النقد حار ولكن اقبلوه

[نانا]

لا اتعمد دوما النقد ولكن مجازفات وشطحات عزيزى المشاهد تدفعنى الى الكتابة وهى مجردة من اى شى شخصى مسابقة تفرز فى برنامج عزيزى المشاهد القصد والمعنى واتوقع ادخال مسابقة زين فى عزيزى المشاهد اخاف ان يكون الامر فراغ فى الاعداد وحشو للزمن التومات او تلفزيون التومات سمة من سمات عزيزى المشاهد كل اربعة حلقات لزاما علينا نشاهد تومات خيرى وبالمناسبة لولا وفاة ابودية وتقاعد السنى الضوى لما ظهر التومات بهذه الكثافة المملة التومات فى ليالى النغم تسجيل رسمى وكبار العمالقة لم يسجلو فى ليالى النغم محمد ميرغنى وابراهيم حسين ولكنه ديدن التلفزيون فى التقديم والمجاراة حتى وان كانت التجربة هشة جديدة يجب ان تاخذ زمنها حتى لا تقتل فى مهدها عزيزى المشاهد يتجاهل دوما اراء مشاهديه ولوا الضغط من اسرة كومى لاستمر التجاهل سنينا تكريم عوض جادين تكريم زاتى لاهل التلفزيون لمديرهم السابق مثل عشاء العمل والمناسبات البرتكولية الاخرى لا داعى لتمريرها الى المشاهد لاننا لا نستفيد منها شى وان كان التكريم مثل المسابقة اوامر ادارية فلكم ما اردتم ويستعد المشاهد لمشاهدة الكثير الكثير فى اطار الطاعة العرجاء على حساب المشاهد .. اقلب الصفحة .... جهزوا الريموت الى قناة هارمونى اسفاف باسم السودان عرض ثقافات سودانية كم يقولوا لا تعبر عنا اين الجهات الرقابية ... اقلب صفحة جديدة قناة زول رقص فاضح صور مشوهة لوطن جميل قناة النيل الازرق مواضيع هشة لبس محزق المشاهد ضائع بين هذا وذاك 0000 اربعة اصفار فى صفر يساوى صفر

[منير عبد القادر]

.... جهزوا الريموت الى قناة هارمونى اسفاف باسم السودان عرض ثقافات سودانية كم يقولوا لا تعبر عنا اين الجهات الرقابية ...

مشكورة نانا ..وين ناس هارموني يا جماعة

[عماد ساتي]

او تلفزيون التومات

الأخت نانا .... حقاً انه تلفزيون التومات ... وجارى تصميم شعار جديد :d


تحياتي

[النور معنى النور]

بغض النظر عن اى اراء واردة ... سعدت جدا بمواصلتك الكتابة ايتها الغالية التى نحبها جميعا ...ايوة كدة كلام فى الصميم ... انقدونا تمام عشان نتصلح ونصحح لانو الحمل تقيل ...

بالمناسبة موضوع فرز المسابقات دة صراع قديم بين اسرة عزيزى المشاهد وادارة القناة القومية

لانو ناس حامد وصلاح وسوسن دايما برفضو لكن ادارة القناة بتصر انو الفرز يكون يوم الجمعة وفى عزيزى المشاهد ..

قبل كم شهر حضرت لى شكلة لانو المخرج حامد عثمان رفض ينزل مسابقة لتاثيرها المباشر على سيناريو الحلقة وكاد ان يستقيل بسببها ....

بصراحة الناس ديل فى موضوع المسابقات معذورين .....

اما باقى الحاجات يا نانا فانت حرة معاهم ......انا اخلى الساحة بيتك وبينهم

[نانا]

اخى النور الشفيف
تاتى اجاباتك مجردة واضحة صريحة وهذا ما يعجبنى فيك لذلك اسالك سوال مباشر لماذا تتجاهل كتاباتى فى البيت السعيد

[النور معنى النور]

اخى النور الشفيف
تاتى اجاباتك مجردة واضحة صريحة وهذا ما يعجبنى فيك لذلك اسالك سوال مباشر لماذا تتجاهل كتاباتى فى البيت السعيد

لا والله يا نانا .... ما مقصود اتجاهل كتابات اى زول ...

