سودانية الكيان وخليجية اللسان

[سمل ود الولياب]

قرر حاج الماحي أن يضع حداً لسنوات الغربة العجاف ولسان حاله يقول (غربتنا ما هنّتنا يا حلوين، هناك الهمّ بدل واحد يبين همّين وفيها قلوبنا تتأوه ونتاوه سنين وسنين
مصيره الحى يلاقى حبايبه لو صادقين سماع أهلاًَ من الاحباب شروق أمال
ووصف البهجة بالكلمات محال يتقال حلاوة العودة غنيناها فى موال "
فعاد إلى الديار نهائياً بمعية أفراد أسرته وأقام في بيته الخاص الكائن في الحاج يوسف وجلب والدته من البلد لكي تعيش معهم في الضواحي طرف المدائن.
وسرعان ما تأقلم أفراد أسرته مع أجواء السودان والخرطوم والغبار والمطر ونسوا أو تناسوا التكييف والراحات الأخرى ولكن المعضلة كانت في لسان الإبنة الصغرى سهى التي كانت تتحدث اللهجة الخليجية بطلاقة منقطعة النظير وكأنها من حسناوات نجد وتهامة وسليلة قبيلة قحطان والشمري والعنزي وسائر قبائل البادية السعودية
أما والدتها وإخوتها كن قد تعودن على كلامها منذ أن كانوا بحي الغبيرة بالرياض ولكن جدتها المسكينة التي لم تبرح السودان قط في حياتها واجهت صعوبات جمة لفهم وإستيعاب كلامها الأعوج.
وذات صبيحة من صباحات الحاج يوسف الندية فرشت الحاجة سكينة - جدة الطفلة سهى من أبوها – حصيراً في وسط الحوش ووضعت طبقاً مليئاً من حبات القمح وإنهمكت في فرزها وتنظيفها من الشوائب العالقة وهي تدندن بأغاني قديمة وفجأة خرجت إليها البنت سهى وهي في طريقها إلى الخارج لزيارة صديقتها في بيت الجيران فأخذت تحييها قائلة:
" إيش لونك يَدتي (جدتي)؟ عساكي طيبة إن شاء الله!!!
فأجابت الحاجة سكينة وقد نثرت حبات القمح من يديها على الطبق:
" يا بتي إنتي ما صاحية والله شنو؟
فسألتها سهى مندهشة:
" إيشلون ماني بصاحية ما تقولي لي بالله؟
فأردفت جدتها قائلة:
" يا بتي مالك قاعدة تسأليني من لوني! اللون ده ما واحد شنو اللي بغيّره؟
وبعدين تعالي هنا!!! عليكي الله لوني ده ما أفتح من لونك؟ عايني وجهك في المرايا!! بري منكن وكُر يا بنات آخر الزمن.
فضحكت سهى ملء شدقيها وقالت:
" جدتي إيش لونك في الخليج يعني كيف حالك فهمتي يا جدتي؟
فأجابت جدتها وهي تنظر إلى شعر سهى متهكمة:
" أنا حالي حال السرور يا يابا مآكلة وشاربة والحمد والشكر لله"
ثم أردفت:" وبعدين تعالي هنا!!! إنتي مارقة برة وشعرك منكوش كدة ذي الشيطان!! بسم الله الرحيم الرحيم,, تعالي هنا وخليني ألمّ ليكي شعرك المنفوش ده"
فقالت سهى وهي تبدي رفضها:
" جدتي!! إيش دراكي عن الموضة والإستايل،، أتركيني بروحي والله يعافيكي!!!
يعني إيشلون بالله تبغيني أصير مثلك وأسوي شعري مثلك والله إيشلون"
فقالت الحاجة سكينة وقد إستشاطت غضباً:
" يا بت تعالي هنا وما تقعدي تبرطمي لي!!
أنا كلمة واحدة من اللي قلتيها ما ناقشاها.
تعالي هنا والله أنادي أبوك من جوة؟
فهرولت سهى نحو الخارج وهي تقول:
" أبوي موب هنيا راح حق رَبَعه برة"
نتوقف هنا وندع الحاجة سكينة تكمل فرز القمح
ثم نعود مجدداً ريثما تعود سهى من الخارج

[سمل ود الولياب]

