مكتبة الاستاذ مصطفى سيد احمد

[العربى]

مصطفى سيد احمد

[فقط الأعضاء المسجلين والمفعلين يمكنهم رؤية الروابط]اااالل.jpg
اسم نثر عبيرة فوق سماء الاغنية السودانية
ونحت اسمة فى دواخلنا يعلمنا كيف ينبت الحب فى دواخلنا
كيف نعشق مريم الآخرى وعم عبدالرحيم فى الزمن الخرافى لنودع الحزن النبيل
والشجن الاليم..
لااستطيع ان اصفة او اتغزل فيه شعرا فهو مدرسة كاملة ومتكاملة
باختصار هو ظاهرة كونية عدت فى حياتنا قد لاتتكرر مرة اخرى.
رحل عنا استاذنا ولم يترك لنا سوى صوته وكلماته التى ترنم بها
اردت ان اخصص هذه المساحة لكل الكلمات التى تغنى بها
فى محاولة لبناء مكتبة تليق بعظمة الراحل ..
لذا ارجو من الجميع التعاون معى واضافة مايسهم فى تحقيق الغاية



غنينا ..قول يازول

بُعد السمافه براح

من جرحك النزاف

رسِّل .. غناك صداح

نوِّر مداخل الليل

بصبحك الفضاح

شِد الوتر ..دندن

وأفرد نداكَ.. وشاح

طيور القمري.. ماغنت

ولا لوّن مداك شادي

حليل ولداً بشيل همّك

شرّ غناهو في الوادي

نده مطراً سحايبو ملت

وشتت برقو عبّادي

وليد الصابره ( ست الجيل) *

رقد واقف قصاد النيل

حبيباً جرحو فينا نزيف

وفكراً فاتح التأويل

مرق من بين ضفاير البنت

حبيبتو اللونا.. كاكاوي

نهارا شمالي .. كتـّاحه

مناخا جنوبي..غرباوي

دخل شرق الحِلم حفيان

سند ظهراً .. حناهو الهم

حليلو الكان جميل النم

حليلو .. البينّا خوة دم

[النور معنى النور]

لمن يجى الزمن الفلانى ..
دمعنا بتقطر مطر .. درى ..
وتمازج برتكانى

بسطر اسمك يا حبيبنا
فى رموش غيم ارجوانى

ندمن الضحك الخرافى
نحيا فى الفرح المورد .. ياسمينا اقحوانى

# # #

يا حبيبنا ال جوة عينيك عايش انا
بتسجل الايام اغانى

والطريق ما ببقى ساهل .
ليك بالمعنى المكانى

لما يتحقق زمانى
وامسح الحزن المعشعش
فى عيون .. الاسمرانى

# # #
يا حبيبنا تحيا فى حلم الترابلة
وبالعلاقات المعانى

فى البقاسى شقى المسافة
وعايشة فى داخلو ... وبعانى

لما يتحقق زمانى
بقبض النخل الحقيقة
فى الصباح ال ابيضانى

# # #
لمن يجى الزمن الفلانى ...

[العربى]

ابداكى من وين

ابداكى من وين..

وفينى منك لسة حاجات

من مخاوف ومن شجن
أبداك من وين وظنى إنك

فكرة إعلان الحيـاة
وانتهاءات العوارض والمحن
نفسى ألقاكى وأكون

انا كلى من بعضك
أو بعضى من كلك بدن
داير ألقاك وأوحد دايرة الدم
المقسمة بينى بينك والشجن
أبداك من وين

ابداكى منى ..
ولا منك أبتديك محل محل
من ياتو منفذ بدخلك
كل الدروب الفيكى سداها المحل
من ياتو شارع بوصلك
كل الدروب معطونة لآخر الوحل
بستبيح كل المنافذ وادخلك

من بين كلامك بدخلك

من ابتسامك بدخلك

من بين مسامك بدخلك

من أى قاسم مشترك
أو شبه التشابه بدخلك
نتلاقى نهرين من تسامى وإشتهاء
أبداك من حيث انتهت
عندك خواطر الإنتهاء

أبداك من وين



مشروع الحلم الفسيح
يا مشرع الحلم الفسيح

أنا بينى مابينك جزر

تترامى .. والموج اللّديح

القدرة والزاد الشحيح

كملتو .. ما كِمل الصبر

نتلاقى فى الزمن المريح

ميعادنا فى وش الفجر

يا مشرع الحلم الفسيح

***************

يا مشرع الحلم الفسيح

يا بعض منى .. وفينى ساكن

أنا أصلى منك ومشتهيك

وبيناتنا ليل الغربة ... داكِنْ

هبّة هبوبك..

