الشعر الحلمنتيشي

[الشايقي ود كسلا]

يا ريت
يا ريت
يا ريت لو كنا بنزرع

يا ريت لو كنا بنصنع

ما كان ساءت احوالنا

وبقينا نقابض ونقلع

العيد الماشي علينا

ختانا في خشم المدفع

اسعار الخرفان الغالية

اسود وابيض ومبرقع

تسعين النعجة الحامل

بي مية الحمل البرضع

عارفين الأضحية سنة

للزول البقدر يدفع

وماها واجبة علينا

ماذا دهانا نصنع

نحن المضفورين في بيوتنا

ولحكم نسواننا بنخضع

بيأثر فوقنا قرارن

نقوم نتدين ونلبع

نتكلف فوق طاقتنا

عشان ما نرضي الشفع

[الشايقي ود كسلا]

كفتيرتك
كفتيرتك

كفتيرتك في السوق مرمية

وكبايتك يابسة ومجدوعة

يا بت الخلطة النوبية

يا حلوة ورائعة ومربوعة

كانونك كان عامر بالناس

صناع عمال ومساعديه

حارسنك طول اليوم

تجار وسماسرة عطلجية

كم استحملتي رزالة الناس

عشان امونة وزكريا

فتشنا عليك في كل السوق

ورتنا صديقتك قمرية

حزنانة بتبكي بدمعا حار

والعدة هناك في البلدية

كشوك يا حواء من الأسواق

واصبحت ايدك ملوية

انتى الجيتي تشدي الشاي

بتفتشي في لقمة هنية

بتخافي كتير من كشف الحال

أبيتي الطرق الملوية

أحلامك على قدر لحافك

ما عائزة عمارة وعربية

عاجبك بيتك في الإنقاذ

أو حاج يوسف ردمية

كشوك يا حواء من الأسواق

والدمعة في خدك متكية

وهسة خلاص خليتي الشاي

بتبيعي مريسة وبقنية

[الشايقي ود كسلا]

محمود عوض الكريم : عنجليييييييزي
كل ما أقبّل وأعاين

ألقى عينيك جات في mine

حاجة very good

حاجة fine

يا suger مصنع كنانة

يا flour مالية البطانة

إنتِ fantastic banana

إنتِ my eyes رتينة

إنتِ where is مابتجينا

إنتِ عينيك فيها light

إنتِ شعرك dark night

إنتِ طبعك كولو right

إنتِ my heart إنتِ نورو

إنتِ my love البدورو

عايز أشوفك more tomorow

عايز أشوفك more tomorow

[الشايقي ود كسلا]

أقطعي
أقطعي

أقطعي يا الجنيتي على القطع

كمبيوترك ما بعرف الجمع

اقطعي خلينا نبكي بالدمع

اقطعي تكتر مصانع الشمع

وينقص رصيد ناس الضرائب

والحبايب ويا كهارب اقطعي

****

أسلاكك بس بيت عنكبوت

والبهبشك ما اظن يموت

أقطعي خليهن يبكن البنوت

وشًوفي الناس العجائب

يا كهارب اقطعي

***

أقطعي وخلينا بس نبقى الكبش

اقطعي اسعارك ما بتنهبش

اقطعي بنوًر بيوتنا بالشمش

وننفك منك يا ام مقالب

ويا كهارب اقطعي

****

اقطعي يا ربة الحسن والجمال

يا قاسية بكيتي الرجال

بتصيدي في الناس بالنبال

تعيشيهم في مقالب

وتخربشيهم بالمخالب

ويا كهارب اقطعي

***

فشلتي ما قدرت واصلت المسيرة

إيه فائدة البحر الدميرة

والكوابل والعواميد الكثيرة

دللوها واملوا بقروشها الخزائن

ورجًعوا الناس للرتاين

وينفكوا من كل المشاكل والمصاعب

والمتاعب يا كهارب اقطعي

***

أقطعي انت احوالك عجيبة

أقطعي ملينا عيشتنا الرتيبة

أقطعي ضلمي المدن الكئيبة

وتقرًص الناس العقارب

والدبايب ويا كهارب اقطعي

[الشايقي ود كسلا]

الفيكس : تأليف : مشرور راجي الدّفار!
حاجة عجيبة ودنيا تنسّي

ناس اغتربت تمشي المانيا

تمشي اليابان ونيوجيرسي

حاجة عجيبة وجات بالعكس

من الصين وللسودان

الجكس اغترب وباع الفيكس

واحدين قالوا جونا هنا

لأنو هناك حرارة الطقس

واحد قال بكين بالنص

للسوق العربي رماهم بوكس

وميه الميه بايركس

وبايركسنا كمان بايركس

السودان ضاع وضح النهار

من غير ما لبس

والشوارع دقداق تفتل دركسون

وتحل جربوكس

ومن الصحافة زلط وللخرطوم بالعكس

ثقيف مشرور وتهتز زي البترول

وما يفضالك كرسي

نهارك ضاع من تصبح لامن تمسي

ركشه هنا وركشه هناك وللصالح العام

أحالوا التكسي ..