أرادت سهى وهي في طريق عودتها إلى البيت أن تبتاع شيئاً من البقال فوجدته مقفلاً فوقفت حائرة أمام البقال وفجأة مرت بجانبها سيدة تتأبط خضاراً فإستوقفتها سهى سائلة: " مسامحة يا الشيخة" وقبل أن تكمل السؤال أخذت هذه السيدة تتمتم في سرها قائلة: " أجي يا بت أمي! عملتيني شيخة مرة واحدة،، حكمة والله وحكاية تشغل أذهان العباد" فإستطردت سهى": وإيش بلاها هذه البقالة مسكرة اليوم عسى ما شر؟ فأجابت السيدة وهي تضع الخضار جانباً:" اللهم يرفع البلاء من العباد!!! قصدك يا بتي الدكان ده قافل مالو الليلة؟ والله يا بتي ما عارفة يمكن صاحبه سافر الجزيرة " ثم تأبطت الخضار تارة أخرى ومضت في سبيلها وهي تقول:" في دكان تاني في آخر الشارع في الناصية ،،، فتك بعافية يا بتي" وفجأة رن الهاتف النقال وكانت أمها هي المتصلة فأجابت سهى:" ثَم يا حبيبتي بغيتين شئ أنا رحت البقالة وحصلتها كلش مسكرة والحين ما أدري وين أروح ما تعرفين بقالة ثانية هنيا"
الأم على الطرف الثاني: لا يا ماما تعالي البيت بسرعة عشان أبوكي رجع من برة وقالب الدنيا عليكي وأغشي الحلاق وسوقي أخوكي من هناك زمانو خلّص من الحلاقة ،، يا الله مع السلامة يا بتي الله معاكي"
أسرعت سهى نحو صالون الحلاقة فوجدت شقيقها لؤي وقد إنتهى على التو من الحلاقة فقالت له معلقة على قصة الشعر الجديد لأخيه:" إش إش وإيش ها الكشحة يا لؤي؟ فأجابها لؤي وهو يتحسس شعره:" هذه الله يسلمك قصة بيكهام أدري إنك قاعدة تتنظين عليّ = (تسخرين مني) يا لئيمة أصلك ما تدرين شيء عن الموضة،،، كل ربعي في الديرة يقصون شعرهم هااللون" فقالت سهى وهي لا تزال في نبرة السخرية" بالمبارك ،، أشوى = (أحسن) ما قصيتها المارينز،، تَرى أنا كلش ما أداني (لا أعجب به) هالقصات الجديدة اللي طايحين فيها = (يتهاتفون عليها) الشباب هاالأيام" فقال لها لؤس:" وإنت وإيش خصك وإيش فيك من السوالف هذه والله حول" فقالت سهى:" ويلي ويلي وايد تأخرنا على البيت قو نمشي"

[سمل ود الولياب]