أفتح شبابيك المساكن

وسـِّع دروبك ..

ولـِّع مصابيح الأماكن

*************

يا مشرع الحلم الفسيح

يومنا النـّهِـبْ .. أسلِبنا خوفنا

كبـِّرنا قدرك .. مرتين

وطـِّول قدر كتفك .. كتوفنا

يا رغبة الرعد البيسكن ..

بين غناوينا وحروفنا

ضوِّى الدساكر والضفاف

عبِّى الحناجر بالهتاف

سدِّد مسامات الرِّعاف

نوِّر مغاراتنا وكهوفنا

*******************

يا مشرع الحلم الفسيح

أنا وإنت .. والمطر الفصيح

حنطوِّع الزمن القبيح

ناخد بعض .. شكل السما

حدِّثنى دايماً .. كلما

تنشف على البر الضفادع

يهجر الضو المواضع

وتسقط من الكف .. الأصابع

حدثنى دايماً كلما

تحرد مراسيك السفن

تسكن مرافيك الزعامات .. الدُمى

حدثنى لو تاهت خطانا ..

على الدروب المبهمة

أو ربما..

تهدم آلات الشوارع ..

وترجمْ العُزّى الصواقِع

حدثنى لو مطرك همى ..

حدثنى لو صادف الكى المواجع

وضلك على الساحل رمى

حدثنى لو مطرك همى

علمنا دايماً كلما

نبذر على أرضك شهيد

يطلع شمس ..

يبهر بأنوارو السما



يا مشرع الحلم الفسيح

[العربى]

كان نفسى اقولك من زمان

كان نفسى قولك من زمان

عينيك وحاتك غربتى
وأهلى وبلادك الفيها

ضائع لى زمن..

عينيك وحاتك شوقى

لى زولا ولوف..

من بعدو ساب عينى سهن
وأنا كنت دايرك من زمان
أشرح حكايتى معاك الف
أحكيك وأزيد القول ولف

وأتمنى لو قلبك عرف

كان من زمان

من قبل مافى قلبى يتحكر
زمان الفرقة فى جرح لأسى

من قبل ما حرف الحقيقة

الحلوة يتبدل عسى

ويصبح امنانى كتيرة

فى خاطر الحنان

كان نفسى اقولك من زمان





الحزن النبيلوبقيت اغنى عليك ..

غناوى الحسرة والأسف الطويل

وعشان أجيب ليكى الفرح

رضيان مشيت للمستحيل

ومعاكى فى آخر المدى

فتينى يا هجعة مواعيدى القبيل

بعتينى لى حضن الأسى

وسبتينى لى الحزن النبيل

***************

ومشيت معاك..

كل الخطاوى الممكنة

وبقدر عليها .. وبعرفـا

أوفيت وما قصـّرت فى حقك

ولا كان عرفة غيرك .. أصادفا

وقدر هواكى يجيبنى ليك

جمـّع قلوبنا .. وولـّفا

وكتين بقيتى معايا .. فى أعماقى

فى أعماق مشاعرى المرهفة

لا منـّك إبتدت الظروف

ولا بيكى أنتهت الأمانى المترفة

*********************

ندمان أنا ؟

أبداً وحاتك .. عمرى ما شلت الندم

ما أصلوا حال الدنيا ..

تسرق منية فى لحظة عشم

ندمان أنا؟

وأنا عندى ليك كان الفرح

رغم إحتمالى أساكى يا جرح الألم

وكان خوفى منك

جايى من لهفة خطاك على المواعيد .. الوهم

ندمان أنا؟

أبداً وحاتك .. عمرى ما شلت الندم





عدى فات

عدّى فـات ..

زمن العيون الإلفـة

والحضن الملاذ

ورهـافة الحس البلوّن .