الدفار جاك وهاك يا كوداك

تصل عرقان وقميصك وسخان

وحالتك يخسي

راسك زي سخّان يغلي غليان

وما يساوي الفلس

[الشايقي ود كسلا]

كتبت عشان الاقى زول كان الرد من زوله
اتسامرنا وحكينا حكاوى حبوبه
شليل وينواكلو الدودو شليل وين راح اكلوالتمساح
كلمه كلمه غنوه غنوه همسه همسه لبست الحب وشاح
نادى المنادى قلت خلاص قلبى ارتاح
عرفت الحب بقيت عاشق بلاقى فى كلمات براح
اردد ليه ليه من زمان ماتقابلنا ندمان على الماضى الراح
ابتسامتك الزاد لى بكره صوتك البلبل الصداح
خيالى برسم فى المشيه والقدله وفى النجوم بقيت سواح
سابح فى خيال طيفى وبشوف فى وجيها صباح
كتمت حبى فى الكتمان بلاقى نواح
انين فى دواخلى بقطع فى حشاى الم فى قليبى مابنزاح
جنتى ...... حبك وكلماتك تداوى جراح
انتظرتك تقولى الكلمه طال انتظارى وفجر الصباح لاح
اخر العذاب قلبى مل من صبرو قال عاوز ليه صراح
وقلت انا الكلمه من امل حياتى القى نجاح
ياريت لو بتنفع ياريت اترفع فى وجيهى سلاح
وانكسر قلبى انكسر السهاد زامل عيونى بقى ماعندى صباح
من حبات الرمال شيدت ليكى قصور فيها العطر فواح
فى جواى زرعت ليكى مدن مشتوله بالافراح
سلمتك قليبى رهيف قليب طفل كل شئ فيهو مباح
عرفتى دواخلى والكان وكان وعارفه قلبى لى سواك ماراح
ظمايئ برويه من كلماتك وظمائك برويه من وريدى وفى بحر الحب كمان سباح
بسأل بى كل صراح يجف مدادى بدون الحاح
وبدعو الواحد الاحد يوقف كلماتى ومن عذاب امل حياتى أرتاح

[الشايقي ود كسلا]

الكهارب
الكهارب

الكهارب سبب المصائب
ديمة قاطعة من الصباح
***
من يوم ما سموها الإدارة
لحدي هسة فاقدة الجدارة
تفصل وتقطع بي حقارة
قلوبها اقسى من الحجارة
اصلو ما بتعرف سماح
***
جايبة للناس الأذية
بالقطوعات الكهربية
والفواتير ما شوية
يسووا كيف ناس الماهية
كلام حقيقي من غير مزاح
***
تشبه البت الدًللوها
ديمة ما رقة من بيت أبوها
ما بتعرف صليح من عدوها
بكرة قالوا بخصخصوها
مالها بكتر وتزيد الجراح
***
يا شباب القرى والمدائن
في المصانع وفي الجنائن
نزلوا العداد في الخزائن
يلاً نرجع للرتائن
ونبقى في كسرة وملاح
***
دي المخلية ليلنا دجًن
بكًن الولد المعجًن
المواطن عينيه سجن
الهارب ده قطاع ملجًن
وأثخن السودان بالجراح

[الشايقي ود كسلا]

الوداعية
الوداعية
جلست في ظل النيمة

تتأمل في الودع المرصوص

قالت يا ولدي شيل شيلتك

وتسلح فالحرب ضروس

امامك مشوار طويل

الا ان تركب مخصوص

الموقف مكتظ مليان

ستدافر يا ولدي كثيرا

وستركب وسط النسوان

وستنشل كل نقودك

وستصبح دوما حزنان

الناس يا ولدي جيوش

مندفعة مثل الطوفان

فنصيحتي أن تذهب كداري

ولا تركب بص ام درمان

زواجك يا ولدي محال

أصبر يا ود الصًرة

حالياً وضعط بطال

وحتبقى حياتك مرة

فالمهر في كل الحلال

قد اصبح بالعملات الحرة

احببت فتاة مغرورة

لعبت بي قلبك كورة

أنساها وأبحث عن غيرها

ويا ريت لو شرطت الصورة

أنسى وتبسم

فالزوجة قسمة وتوتوكورة

***

[الشايقي ود كسلا]