طرق مدو باغت في باب بيت ناس سهى عندما شارفت الشمس إلى المغيب - والليل لبس أجمل وشاح – مما جعل أم سهى تنادي من المطبخ وتقول:" يا بت إنتي ما سامعة الخبيط ده أمشي أفتحي الباب قوام" فأجابت سهى قائلة: " إن شاء الله يا أمي ثَمّي يا طويلة العمر" فراحت وفتحت الباب وكان الطارق هيثم إبن عمها الذي ضاق ذرعاً من الطرق على الباب حتى كلّ متنه فصاح في وجه سهى متذمراً :" يا ناس إنتو نايمين لسع والله حكايتكم شنو؟ فأجابت سهى: " إيش فيك إنت ما في أحد ينوم ها الحزة = (في هذا الوقت) تو الناس = (لسع بدري) حياك يا هيثم دش داخل = (أدخل جوة)
وأخذ هيثم يسأل سهى:" وين أمك يا بت" فثارت سهى في وجهه قائلة:" هيثم مليون مرة أقول لك لا تناديني بت إيش فيك أنت؟ ما أنت بصاحي = (إنت ماك نصيح)
فأجاب هيثم متهكماً :" خلاص أمك وين يا هانم والله أقول ليكي أمك وين يا البرنسيسة يا السنيورة" فضحكت سهى وقالت : الحين أشوى = (أحسن) ولو إني حاسة إنك بتتنظ علي (بتسخر مني) لكن ما علي أصبر علي كان ما علمت = (أخبرت) أبوك. وأخيراً خرجت أم سهى وألقت التحية لهيثم ثم أردفت قائلة:"
يا أولاد إنتو مالكم طوالي متناقرين وجارين الشكل؟ في شنو يا هيثم؟ فقال هيثم يا خالتي أنا أمي رسلني عشان أقول ليكم تعالوا أحضروا خطوبة محاسن أختي الليلة بالليل " فقالت أم سهى ما شاء الله عقبال إنت كمان يا ولدي لمان تكبر كدة وتجيب ليك عروسة بت حلال تسعدك فقال هيثم " إن شاء الله ثم إنصرف وقد رفض تناول الإفطار معهم بذريعة الإستعجال.
وعندما حان وقت العشاء (بكسر العين) جاءت مجموعة من الحسان ليصطحبن سهى إلى بيت الحفل ثم ذهبن سوياً ولم يكن الحفل على نطاق واسع بل ضم نفر من الأقارب والجيران وكان فنان الحفل ياسر إبن خالة سهى الذي تخرج على التو من جامعة السودان ولا يزال يبحث عن عمل وجلس الخطيبان على مقعدين مزينين بأكاليل الورود وقد إرتدا أحلى الثياب وبدأ ياسر في أداء وصلة من الأغنيات لكبار الفنانين وفي منتصف الحفل أخذ الفنان الصاعد ياسر يردد صادحاً :
" مستحيل عن حبك أميل بساهر الليل يا جميل "
وعندما همّ بإختتام الأغنية أي القفلة بلغة الموسيقيين أخذ يكرر ويعيد:
" الليل ده طويل يا جميل "
وقد أعاد هذا المقطع عشرات المرات فضاقت سهى ذرعاً بذلك وإقتربت منه
وقالت له:" إيس فيك ياسر ذبحتنا وبطيت كبدنا مليون مرة تكرر الليل ده طويل يا جميل لين كملت الليل كلش؟ مادام إنك قاعد تغني حق الليل ليش ما تغني لنا
( سرى الليل وحنا ما سرينا ) فضحك ياسر وقال لها ساخراً " طيب يا أختي مالكم ما سريتو المنعكم شنو؟ منعوك أهلك؟
فعادت سهى وجلست جوار صديقتها نشوى وقالت لها وهي تلتفت يمنة ويسرى كمن يبحث عن شئ مفقود فسألتها نشوى مستغربة:" مالك يا سهى بتكوسي على شنو؟
فقالت سهى وهي لا تزال مستمرة في عملية البحث:" ما أدري يا خيتي نشوى!
ماني محصلة الدفة مالتي" فقالت نشوى:" با بتي دفتك شنو وإنت أصلك مركب والله شنو" فأردفت سهى:" ما تعرفين الدفة ما أدري ويش يسمونها هني العباءة جنها (كأنها) " فسألتها نشوى مجدداً: " ما بتذكرني ختيتيها وين والله إديتها منو؟
فقالت سهى:" أنا أعطيتها قريبتنا آمنة اللي كانت تجلس هنا" فقالت نشوى:" آمنة منو يا إنت؟ عمري ما سمعت بي واحدة قريبتك إسمها آمنة" فأجابت سهى :" ما تعرفين آمنة اللي تسكن في حي الجرايد؟ فضحكت نشوى وقالت:
" قصدك الصحافة يا عبيطة"
ن

[سمل ود الولياب]