ضحكة الناس العـزاز

بعد الحنان .. الكان زمان

إستوطن المطر .. الحراز

*********************

روّح زمانى .. وفى رجاك

عانيت قساوة الإنـتـظار ..

فى ضل شبابيك السفر

صادقت ليلات الموانى ..

الـساكنة فى بحر

الأمانى بتنتظـر

لو يوم طيوف لحظك تفوت

تعبر خيالات تمر

قلق المواعيد الضّجر

سهر العيون ... الإحتراز

إتعزز النوم ..فىالخـدار ...

وإتمدد الشقا فى العمر

*********************

ملّيت تباريح الجراحات البقت بعدك أسى وزمناً قسا

وحالاً أسيف

ومشيت أفتش عن

خطاويك القبيل .

واضّارى من زمناً ..

وراك ملانى خـوف

أشتقـت ليك ..

اشتقت أرتاح فى عيون

فيهن ملامحك ذاتا

من غير أىّ .. زيف

وإشتقت لى حكة صباحك . والدعاش عطر رزاز مطر الخريف



المسافة

لسـّة بيناتنا المسافة .. والعيون .. واللهفة والخوف .. والسكون

ورنة الحزن البخافا

تعدّى بى الفرحة ... وتفوت وأمشى بى الحسرة .. وأموت

***************

الأمانى الفى سفر ..

قبل الزمن .. كايسة الموانى

يوم تجيبنى عليك .. بصدّق

إنو مرة الحظ طرانى

وإحتوانى معاك شجن ..

عذبنى قبلك..

ولسـّة منك .. جايى تانى

تمشى وين الخطوة عنك

ما الزمن بى الحب

بلاك .. وإبتلانى

**************

لى عيونك يا مداين الفرحة

والحب .. والجسارة

عندى ليك مليون بشارة

وألف خير ... والكلمة شارة

وإنتى لمـّا الحب يهـوّم

فى عيونى.. وفى عيونك

يبقى حائر .. بالأمارة

الفرح منك .. يجينى

يعترينى الخوف عليك

خطوة منك .. خطوة ليك

راجى منك بس إشارة

وكلمة تدينى البشارة

ولاّ بيناتنا المسافة ؟




عينيك مدن
عينيك مدن..

منسية فى كتب التواريخ والزمن

عينيك وطن...

مشدود على وتر التباريح والشجن

ممدود على حروف الكتابة

مكدود عَـنا .. ومكتول صبابة

وفيهو حـطّ النيل .. سكنْ

***********

عينيك سفر...

مكتوب أعيش فى غربتو

وأعشق عذابو .. وحُرقَتو

وليلو الطويل..

وأتخيـّلك يا حلوة زى نسمة سحر

جيتى ومعاك .. حلمى المطوِّل

ومنتظر .. وعدو الجميل

عشقك زمان .. جوّاى رحل

وإتناهى فى الأعماق .. أمل

ضمخ رؤاى .. إحساس نبيل

أذهل طيوف خاطرى القبيل

جاشت ملامحك روعتو

وضجّ السكون .. فى وحشتو

والكان أمل فى عيونى لاح

ذوب مدارات فرحة الوهج

النضير المزدهر بالإرتياح

فجأة إنحصد قبضة رياح

وسكت الكلام يا حلوة

فى القول المباح

وغام الصباح .. بعدِك رحل

**********

والكان أمل فى غيم سماك ..

أيقنت إنـّو عدم بلاك

وإنـِّك قدر .....




قلت ليها

قلت ليها وإيدى فى إيديها ..

ودمعة حزن سالتْ

جايى منـِّك .. وماشـِّى ليك

لا مداين غربة طالت

ولو مدارات نجمى ضلـّتْ

سكة السفر إستحالت

كونى فى دربى الحقيقة

الديمة ليها مشاعرى مالتْ

***************

قلت ليها ...

وكنت راجع لى عينيها

من أسى الزمن البسافر ..

فى المشاوير العصيبة

من متاهات الأماسى

الفى مداها ..

الحزن مضناها .. وحبيبة

بينى لا بينك .. مزار

لا محطات إنتظار

ولا مواعيدك قريبة

إنتى يا الفرح الحقيقة ..

المستحيل

هدْهِدى الصبر الجميل

وأمسحى الحزن المخيِّم ..