الزمن الضائع
الزمن الضائع
متين يا الله ألم الفكه

أجيب الشيلة واسوي الشبكه

وأمي تزغرد بي طول صوتها

وأنا مبسوط وظابط الشكة

هدومي معطنة بالأرياح

ريحة الخمرة وريحة الدلكة

واطبع للعيزومة كروت

حاشاها الما زي كرت البنزين

جميله زاهية في ورق التوت

وتحت الإمضاء مشكورين

لأنها لحظة ما بتفوت

وإلا تكونوا مبسوطين

ويجوا الأولاد بوجوهاً نادية

يقشوا الفسحة الواسعة وهادية

نرًكب فيها الصيونات

ونعمل حفلة بود البادية

ولازمن حفلة تكون صباحي

أشفي غليلي وأداوي جراحي

من زمن العذابة الأغبر

السًود عيشتي وزاد لنواحي

أفك القيد من قلبي وأغني

حبيب الروح وغني يا صاحي

وفي العصرية نمرق سيرة

خلوق منتظمة ماشة مسيرة

زي صف دكانأً ناصية

فيه سجاير بالتسعيرة

بناتنا يغنن مبسوطات

دور بينا البلد ده

يلفن يدورن العربات

ولمن أصل بالسيف اتقدم

زي الفارس ماشي ملجم

وشي بينضح لمعه ونضرة

قميصي نضيف وماه مجلبط

بملاح خدره

أهز في البنوت بي سيفي

وابخبخ فيهن لبن البدرة

وفجأة يدق صوت الدلوكة

وتبقى الناس بالجد مربوكة

واحدة تصفق واحدة تزغرد

وواحدةتلوك في لبان بازوكة



جابوا عروسي وبدت الوقفة

سرحت بعيد في حق القفة

جابت قون بي رقة وخفة

ما اتجرست كلا وحاشا

الا هناك واقفين شماشة

قالوا اكيد شارب حرباشة

زعلت شديد وغلبني اللعب

لانو كلامن كلو كضب

قاموا اصحابي بصوت عالي

يا عبد الله اطلع بره إشاعة إشاعة

وحتماً يوم لي أمك عايد

قونها حقيقي ما اوف صايد

صوت أصحابي أثر فوقي

بحركة ذكية جبت القون

وانا والحلوة بقينا درون

وفجأة أضفت الهدف الثاني

وغمر الساحة فرح رباني

مرقوا اصحابي يكوركوا ويهتفوا

فاتوا الفسحة وسدوا الشارع

صوتهم طاغي ظاهر وطالع

يا عبد الله هايل ورايع

جبت القون في الزمن الضايع

[الشايقي ود كسلا]

العذابة
العذابة

أقولها نصيحة ليك يا بابا

أحذر جيرة العذابة

أهل الضمنة والكشتينة

ديل أهل الطباع الشينة

ليهم مرة نحن مشينا

لا إتغدينا لا إتعشينا

***

لو وقعت ما بتنحل

حتى إن كان بقيت زي بله

ديل القوم في أي محله

نص الليل بشدوا الحلة

***

يعبوا البيت زي الباخرة

ما بعرفوا السراير الفاخرة

دفاتر الكل عليهم ساخرة

أصلوا خلاص بقت دين آخرة

يخلوا البيت مبشتن ديمة

يدخًلوا فيه عدة قديمة

كمان لو فيه شجرة نيمة

يكون وسخان وحالتو أليمه

***

الملاية ما مفروشة

وجوه الأوضة قامت كوشه

ست البيت تكورك فيهم

ديل أخواننا ضربوا قروشا

***

الغسًال يكورك فيهم

والتاجر أبا يديهم

والجزار مشرك ليهم خلاص يا اخواننا عرفوا الفيهم

زحمة شديدة في الشماعة

ريحة كريهة في البلاعة

ديل في الحلة عملوا مجاعة

شفطوا القدرة في نص ساعة

***

ضد العرس رفعوا الراية

ديل إنحلًوا من الداية

لا تطعيم كمان لا رعاية

مافي كرامة ولا سماية

[Raw3a]

لك الشكر يا مبدع

لكن بالجد كان نفسي اعرف يعني شنو الشعر الحلمنتيشي

و سبب التسمية بي كده شنو

وحقت الانجليزي دي ابداااااااااااااااااع

[الشايقي ود كسلا]

لك الشكر يا مبدع

لكن بالجد كان نفسي اعرف يعني شنو الشعر الحلمنتيشي

و سبب التسمية بي كده شنو

وحقت الانجليزي دي ابداااااااااااااااااع


مشكورة روعة الرائعة

ودي مهداه ليكي

لما شفتك
لما شفتك


لما شفتك قلبي كان ناصع نضيف
زي الطيور الراحلة في زمن الخريف
عشت متألم وما قادر أقيف

زي زي مشرور وحيد

مستني باصات الجريف

أنا الكيشة صًدقت إدعائك

يوم قلتي لي دمك خفيف

وخدعني بوخ نظرات عيونك

مليانة بالكحل الظريف

قمت شلت الكيس من ايدك

ووقفت في صف الرغيف

دافعت ليك وسط الخلوق

عشان تقولي ولد حريف

واديتك العيش بابتسامة

نابعة من قلبي الرهيف وبعد ما شلتي العيش

نسيتيني ومشيتي بعيد

وانا المشدوه أعاين فيك

زي إقليمي جاي جديد

تاه في زحمة الخرطوم

وشاف الناس شمال وصعيد

ما تنبسطي يا حلوة

بعد نكرانك المعروف

أصلو الحي مصيرو يلاقي

ياما بيشوف

واصلو الناس حياتها ظروف

ويوم بلقاك في ورطة

لانو بلدنا كلو صفوف

[Raw3a]

اشكرك يا شايقي


ابداع والله



[فقط الأعضاء المسجلين والمفعلين يمكنهم رؤية الروابط] ([فقط الأعضاء المسجلين والمفعلين يمكنهم رؤية الروابط])

[الشايقي ود كسلا]

اشكرك يا شايقي


ابداع والله



[فقط الأعضاء المسجلين والمفعلين يمكنهم رؤية الروابط] ([فقط الأعضاء المسجلين والمفعلين يمكنهم رؤية الروابط])


بفضلكم ومتابعتكم الرائعة
كان الابداع يا روعة

[الشايقي ود كسلا]

انت مهما جريت ومهما قسيت=
حبك برضه لذيذ sweet =

ليه يا قاسي ستة شهور=
Since I saw you وامكن more=
ماشي وجاي حزين مأسور=
بين الـ window وبين ال door =

ليه تظلمني وتنسي هواي=
وأنا بحبك زي my eye=
وصولك كيف ومكانك high=
تعال أدركني before I die =

ليه يا قاسي كفاي تعذيب=
في ذكراك I can't sleep =
داخل قلبي جروحك deep =
تعال أدركني before I weep=

بحلم بيك أنا day and night=
أنا والنوم دوام فيfight =
ماعرفت شمالي من my right =
هل الكلام دم منك right ! =

[الكردفاني]

الشايقي ياخطييير، مشكور علي التحف الحلمنتيشية.
مودتي

[ود الفحل]