في الصباح الباكر من صباحات الحاج يوسف المشرقة جلست سهى
تستمع إلى سي دي عبد المجيد عبد الله وتحديداً أغنيته الشهيرة " يا طيب القلب وينك" وقد كان الصوت مدوياً يجلجل الأرجاء بحيث لم تتمكن سهى من سماع صوت أمها التي ظلت تناديها مراراً من المطبخ ولما يئست الأم وقد بح صوتها أتت إلى غرفة سهى وأخذت تزجرها قائلة:" يا بت إنتي طرشاء والله حكايتك شنو ما سامعة الكواريك دي؟" فأقفلت سهى جهاز السي دي بلاير وأجابت:" لا والله ما سمعت شء أبد،، وإيش لون أسمعك وصوت الغنية عالية ها اللون،،ن والحين بغيتين مني شيء ترى أنا حاضرة ؟ تأمرين بشيء يا أمي إنتي تآمرين وإتدللين بس"
فقالت الأم :" يا بت بطلي الغلبة والبكش وقومي جيب لينا برسيم من سوق الخضار عشان أخوكي طلع من صباح الرحمن وابوكي طلع وما عارفة مشى وين" وأردفت قائلة وبعدين أقفلي البتاعة دي عشان جابت لينا صداع"
لبست سهى عباءتها وهرولت إلى السوق وبينما كانت في طريقها إلى السوق قابلت بياع الترمس والكبكبي فطلب منها أن تبتاع شيئاً منها وهو يردد :" أيوة الترمس ترمس ترمس كبكبي تعالي يا بتي إشتري ليكي حاجة عشان الترمس مغذي وبقولوا فيه الكالسيوم فوقفت سهى عن مسيرها وأخذت تتفقد أكياس الترمس والكبكبي وسألت البياع :" بس ما أشوف مكتوب عليه تاريخ الصلاحية" فقال الرجل المسكين مستغرباً:" تاريخ شنو يا بتي وجغرافية شنو؟ كيفن يعني" فقالت سهى وهي لا تزال ممسكة بالأكياس:" يا عمي ما تدري ويش تاريخ الصلاحية يعني إمتى تنتهى مدة المنتج؟ فقال البياع وهو مستغرق في الذهول:" يا بتي أنا قاعد أسويه في البيت براي كل يوم واليوم التاني بيكمل" فرفضت سهى الشراء وأعادت الأكياس للرجل وقالت:"
لا لا هذا ما يصلح لي كلش أعمار الناس مو لعبة وما يصير كدي" ومضت في سبيلها إلى الخضار وعلى ناصية السوق وقف تاجر البرسيم وهو يردد :" أيوة البرسيم" فإقتربت سهى منه وقالت له:" إيش لونك عمي،،، لو سمحت عطني ربطة برسيم والله أقول لك خليها ربطتين" فناولها الرجل الربطتين وعندما همت سهى بدفع القروش إكتشفت أنها قد نسيت أن تأخذ القروش من أمها ولكنها وجدت محفظتها بمعيتها ولم تكن بها القروش بل إمتلأت بأوراقها الثبوتية وبطاقة إئتمان فيزا
فقالت لتاجر البرسيم :" يا عمي ما تقبلون هنيا كريديت مارد؟ فأجاب الرجل مذعوراً " شنهو؟ يا بتي كلميني عربي – النبي عربي" فقالت سهى" أقول ما تقبل أعطيك بطاقة الإئتمان ؟ يصير والله ما يصير فنادى الرجل أحد المارة من الصبية فقال له:" عليك الله تعال يا ولدي ترجم لي البت دي قاعدة تقول في شنو" فدنا الشاب فقال لسهى مستفسراً:" السلام عليكم يا أخت إنتي عايزة شنو من بتاع البرسيم؟
فأجابت سهى قائلة :" أبد والله ما صار إلا الخير،،، قاعدة أقول له ما يقبل كريديت كارد بش أشوفه ما يفهم علي ما أدري وإيش بلاه" فقال لها الشاب:" با بت إنتي مجنونة والله حكايتك شنو بطاقة إئتمان عشان تدفعي حق البرسيم إيه المسخرة دي!!
خلي برسيمك هنا وأمشي جيبي ليه القروش من البيت"
ففعلت سهى بنصيحة الشاب وهرولت مسرعة إلى البيت

[حسكو]

ههههههههههههههههه
ده حال الحناكيش المغتربين
وتسلم والله حاجة حلوة شديد

وين الباقي ياسمل

[أرض الخير]

مشكور ياسمل لكن هي كمان سهى باااااااااااااااااااااااااالغت عديل كده ......ماللدرجة دي ..ههههههههههههههههههههههههههههههههه

[سمل ود الولياب]

حسكو ولبنى تحية صباحية مشرقة بالون الورود
شكرا ليكم كتير وكتير على حضوركم الجميل

[بنت بلدي]

علموني وش صار بعد كذا ؟؟
تراني بموت من الفضول
مافيني صبر ابد

[سمل ود الولياب]