بس فى اغلب الاحيان ما بكون جنبى جهاز شغال او موصل او يكون الاشتراك الشهرى كمل .......او اكون مزنوق فى اجتماعات ومتابعات طريلة ...او ربما محبط او حزين او مفجوع فى احد الاصدقاء ......الخ

وحتى لو سهيت مرات بلقى رسائل فى الخاص او الموبايل من الحباب منير عبد القادر او بريقع او الريس ابو عبد الحفيظ يلوموننى على عدم المشاركة او التاخير ...

انا اعتبر اى زول يدخل ويشارك فد اهدى لنا هدية غالية ...
وانت كتاباتك بتجيبى فيها افكار جديدة واراء مثيرة وبتقلبى مواجع ..تهيجى اشجان وتجرجرى رجال للدخول فى نقاشات حامية وجادة ... ودة كلو حاجة تمام ... وابقى احمق اذا ما اتجاوبت معاهو وما شاركت فيهو ....
واشكرك على المداخلة ...واعدك بمراجعة كل الكتابات الاخرى ...لانو مؤكد فيها افكار جديدة ...

[ابو عبد الحفيظ]

لك التحية اختي نانا وليت الاخوة في عزيزي المشاهد يتسع صدورهم لقبول اراء المشاهدين

[الحضري]

مشكورة نانا ..وين ناس هارموني يا جماعة
الاخ منير مع التحيه , اعتقد قناة زول قبل قناة هارمني , قناة زول قمة التناقض الزول في وادي والقناة في وادي اخر , تشوف العمه البيضاء والوجه الاسود ( هو الزول زاتو) تدخل البرنامج ( تتلخبط) انت دخلت الروتانات ولا شطحت قمر اخر,,

[محمد عبيد ادريس]

الاخ منير مع التحيه , اعتقد قناة زول قبل قناة هارمني , قناة زول قمة التناقض الزول في وادي والقناة في وادي اخر , تشوف العمه البيضاء والوجه الاسود ( هو الزول زاتو) تدخل البرنامج ( تتلخبط) انت دخلت الروتانات ولا شطحت قمر اخر,,


اخى الحضرى ما اتمناه ان نسقط قناة زول من حساباتنا وذلك لان القناه لا تتحدث عن الزول السودانى وقد يقصدون الانسان الاسمر او الاسود فى كل مجاهل افريقيا عدا السودان .
لان ما يقدمونه لا يتلائم مع الزول السودانى .
وهى اصلا مملوكه لراس مال خليجى وهو شركة الفجيره ميديا ... وطالب صاحب الشركه بان لا يتحدث اى شخص باسم قناة زول .
فان زول ليست سودانيه ولن تكون وان كان مديرها سودانى ...

مودتى ...

[شرف محمد الحسن]

الأخت نانا
تحياتي وسلاماتي
صحيح النقد حار ،، لكن مكابر من يقول عاجبه حال فضائياتنا،،
وعلى العموم من غير نقد هادف ما بتتصلح العيوب ..
أرجو أن توجهي لنا بعض المشاهدات و الإقتراحات في الجرافيكس ، خصوصا ونحن بصدد تغيير كامل لشكل وحركة الجرافيكس و عمل هوية متكاملة للتلفزيون ..

[نانا]

هذا الموضوع او البوست قديم جدا

[خالدمحمدحمد]

الاخت نانا لك التحيه ..... والله المثل بقول اسمع كلام الببكيك ما تسمع كلام البضحكك وحقيقه كلامك في محلو .... وخاصه قناه زول التى لا تتماشه مع عاداتنا ولا تعبر عن الزول السوداني .. لا في مضمون ولا في شكل ... والسلام