انت مهما جريت ومهما قسيت=
حبك برضه لذيذ sweet =

ليه يا قاسي ستة شهور=
Since I saw you وامكن more=
ماشي وجاي حزين مأسور=
بين الـ window وبين ال door =

ليه تظلمني وتنسي هواي=
وأنا بحبك زي my eye=
وصولك كيف ومكانك high=
تعال أدركني before I die =

ليه يا قاسي كفاي تعذيب=
في ذكراك I can't sleep =
داخل قلبي جروحك deep =
تعال أدركني before I weep=

بحلم بيك أنا day and night=
أنا والنوم دوام فيfight =
ماعرفت شمالي من my right =
هل الكلام دم منك right ! =




واحد فيلسوف بيحب واحدة قام قاليها :
من ذكراك I CAN'T SLEEP
وأصبح شغلي CRY AND WEEP
وفتحت لحبك FILE
واستعملت EVERY STYLE
دمعي يسيل زي مويت AL NILE
وطالب منك JUST SMIL

[الق المعانى]

ياسلام علي شعرك ياود كسلا زى راندوق الكردفاني.

[ود الفحل]

النساء و منصب الوزارة

قالوا الرجال إن النسا مالهمش في الوزارات
ونهار ابونا مِسا لو حكّموا الستات
في وزارة التموين و الاقتصاد بالذات
حتضيع فلوس البلد في اللبس و البوتيكات
بالذمة ده اسمه كلام
يبقى وزيرنا مدام
واسم البعيد فتكات
يختي عليه لو مشي
يدخل مجالس إشي
لابس قميص شفتشي
من كلمة واحده يختشي..وينزل صويت وعياط
يا اهل العلام والادب
اقروا التاريخ اللي انكتب..فوق الطريق علامات
كليوباترا حكمت بلد
بالحيلة ويّا الجلد
من غير لا خد ولا هات
وكام من وزير كان قفا
جه في الطريق واختفى .. ولهف وراه ألوفات
قصر الكلام يتقال .. مين فيهم اللي يفيد
مش مسالة عضلات
وساعات كتير ستات بيكونوا رجالة
ورجال بطبع النسا
وطالعلهم شنبات

[ود الفحل]

يابنت بلدي
يابنت بلدي عيب ..لما اللجام هيسيب .. يسترخصوكي الناس
في بنطلون مزنوق .. وبلوزه شبر لفوق .. ولا حتى فـ الجمباز
عريتي تحت وفوق.. ولا عدش عندك زوق .. ولاحتى فيه احساس
لحم الخروف مدبوح ..بنجيبه بعد الروح .. ما تحصّــل الأنفاس
ولحمتك بالكوم .. دكان وطول اليوم ..مفتوح لأرخص ناس
يخرب زمنا زمان .. كأنه عُمر ما كان .. لالينا اصل ولا اساس

[مشاكس]

رووووووووووووووووعه يا مان
تـــــــــــــــســــــــــــــــــــــــلــــــــ ـــــــــــــــــــــم

[الشايقي ود كسلا]

قصيدة بت هندسة=





أنا راسى جاط ما بين هواك والدبرسة=
الفت عشرين الف بيت سبعين قصيدة مؤسسة=
شان اقدر الفت انتباه ومر اقدر احسسه=
يا حلوه يا بت هندسة=
يا حلوة يا زينة البنات يا نجمة الليل والمساء=
أنا رغم اشكال الشتات حاضن عواطفك وحارسه=
أنا في هواكي بقيت فتات ودخلت عشرين مدرسة=
جنيت مع كلمات هواك بي قلبي قاعد اتنفسه=
ويا حلوة يا بت هندسة=
اكان شفت يااااااااااا بت هندسة=
خطواتي دايما بالغلط واموري ديمة معكسه=
يوم داك مساهر في الهدوم وكويته جت شان البسه=
لقيته الصباح حقت اخوي وهدومي قاعدة مكرفسه=
كان للهدوم ما مشكلة بشوف لي مصيبتا البسه=
لكين هواك اعملو ايه تشتش عطامي وهرسه=
داير لي فرصة اكون قريب طبلت قليبك افلسه=
عشان تشوفي هواكي كيف بهدل عواطفي ودعفسه=
كلماتي ليك اتبشتنت ما ذي زمان متهندسه=
حتي الشعرالكان زمان كلماتو حلوه مملسة=
هسه هسه اتلخم بقي كيف كدا=
ما فيه كلمة مهندسة وانتي السبب=
انتي السبب في كل دا يا احلي اسباب الاسي=
أنا ياخي بريدك اعمل ايه وريني يا بت هندسة=
امشي واكورك في الظلط يا ناس بريد بت هندسه =
يا ناس بريد بت هندسه=
كم مرة قلت اكون براي اقعد معاها واحدثه=
لكني ما بقدر عديل ما بقدر انضم اونسه=
خليك من اشرح ليها حالي وحبي ليك والدبرسة=
وياااااااااااااااااااا يا هنايه=
يا هناي دار اقول ليك كلام اصلو السكوت فيه وسوسه=
انا يا ملاك انا بعشقك وما اظن بلاك ارجي المساء=
دايرك تكوني لي حبيبة وابقي ليك حبيب قسى=
اكسيك هواي وتلبسيني نعيم هواك اجمل كسا=
ويا ربي كل عاشق نبيل تديه ذي بت هندسة=
وترعاه من عين الحسود من ثوب جمالك لبسه=
ويا ربي تحفظ لي براي ويا ربي تحفظة تحرسه=
ويا ربي تحفظة تحرسة=

[الكردفاني]

رائع ياصاحب الروائع ياإسحاق.