طلتك الأنيقة هنا
جمال الفال
وراحة البال
وهجعة زول بعد ترحال
وتنّية حلوة للشبال
ودنيتنا ومشاويرنا
وغنواتنا الى ما بتِنقال
نجوم ركّت على الياسمين
فرح فى عين جمالها حزين
أساور فى إيدين طفلة
بتحفظ فى كتاب الدين
زَفَافَ عاشقين بعد فرقه
وسط باقات دُعَا الطيبين
عقد منضوم بخيط النور
وطلة وردة من السور
ونغمة تنادى من طمبور
وشُعلة فرحة فى الوادى
تَشِع جَذلانه ليها شهور
فشكراً لتحليقك من هنا كالزنبقة الجميلة
وكفراش القاش
بينما كانت أم سهى منهمكة في إعداد طعام الغداء وهي تقلّب في حَلّة الرجلة باللحمة
وتتبلها بالبهارات ولجت سهى المطبخ ويبدو أن الجوع كان قد إستبد بها فحاولت أن تتفقد ما يجري في المطبخ على قدم وساق فقالت لها أمها وهي لا تزال مشغولة في إعداد الطعام :" سهى حبيبتي عليك الله ناوليني العدس من الرف" فقالت سهى وهي تناولها العدس :" إيش قاعدين تطبخين يما؟ وإيش غدانا اليوم؟ فأجابت أمها وهي تتناول العدس منها: " ذي ما إنت شايفة يا بتي طابخة ليكم ملاح رجلة حتأكلوا أصبعينكم معاه حاجة ما حصلت أصلو يا بتي ملينا من أكل القراريص والويكات والمفروكات خلينا نغير الليلة ونعمل حاجة بتتآكل بالعيش والله رأيك شنو يا بتي؟
فأجابت سهى وهي تهم بالجلوس فوق البنبر الموضوع بجانب أمها:" والله بغيتين الصراحة يما أنا كلش مشتهية آكل برياني والله غوزي أو كبسة (مجبوس) والله ما أحلاها المندي والمظبي والبخاري والرز المضغوط" ثم أعقبت وهي تستعدل في جلستها على البنبر:" يما ما أحصل مطاعم خليجية هني؟ فقالت أمها وقد إستغرقت في الضحك:" والله يا بتي ما أظن في حتات ذي الحاج يوسف والأمبدات والكلاكلات وفي الضواحي طرف المدائن يكون فيها أكلات خليجية لأنو الخليجيين ما قاعدين يمشوا ليها لكين إحتمال في العمارات والطائف والمنشية وكل أحياء سكان البرج العالي ممكن يكون فيها" فقالت سهى متذمرة:" يعني إيشلون بالله؟ وإذا بغينا أكل خليجي لازم نروح الأحياء هذه والله إيشلون؟ ما تقوليلي؟ فقالت الأم وهي تخفض نار البوتجاز بعد أن وضعت العدس على ملاح الرجلة:" ماعندك عوجة يا بتي خالتك سكينة جات أمبارح في إجازة مع راجلها من خميس مشيط وهي ماهرة في طبخ الأكل الخليجي أنا حأكلمها تطبخ لينا البرياني والغوزي وكل اللي إنتي عايزاه إيه رأيك؟ فقالت سهى:" ما ظنتي إنها تقدر تطبخ ها الطبخت هذي هنا؟ فسألتها الأم مندهشة:" ليه يا بتي المانع شنو؟ فأجابت سهى:" لأنو الطبخات هذه يبغالها شغلات وايد مثل اللومي الناشف والكركم والزعفران والهيل والزبيب والمسمار وين تحصل ها الأشياء هذي هنا؟ فقالت الأم وهي تهم بالنهوض من البنبر:" يا بتي الحمد لله سودانا فوقه كل حاجة وحتاجة الخير راقد والله يا بتي أمشي هايبر ماركت عفراء تلقي فيه لبن الطير والله أمشي إتفرجي على المجمعات التجارية الجديدة اللي ظهرت دي تلقي فيه العجب العجاب سودانا بخير يا بتي" ثم أعقبت الأم وهي تهم بالخروج من المطبخ:" قومي يا بتي أمرقي وجيبي لينا عيش عشان أبوكي قرّب يجي من الشغل

[سمل ود الولياب]