فى المدارات الرحيل

**********

قلت ليها

الحقيقة الضايعة بين

قلبى .. وعيونك

إنى لا قادر أفوتك .. لا أجيك

وإنِّى ما عارف بدونك

ألقى كلمة حب ..

تزف البشرى فى ساعة مجيك

إنتى عارفة .. وقلت ليك

يانى أكتر زول بريدك

يا نى صفوة عاشقيك

يانى راكز الحيل عليك

ولسـّة بى حبك ..

متيَّم .. ومبتلِى

إلاّ ريدك .زادنى حيرة

على العـَلىْ

لا مراكب القدرة ختـّنْ

قلبى عندِك

وإنتى لا قلبِك نسانى

ولا خَلىْ ..


يا جرح عزة هوانا

ياجرح عزة هوانا

الساكنة فى حرف الكتابة

أصلو فى زمن الأسى

المشدود على وتر الكآبة

فى زمان الحرقة ..

والخوف ..والرتابة

إنكتم نبض الأغانى

وإنبهم حس المعانى

وإنجرح خاطر المهابة

************

جيتنى فى الزمن الأليم

وقلبى مثخن بى جراحات الهوى

وعمرى ضايع فى متاهات النعيم

فى دروب الغربة

لا تاب .. لا قِوى

كان عيونك فيهن الوصف القديم

معنى فى الحب .. إنطوى

وضاع معاك زمن الوسامة

وإختفى الفرح العلامة

الا يا حزن الملامة

من سنين دربك .. سلامة



قمر الزمان

كتبت ليك ...

لا بينى بينك ريدة ..

لا قصة غرام

إخترت ليك ....

أجمل حروف وأصدق فواصل

نادرة فى لغة الكلام..

لا قصدى ألهو معاكى

بى كلمات غنا

لا شعرى ليك مرجيحة

من شعر الغمام

كتبت ليك والله يا قمر الزمان

شان جيتى بى زمن المحنة

وشفت فى عينيكى ..

حس أهلى القُدام

*************

كتبت ليك وأنا جايى

فى زمن الشقا

المرسوم على وش

الثوانى .. مظللا

تتمدد الساعات سنين

تتفتح الأحزان غريبة .. ومذهلة

وأشتاق أفتش نسمة ..

فى الزمن العذاب

وأيامى من كتر الأسى

وكتر العزوف .. والإغتراب

صارت حروف مترهلة

لحظات أسيفة .. ومهملة

*****************

كتبت ليك .. ووقفت ليك ..

لامن لقيتك جايه

من قلب الطريق

ولمحت فيك

راحة المشاوير البعيدة

ولنفحة النسمة الحنينة

الجاية من جوف المضيق

حسيت عجايب الدنيا إتلمـت

بقت جايـّانى من عصراً سحيق

عينيكى حس أطفال بنادوا

القمرة لى الغايب .. يعود

وجبينك الضوّاى

حجا الحبـّوبة فى الزمن السعيد

يا قمرة اقلبى السنسنة الحمرة

وشوفى ليه ما جا

-***********

وأنا فى قساوة الموحش

الزمن المكهرب .. بى الحريق

أنا حيلتى أيه

قولي لى يا قمر الزمان

غير أتـّكى .. وأحلم معاك

وأحضن أماسى الصحو ..

والأمل البريق



الشجن الاليم

عارفنى منك ...

لا الزمن يقدر يحول قلبى عنك

لا المسافة ولا الخيال يشغلنى منك

عارفنى منك ..