[ابو عبد الحفيظ]

تسلم ياغالي علي المشاركة وصراحة بت هندسة روووعة

[الشايقي ود كسلا]

من روائع الشعر الحلمنتيش الشعبي : قراءة من ديوان السندباد في بلاد السجم و الرماد للشاعر الحردلو


1- =

تقول لِى شنو =
وتقولى لِى منو =

-2- =

أنحنَا السَّاسْ =
ونَحنا الرَّاسْ =
ونحن الدّنيا جبناهَا =
وبَنيناها.. =
بِويت ..فى بِويتْ =
وأسْعل جدى ترهاقَا =
وخلى الفَاقة .. والقَاقا =

-3- =

تقول لِى شنو =
وتقول لِى منو ، =

-4- =

تَالا أبوى .. بعنخى لَزَمْ =
وتَالا اللُمْ..أَبوىْ أوْلبَابْ =
وأمى مهيرة بتْ عبودْ =
وأخويا المهدى ..سيد السيفْ =
والخلى النصارى تقيفْ =
هناك ..فى القيفْ ، =

-5- =

تقول لِى شنو =
وتقول لِى منو ، =

-6- =

ونحن الشينْ =
ونحن الزينْ =
ونحن العقبه والعتمور =
ونحن القِبله .. والقرعانْ =
ونحن الشانْ =
ونحن النانْ =
أتينا عشانْ =
نسوى الدّنيا للإنسانْ =
تقول لِى شنو =
وتقول لِى منو ، =

-8- =

ونحن الصّافى =
والوَافى ، =
ونحن الشّافى =
والكافِى ، =
ونحن الزادْ =
ونحن العِينه =
والزِيّنه ، =
ونحن – يمين – أهالينا =
أهلى سرورْ =
ووكَتين ينزل المستورْ =
تَرَانَه النور =

-9- =

تقول لِى شنو =
وتقول لِى منو ، =

-10- =

ونحن الجبنه واللبريقْ =
ونحن قداحنا سَاوات ضيقْ =
ونحن بيوتنا مفتوحاتْ =
مَسَاىْ .. وَصباحْ =
ونحن وشُوشنا =
مطروحاتْ =
مَسَاىْ وصباحْ =
ونحن السَمحه =
والقَمحه =
ونحن الطله .. واللمحه ، =
ونحن الصِيدْ =
ونحن العيدْ ، =

-11- =

تقولى لِى شنو =
وتقولى لِى منو ، =

-12- =

ونحن عُزَازْ =
ونحن حَرَازْ =
ونحن هَشَابْ =
ونحن قُمُوحْ =
ونحن تُمُورْ
ونحن عُيُوشْ =
ونحن النيلْ =
وَكضَاب – يا زويل – منْ قالْ =
إنّك .. تانى لينا متيلْ ، =
تقولى لِى شنو =
وتقولى لِى منو ،

-13- =

ونحن الحَجه والتوبه ، =
ونحن الهِجره .. والأوبه ، =
ونحن كُتَارْ =
ونحن كُبَارْ ، =
ونحن – يمين – جُمَال الشيلْ =
ونحن – يمين –نَضِمنا قليلْ ، =

-14- =

تقول لِى شنو =
وتقول لِى منو ، =

-15- =

ونحن مِحايه =
نحن طِرايه =
نحن فِدايه =
نحن سِمايه =
نحن حجاب =
ونحن اللوحْ =
ونحن شَرَافه فى الدنيا =
ونحن كِتاب عِلمْ مفتوحْ =
على كل البُلودات ..نُورْ ، =
ونحن – يمين – مَداين نورْ ، =
ووشنا نورْ ، =

-16- =

تقول لِى شنو =
وتقول لِى منو ، =

-17- =

ونحن الحِنه والجرتقْ =
ونحن الزفه والسيره ،=
ونحن ..أبشرى والشبال ، =
ونحن السَىْ =
ونحن الوَىْ =
ونحن الرقبه .. والتُمْ تُمْ =
ونحن اللَمْ .. =
يكون فى الدنيا ..متلنا ..لمْ =

-18- =

تقولى لِى شنو =
وتقول لِى منو ، =


-19- =

ونحن العَاجْ =
ونحن الصَاجْ =
ونحن البوشْ =
ونحن الحوشْ =
ونحن الناسْ =
وكتين الديارا ..يباس =
وإن درت العديل والزين =
تعال يا زول ،
وإن كست الكعب والشين =
أرح .. يا زول =

-20-

تقولى لى شنو =
وتقول لى منو ، =


-21-

ونحن السورْ =
ونحن الحُورْ ، =
ونحن بناتنا محروساتْ =
ونحن وِلادنا ضُلالاتْ =
ونحن أُماتنا ياهِنْ ..ديلْ ، =
وجِيب ورينى زيىِّ منو ، =
وتقول لِى شنو =
وتقول لِى منو ، =

-22- =

ونحن فَزَعْ =
ونحن وجَعْ =
ونحن اليُمه ..واليَابَا =
ونحن أريتو بالتَابَه ، =
ونحن – يمين – إذا حَرّتْ ، =
نخلى الواطه ..رُقَابه ،=


