتخيلك غيمة في هجير
بتظلل الغني و الفقير
و تلملمي الأمل المشتت
في القلوب بي بسمتك ..
و بتخيلك ريحة دعاش
و مطر رشاش ..
في الحر نسيم ..
اسقينا بس من بهجتك ..
بتخيلك أطفال صغار
ماشين على درب الفلاح
يتمنو في الرضا و الصلاح
نديهم الحب و الحنان ..من نظرتك ..

************************


زهرة الشجن

في عيون الوردة شفت
رنة الآهة البعيدة.. ولمحة الحزن الطويل
لميت تقاطيع الحروف بندى المحنه الباقية ليَ
ختيتو في قلبي الدليل
يا زهرة الشجن الندية مقطوفة
من بستان فرح.. محرومة من ورد الخميل
لمحت في عينيك سرابات الفرح
فتشت ما لقيت السرور..جديت وأزمعت الرحيل
ورحلت في عيون المآسي..
وقلت يمكن ألقى للآهة البديل
وسبحت في بحر الخيال وأرسيت
مراكب فرحتي.. في شاطئ الدمع الهميل
جيت أقاسمك فرحتي...
إلا وحياتك.. شلت حزنك
بدلتو بالفرح القبيل
ليه تشيلي الفرحه في حضن الحزن
صفي قلبك.. وتبقى ليك البسمه إكليل
أرضى بيه حكم المسافه.. وشيلي
أحكام القدر.. وأرضى بالفرح القليل
نزرع بذور الفرحه في أرض الزهور
ونطرد الحزن العليل
وأملى دنياك بالحنان..وشدي للبسمه المتاع
وأسعى للحب النبيل
وأسأل الله يكون حيالك
تبقي نجمه ساطعة بين كل النجوم
وتبقي زهره نادية
زي كل الزهور
وتبقي قمره.. هانيه
بالليل الجميل..