تحرمنى منك

والمواعيد لا بتجيب منـّك .. تودِّى

لا الشجن قادر قادر يسوقنى عليك

أعدِّى

لا التحايا ولا المشاعر الحيـّة

فى عمق الحنايا

لا رسالة تجينى منـّك

لا خبر طمنـِّى عنك

وإنت سايق فينى ظنك

رغم إنك .. إنت عارف

إنـّو منك .. لا الزمن يقدر

يحول قلبى عنك

لا المسافة ولا الخيال يشغلنى منك

*************

وابقى بعدك فى الاسى

وتبقى انت الظالم القاسى النسى

وغصب عنى ازيح ظنونى

واقول عليك انت المسامح

وفوق شجونى

اعيش زمان بالفرقة جارح

وفى احتمالى وبالى منك انت سايق

فينى ظنك عارفنى منك

*********

يا هوى الألم النعيم

خليك على الوعد القديم

وخلينى فى الشجن الأليم

وأبقى فى كل المداين

سكتى .. وسفرى الجحيم

تبقى أيه الدنيا من بعدك .. تكون

وأبقى أيه بعدك .. أكون؟




رحت ومشيت

ومرقت من قلبك مشيت

طفت الشوارع والمدن

لفيت حوارى الدنيا جيت

فتشت فى عيون الزمن لى سكتك

وكم من مشيت

لا لقيتك انتى ولا بقيت

القى المواعيد يصدقن

لا بعدك الايام صفن

لا قدرت اعرف وجهتك

وسرحت فى خاطرى وسهيت

فى ذكرتك ..

سفرك ومشاويرى

وتباريح سكتك خرز السبح

ممدودة فى جيد الامانى المستحيل

شقهة حروف اللقيـا ..

فى غفلة أسى الزمن البخيل

رنة خطاك سايقانى للحلم القبيل

نتلاقى ما نعرف مدى

واتجاوز النغم الصدى

واتسابق العمر الجميل

أصحى ومعاى يصحى الشجن

ويفيق أساى واساكى جن

والقاكى يغلبنى الكلام

ويشرقنى بالاسف الحزن

ويكفيك خيال ..

فى غمرة الاسى والمحال

القاك شقى العمر اللى فات

والقاك فرح فى غفلة مات

ويلقانى فيك مسدار يغنيلك أساى

دوبيت يجر دمك على حرقى حشاى

قمرا طلع فى غيم سماى

بق وخبا وحاريهو فى

الزمن اللى جاى ...



ريدى ليك الريح بعرفو

ريدى ليك الريح بعرفو

شافو لما كتبت حرفو

ولما بان وسط الكتابة

ضم اسمك بى رحابة

ودس جوة عيون سحابة

عشان بخاف الناس تعرفو

مرة ينسى ويقرأ حرفو

غيمة غيمة وساحة ساحة

واى حتة معاك مشيتها

كنت بستاهل مشاعر

فى ستا الايام لقيتها

ويا حبيبة الخطوة عنك

غربة ساقتنى وابيتها

اعمل ايه يا ست همومى

مانى راحتى معاك نسيتها

قت اكتب ليك حكايتى

الفى جناح الريح طويتها

عشان هواك الريح بعرفو

وشافو لما كتبت حرفو

**************

يا سماحة عينيك واحة

للحزاى الفى ارتياحك

يلقوا راحة

ما الامانى على نجيلة

يا البريدة ومشتهيها

الفرحة فى عزة صباها

لانى لاقى معاك خاطرى

ولانى حاسى معاك صراحة

ولو يغيظنى الريد يعاند

برضى برضو بزيد سماحة

واصلو مافترت حروفى

اصلو باقى الريح جناحة

ولينا ميعاد فى التلاقى

وغربة ما حيطول براحة

[د.ابن النفيس]

[فقط الأعضاء المسجلين والمفعلين يمكنهم رؤية الروابط]

[كاندي]

لمن يجى الزمن الفلانى ..
دمعنا بتقطر مطر .. درى ..
وتمازج برتكانى

بسطر اسمك يا حبيبنا
فى رموش غيم ارجوانى

ندمن الضحك الخرافى
نحيا فى الفرح المورد .. ياسمينا اقحوانى


نسال الله له الرحمة والمغفرة

[ودالكاملين]

الله عليك وعلي أفكارك مصطفي وتاريخه بس لو سمحته
شعراء الاغاني ولو في طريقة المناسبة

[العربى]

انت تامر ياود الكاملين
بس حدد قصيدة وانا اديك اسم الشاعر

[د.ابن النفيس]

[فقط الأعضاء المسجلين والمفعلين يمكنهم رؤية الروابط] ([فقط الأعضاء المسجلين والمفعلين يمكنهم رؤية الروابط])

[ودالكاملين]

العربي حبيبنا داير اغنية مريم الاخري والشاعر بتاعة

[الكردفاني]

تسلم ياعربي وفي إنتظار المزيد من الروائع.
مودتي