-23- =

تقولى لِى شنو =
وتقولى لِى منو ، =

-24- =

ونحن زَغَاوه والعطرونْ =
ونحن الدُونَا ..مافيشُ دونُ =
ونحن وِلاد مَلك خِرتيتْ =
وسَابَ الجرْ =
وحجَر السِكه ، =
والتاكا ، =
وسيّدنا الفى الجبل ..دَاكَا =
ونحن – يمين – نضِمنا كُتُرْ =
وشيَتنا كُتُرْ =
وأسعَل ناس كَرن والطُورْ ، =
وأسعَل كَررى .. والعَتْمُورْ =
وأسعل – يا جنَاَ – الخرتُومْ ، =
وشوف كيفن زعلنا كُتُرْ ، =
وشوف كيفن فرحنا كُتُرْ ، =
أنحنا الـ للرجال خُوسَه ، =
ونحن –يمين – جِنَات موسى ، =


-25- =

تقولى لِى شنو =
وتقول لِى منو ، =


-26- =

ونحن الدوكه =
والضُلاله ، والدونكه ، =
ونحن الدانقه ، =
والراكوبه ، والواطه ، =
ونحن الفَكَه =
والشِبكَه =
ونحن الحجزه .. والعكَه ، =
ونحن الجُودْ ، =
ونحن أسودْ ، =
ونحن النَانْ ، =
حديثنا إذا أرِدتو رُطَانْ =
وحين دايرين ..نسوى بَيَانْ ، =

-27- =

تقول لِى شنو =
وتقول لِى منو ،=


-28- =

ونحن الخَلوهَ والدايره ، =
ونحن تَكيه العايره ، =
ونحن الضُّلْ ، =
ونحن الكُلْ ، =
ونحن سبيل غريب الليلْ ، =
ونحن صباح مسافر الليلْ ، =
ونحن فَنَاجرةَ الدّنيا ، =
ونحن حَبَابْ =
حديثنا حَبَابْ =
تعال شَرِف .. وشوفنى منو ، =
وتقولِى شنو ، =
وتقولِى منو ، =


-29- =

أقيف لِسَعْ =
وأقيف وأسمعْ ، =
ونحن صديرى منضوم ويلْ =
ونحن القَرمصيص ..بلحيلْ ، =
ونحن التوبْ =
ونحن الووبْ =
وناس حبوبْ =
وناس حَرّمْ =
ونحن إذا رأينا كبيرْ =
نقيف طولنا ..ونقولْ لُه ..حَبَابْ =
ونديه البُكَان ..ترحابْ =
ونحن. اليَانَا ديل .. يا زولْ =
وتسعلنى .. وتقول لِى منو =
وتقولِى شنو ، =

-30- =

أقيف لسعْ =
وأقيف .. وأسمعْ =
ونحن التَايَهْ =
والاندايَهْ =
والزِريعهْ =
والعيزومهْ =
واتفضلْ ، =
ونحن الرايَه مرفُوعه =
ونحن الكُلفَه مرفُوعه =
ونحن حلفتَ ... مدفوعه =

-31- =

تقول لِى شنو =
وتقول لِى منو ، =


-32- =

وأما عجيبْ =
وأما غريبْ ، =
وأقيف لسعْ =
وأقيف .. وأسمعْ ، =

-33- =

أنا الكَعَب البسوى الويلْ =
وأنا الزول السَمِحْ ..بلحيل ، =
وداير ..منَِّهُمْ .. يَاتُو ..، =
تقولى لِى شنو =
وتقول لِى منو ، =

[مصطفى سنجه]

شـكــ وبارك الله فيك ـــرا لك ... لك مني أجمل تحية .

[الشايقي ود كسلا]

ومن الحلمنتيش ايضا نشوف دكتور محمد بادي ومقارنة بين ابناء المدن وابناء الريف


هوى يا وليد يا دلوعة يا مرنوعة
أعدل إيدك المفدوعة
واتلحلح واقيف دغرى وواس صدرك
مع صدرى واتشدّع


ليك الحق
شان ولدوك فوق اسفنج
وحتى أول جديد سوهو ليك بالبنج
وهسع هوايتك إنك تلعب البنق بونق
وليك الحق عشان فطموك بعد مازدتا فوق سنتين
وفى سن عشرة نومك كان على الليدين
غطاك بالشاش وفرشك بحرير الصين
والبتدورو كلو بتلقى غاب قوسين
ابوك مليان وجيبو سمين وقلبو سمين
وفاتحلك حساب فى البنك والتأمين

وليك الحق
عشان ما خضتا فى وحل المطر والطين
ومن الترعة ما سويت شراب الهين
وما قيلتا فى ضل دومة بى فرعين
وما شاققتا عرق النيل مع الوزين
وليك الحق
عشان ادمنتا عيشة اللين
مشي الاسفلت ما جربتو بالكرعين
ركوب اللورى فى شمساً تصر العين
وما عانيت وقوف الصف وراء التموين
عشان يا انتى ما بتدرى سجل ابواتك البدرى
دحين اسمع .. أقيف واسمع
سماك الباكى مجدو الزال
يا ما كانوا تحتوا رجال
ابوخنجر وابوشوتال
والصقر البجيك خوجال
صوتن كان يمين جلجال
ومكسيين كمال وجلال
لكن الزمن اسرع
سيفن بلحس الفقره
وما كان برضو بالحقرة
وكانوا بضبحوا الشقره
وكانوا بضوقو العادوه نوم الكوع
وكانوا بموتوا فى شان حرمة المفزوع

الجعلى اب شرابا حار وقالوا بعدى يومو خنق
والشايقى البياكل النار وفوقو نحاسو متخنق
ودرفون البجا الصقار وحاقب سيفوا ياكل الشق
:lool: والغرباوى عينو شرار وكضب القالوا عندو عرق
والنيلى البعرفوا كتار على كتل الأسود جرّق
والبطحانى والشكرى وغيرهم من أهل فخرى
ومنهم أصلى لا بشبع ولا بقنع