سافرت نشوى صديقة سهى إلى عاصمة الضباب لندن لتكملة دراساتها العليا في العلوم فغابت عن السودان قرابة السنتين ثم عادت في عطلة الصيف لزيارة الأهل بالسودان وإلتقت بسهى صدفة في بيت قريبتها في الشعبية بحري وأخذت تحييها بالأحضان وقد إستبد بهن الشوق والحنين بعد غياب السنين وقالت لها وهي لا تزال تتبادل طقوس التحية والسلام
بنبرة لا تخلو من السخرية والتهكم على لكنتها الخليجية:
" إش إش أمسكي الخشب أشوفك إحلويت وايد (كتير) يا سهى ما تقوليلي وإيش صاير معاكي؟ أكيد قاعدة تستخدمين خلطة الكريم اللي طايحات فيها البنات ها الأيام؟ فأجابت سهى وهي تحاول جاهدة أن تبادلها نفس السخرية:" والله ما عارفة يا نشوي أختي السماحة عاد ما سماحة الروح والطبع يا بت أمي والله الكلام ده ما صحي؟ فإندهشت نشوى لردها
وقالت لها وهي لا تزال لم تفق من هول الصدمة:" أجي يا بت أمي يا بنات ألحقني ووب علي البت سهى بقت تتكلم سوداني وباين عليها نست الخليجي في السنتين الغبتهم ديل غايتو حكمة والله وحكاية تشغل أذهان العباد سبحان الله صحي قالوا في المثل دوام الحال من المحال"
فإلتفتت سهى لصديقتها الأخرى مريم وقالت:" يا أختي اللي بتباري ناس مريم ديل تنسى أي حاجة البت دي يومي على الله شابكاني عليكي الله والرسول ووب علي وبري يا يما وسجم خشمي لغاية ما نستني الكلام الخليجي تب يا الله سوداني خليك سوداني ذي ما في الدعاية"
فأعقبت نشوي وهي تهم بالجلوس فوق المقعد في وسط الصالون:
" والله أنا فرحانة ليك شديد وإن شاء الله تكوني إتعلمتي العواسة والطبيخ والله لسع بيطبخوا ليكي البرياني المخصوص؟
فقالت سهي وهي تلم خصلات الشعر التي تتطايرت على جبينها:
" يا زولة أسكتي خليها على الله ساكت!!! العجيبة كمان بقيت ما أحب إلا الكسرة المرة إشي بالويكة وإيشي بالملوخية وكانت بقت بي ملاح الرجلة تكون الناقصة وتمت ونلت مرادي وقلت يا دنيا ما فيكي إلا أنا" ثم جلست فوق السرير إلى جانب مريم وقالت:" غايتو عواسة الكسرة دي لسع بدري علي لكين القراصة إتعلمتها تب والبركة في مريم هي اللي علمتني عواسة القراصة ولو إنو شايفة إنها ما راضية بي قراريصي بتقول سميكة شديد ذي قراصة أهلنا الشوايقة" فقالت مريم وهي تكتم الضحكة:
" يا أختي العافية درجات خليكي في قراصة المناصير دي وبعدين لي قدام حأعلمك عواسة الكسرة والأبري في رمضان الجايي ده إن شاء الله رأيك شنو يا سهى هانم؟ فقالت سهى:" والله كدة تكوني جيهتيني تب كتر خيرك يا بت أمي إن شاء الله نخدمك في السعادة قولي آمين"

ونواصل لاحقاً فأبقوا معي

[هارمونى]

هذه من ابداعات حسن سادة فى كل المنتديات النوبيه فباى حق تنسبه لك يا سمل
واليكم الرابط


[فقط الأعضاء المسجلين والمفعلين يمكنهم رؤية الروابط]

[أرض الخير]

هذه من ابداعات حسن سادة فى كل المنتديات النوبيه فباى حق تنسبه لك يا سمل
واليكم الرابط


[فقط الأعضاء المسجلين والمفعلين يمكنهم رؤية الروابط]

اولا مرحب بكم في منتديات كومي ...
ثم اننا ختمنا الموضوع بانه منقول ....

[هارمونى]

اولا مرحب بكم في منتديات كومي ...
ثم اننا ختمنا الموضوع بانه منقول ....

اختى لبنى مساك الله بالف خير
الاداره خاتم الموضوع منقول بس حتى الردود كلها منقوله من الالف للياء
يعنى اختموا فى جل مشاركات سمل منقول ماعدا التعازى والتهانى