هوى يا وليد
حصل جربتا كب السارية
فى القلعة وخلا العتمور
وشفتا بروقه تترقص وتتحرقص
تقول مطويه فى قرقور
وعاوى الزيفة ينفخ فى جبال النقعة زى الصور
والحصحاص يجرفوا السيل
يكنسوا على مهاوى الخور
وقلب الصاقعة يتطرقش
يكب النار دمار وشرور
وشفتا الحال عرق مقلوع
جبل متروم فرع مكسور
جمال غرقانة بى حالا وحد المويه فى الغرغور
ود ابن ادم المسكين نجاتو تحت قرون التور
والعوتيب يجيك يجرى يشيلك وانتى ما بتدرى
وما بيرفع

هوى يا وليد ...
حصل سادرتا بالديداب
وقدامك مراحك وراكب الخباب
ودربك طولوا يملا العين
سحاب وغبار ومويتو سراب
وهوى كرباجك البكاى
يبكى على ضهور الضمر الانجاب
وتسرى الليل وما تضوق هجدة
لو كان النجم ما غاب
وبعد أيام تجيك لفته
ويلوحلك فى البوادى سحاب
وتكرف من دعاش العينة تملا رئاك
عطر وأطياب
تلقى الوادى خضر زى تقول
ماكان خراب ويباب
وبت ام ساق تقييل من ضحاها
على المعالى ونسمة الهباب
وتفرش ليك حزمة نال تحت
سيالة تريانة فروعها قراب
وتنفخ كل آهاتك مع المزمار
تصوغ الحان ملانة شباب
وتنسي الدنيا كل الدنيا
ماعندك معاها حساب
خلاف برقا يشيل حرقاص
أو رعدا تقول رصاص وكت فركع

هوى يا وليد ...
حصل صحاك عز الهجعة
صوت شتماً بعيد مخنوق
وجاتك شخرة الطنبارى مشتاقاً يسوى القوق
ونومك طار واتقسم والرشرش صبح مفروق
واتلفحت نص من توبك الجرجار
على الدلوكة سايق سوق
وتلقى هناك بنات بلدك ولاد بلدك
يعلو الصفقة تقدح فى القلوب الشوق
ونغم الفال ابشرن يا بنات بالخير
والجنيات تطير لا فوق
وكم زغرودة تتفجر تفور بالناس بعد ما تروق
يعوم الوز صدورو تشابى للمجهول وما بتضوق
تميل زينوبة زى البان يمين وشمال تودى الطوق
واخوان ام شلخ ينكبو جوه الداره
زى صقرا نزل من فوق
ضرب الصوت والركزة بيفرق الناس
عشان زينوبة ما بتحوق
وعاد تتحزم الجنيات وتتنظم تقيف في روق
وكل واحد يهز ضرعاتو والحجبات تزح لافوق
جفير الخوسة فايت الكوع
وسيرو مع العضل مطبوق
والطاقية تحت الحاجب المعقود
هدية أم زين وما مشرية من السوق
ويتقدم عريس السمحة رافع صوتو
كان بسوقوا بيهو النوق
والعنجاوى ينزل فوق ضهورن
بس تقول منشحطة فيهو بروق
يبدا مجرو بالترقوة ويتحدر
مع الضلع القصار ملصوق
واحمر عين يشم الدم بعد ما يرش بنات
عمو ويزيدن شوق
وثابت حيطة لا بتهز ولا بتلز
وصارى جبينو كلو عروق
وقال بعد العقد طلقانة ما يحجزوهو
إلا يخلو ضهروا شقوق
هناك الحال مغير جد وهيجة الناس تفوت الحد
:lool: وكان حجازو مد الليد بتسمع كع

هوى يا وليد ...
حصل شارفت دغشا بدرى
فوق حجرة مخانق النيل
فى سنة تساب والشرقي
حزم القيف وطفح الكيل
وشوفتا الهيبة فوق اسيادا
والشخرى البكتل الحيل
وشفتا الجارى يحفر فى جروف كوكبنا
بس داير يشقو عديل
يجيك بي صدرو متحزم ومتلقف صفوف فى صفوف
يحاكى الخيل
ومويتو الهايجة تبلع جب
وتجقم فى مدالق السيل
وفوق الرملة مشرور العشارى طويل
معشعش بين نوايبو الطير
حليلو جزايرو جاها النيل
وحالف ما يخلى شبير
حزم اطرافا يكسر فيها
بالهدام وينحر فيها بالقرقير
وبكرة يموصها يشرب طينها
يزرع فيها شلالات هدير وهدير
وتكسح مركب النواتة عايمى
على قرون الموج جناحها كسير
رواسيها مالى اصابعوا فى المجداف
يقوم لافوق ويجى من تانى فوق الدفة
رافع ايدو ينده جملة الصلاح واهل الخير
هناك الموت يمين شافوهو شوف العين
ومافى شفيع ومافى مجير
تقول الزول يعرف اجلو
ومكان موتو لولا إنو ما كشفو الإله لى غير
عاد ما دام رقاب الموج تمد لسناتا
فوق للقيف تكب الصير
وشن فضل بلا الغرق البدور ناعى
وفعلا كانوا يا هو مصير
ومشيت المركب الغرقاني بين موجتين
طفروا منها النواتا بطن اللجّة قالوا اخير
تماسيحاً يقالدوا الموج يصارعوا
عتاوة العرق الكتالو مرير
ساعة يعومو بالضرعات وساعة فج
صدورن ضمة مااتبلت ولو قطير
ديل يا وليد ولاد النيل
رضعو الهيجة من صدروا
ومن الطيبة رضعوا كتير
الواحد فعايلو كتر ونضمو دقاق
نهرتوا يمين تسوى الفاق
ومراً أصلاً لا ضاقوه لا بنضاق
كفاك يا وليد بلاش فاقة
خلاص أنا تهتا فى الاشواق وما برجع
وهسع ضمة لا شايفك ولا بسمع .

[بوح]

ود كسلا ..

مجهود رائع .. ومشاركه فاعله ..


لك ودى وعمق الحروف




ودام الود

[الشايقي ود كسلا]

د. أحمد الأمين محمد - المكني بالمتججه الأممي من اميز فضاحلة شعر الحلمنتيش كدي نشوف قال في
غزل في السستر

أنا العيان
حرارتي الضاربة فوق ميتين
و لا بينفع بخور تيمان
ولا بتنزل بنوفالجين
رقدت سنين
سريري تعب
مركب فوق وريدي درب
تعب و رعب
جحر عيني يدخل فارة أم سيسي
و أجرجر نفسي بالسيسي
أتقول مخنوق
مصنقع فوق
و كل ما يوم يشيلوا الدم
يزيدوا الهم
يقولوا مقاسو طالع كم.. و طالع كم
و أنا الساكت و غالبني
و غالبني
محل ما أشوفها أتكلم
و ما بسلم
و حاكي البلي و الشمبر
و كان قمت
بقع في السلم أتكسر
عشان تظهر
تمر بسراير العنبر
و تاخد نبضي بت سستر

عيونها الزي عيونها براها
تطعن بالإبار مرضاها
و إبرة ترك و في منديل
وما بتتعب
تكركب في البلاط كركب
وقلبي يدق يسو رب رب
و ناري الليلة تتعلق
دا عنبر كم؟ و شايل كم؟
دكاترتو كم؟
و فت سستر؟؟؟

تجهجه في خلايق الله
و أنا العيان
حرارتي المابية تتدلى
أدوش دوشة
أهضرب هضربة زولا
رقد في برشو خت رويسو فوق بنبر
و لما الناس تقول هستر
وتتغالط.. أظن هستر
أظن دفتر.. أظن بامية.. أظن كستر
أدق الطارة وأتحكر
أدوبي أشكر السستر
أوصف في بنات آوى
كضب كان قالوا بتداوى
و فاضل في المداواة الكي
و ما أظن زاتو ينفع في
أدوخ كلما العيون ترمش
و لما السلسلة تكشكش
أزوغ أتضارى في الكورودور
واخدر لابسة بقت نور
و خاتة الكاب على جنبة
و راشة الريحة فايحة زهور
تموت كرعي أقع و أزحف
وراك طرطور
عشان أرتاح
عليك الله و عليك الله
تفجخي راسي بى ساطور

[الشايقي ود كسلا]

القصيده لاحد طلاب جامعة الخرطوم واحد افراد فرقة حلمنتيش كتبها في صديق له يدعي عبدو
كدي نشوف قال شنو

قصيدة عبدو

في الليلة ديك
القصة ذاتها بقت عليك
يا عبدو وأدوك الشريط
يوم قولنا ليك
أنضم معاها وكلّمها
لكن أبيت تسمع كلامنا
بقيت لميض
وقلتَ.. أحسن أكون تقيل
أنا ما جميل
باكر بعد باكر
بكهربها ليك بي نظرة كتيل
وبقيت تقيل
لامن سقوك موية الغسيل
يوم جيت تنطط زي زمان
وتباري بقعور الشجر
كايس كراسي الخيزران ..
وقعدتَ يا زينة الرجال
كهربجي قال
رفعوا الستار
والبت تجي و تمشي و تلف
مرات تقيف
ومعاها كان زولاً حريف
والوقفة كان وقفة ولف
صاحبنا بالاحساس عرف
وسألتَ والناس كلّموك
ملعون أبوك دنيا أم قدد
بقت البقت
ووقعتَ في شارع الزلط
تبكي وتجعّر
والعيون اتورّمت
يد القميص.. ضهر القميص.. كم القميص
حتى الفنيلة اتشرّطت
يا عبدو عيب
قوم يلا صلي على الحبيب
الواطه صبحت داير ننوم
يا أخوانّا لأ
أنا عايز أموت أقع البحر
يا عبدو عيب
الدنيا حر .. والموية بتسخّن عليك
ثلاثة ساعات في الطريق
وزولنا قاعد يسب ويكيل
ودموعو سايلات بالكفوف
وشرايطو تلمع في الكتوف
بقى فيلسوف
شي كلام عن الدنيا أم قدود
وعلاقة بين يوم السبت وعين الحسود
ومقارنات بين الجمال
والجهل وسوء الإختيار
قال شينة قال ...!
قال شينة قلنا كلام صحيح
وخطيبها زاتو ولد قبيح
بس ياخي قوم
الواطة ليل.. دايرين ننوم
قام تاني جاب سيرة البحر
وقام تااااااااااااااااااني جاب سيرة البحر

[مامون مهنا]

شكراً ايها الجميل ...........

[ابو جعفر]

والله ابداع

ومافي كلام يا ود كسلا

وبالمناسبة انا اول مرة اعرف بي شعر الحلمتيش ده شنو

وبقصد شنو هو اليوم

بس لقيتها اشعارها مبالغة

فارجو منك المزيد كل ما سنحت لك الفرصة