يا حليل زمن ... شوفوا دنيتنا الجميلة !!!

[عماد ساتي]

الأخوة الأعزاء

كنت اشاهد قناة السودان الفضائية صبيحة يوم الجمعة 31/8 وفى برنامج الأطفال (ياربى اسمه برضو جنة الأطفال) ... تعالوا شوفوا شفت شنو ؟؟

بدأ البرنامج بدعاية لسودانى شركة التلفونات الخاصة وان البرنامج برعاية سوداني ... لحدى هنا كويس وكون الشركات الكبيرة عندنا تدعم برامج دى حاجة جميلة جدا ... ولكن بدأ البرنامج وعينك ما تشوف الا سوداني غنى الأطفال اغنية لسودانى بالطنبور ورقصوا فيها وكل الأسئلة كانت عن سودانى !!!! .... مثال ما هى الوان شعار سوداني و... و...

بصراحة كده استغلت الشركة رعايتها للبرنامج (ديل اطفال حرام عليكم ) وفقر البرنامج لتعمل دعاية لنفسها لمدة ساعة من الزمن.

يا حليل زمن كنا صغار وبرنامج جنة الأطفال والذى كان بحق وحقيقة جنة لنا الأطفال وزمن ماما امينة والجد شعبان وجحا وغيرهم كثيرين واقول شوفوا دنيتنا الجميلة.

تحياتي

[محمد عبيد ادريس]

الاخ عماد ... تحياتى ...

الموضوع كبير وابو ذر واقف فى راسى .....

برجع ليك .....

مودتى .....

[أرض الخير]

اخونا ساتي كل شئ تغير

حتى الاطفال بقوا يتولدوا كبار.....................

[محمد عبيد ادريس]

اخوى عماد ساتى ... تحياتى ... رجعت ليك

الموضوع كبير واستغلال الاطفال فى السودان وكثير من دول العالم وخاصة الناميه منها اصبح شئ عادى ويمكنك ان تلقى اطفالا فى اعمارهم ولكنهم يقومون باعمال اكبر منهم سنا ومعرفه .. والاسباب كثيره ولعل اهمها صعوبة العيش الكريم فى اوطان صار ارخص شئ فيها الانسان وانسانيته ...

لقد درجنا فى السودان ان نواكب الاحتفالات وان يخصص برامج الاطفال لمثل هذه المناسبات ومنها على سبيل المثال اعياد الاستقلال وهجره النبى عليه افضل الصلاة واتم التسليم وتنحصر الاسئله فى المناسبه المحتفى بها ...
ولكن مع العولمه اصبح الانسان والطفل خاصه مشروع استثمارى رخيص وهنالك كثير من الاعلانات التى فقط للترويج اكثر منها تعليميه ( مثل ان ياتوا لنا بدعايه عن منتج ويقوم الممثل بسرقته لروعته ) ماذا سيتعلم الطفل حب السلعه ام السرقه وايهما سيرسخ فى ذهنه بالله عليك ....
ماذا سيستفيد الطفل من ان الشريحه لها زمن استقبال قرن او سن فيل ..

واللوم على القائمين على هذه الاجهزه لموافقتهم لمثل هذه الرعايه التى كسبها المادى اكثر من كسبها المعرفى ... نتمنى ان تكون هنالك رعايه بالدعم المادى حتى تنفذ هذه البرامج باعدادها الجيد وديكوراتها التى تجذب الطفل للمتابعه وان تكون الجوائز حسب اهتمام اطفالنا ....

اخى عماد الموضوع كبير واتمنى ان يجد الاهتمام من الاعضاء بالمشاركه بالرأى ..
مودتى ....

[البشير دفع الله]

العزيز عماد ساتي
لك التحية والود
ادماني لتلفزيون السودان جايب لي المشاكل مع ( الباشكاتب ) حرمنا المصون .
وادماني لبرامج الاطفال من الزمن السمح داك ناس جحا والسنينه وبريقع والجد شعبان وماما امال وماما امينة وماما عشه بتاعة الرسم , وحتى تاريخه , وبعتبر بابا فزاري واسماعين خورشيد من باقي أهلي .
ياخ مالك علينا زكرتنا الذي مضى ؟؟؟
بجيك صاد

[عماد ساتي]

العزيز عماد ساتي
لك التحية والود
ادماني لتلفزيون السودان جايب لي المشاكل مع ( الباشكاتب ) حرمنا المصون .
وادماني لبرامج الاطفال من الزمن السمح داك ناس جحا والسنينه وبريقع والجد شعبان وماما امال وماما امينة وماما عشه بتاعة الرسم , وحتى تاريخه , وبعتبر بابا فزاري واسماعين خورشيد من باقي أهلي .
ياخ مالك علينا زكرتنا الذي مضى ؟؟؟
بجيك صاد

العزيز بشير دفع الله

يا سلام ياخى ... انت اكيد دفعتنا ... آخر الدفعات التى عاشت العصر الذهبى فى السودان ... بالله تذكر الثعلب وولده .. يا با يا با :D والله منتظرك لازم تجينى صادى.

تحياتي

[البشير دفع الله]

آي بلحيل بتذكر
وبتذكر كمان جنة الاطفال كانوا بجيبوها يوم الجمعة وبجيبوا بعد جنة الاطفال مسلسل سندباد , والعم صالح وعلي بابا , وبالعصر كانوا بجيبوا مسلسل هاني , والليث الأبيض كمان .
يا خوي ده زمن ما بتنسي
الدنيا زاته كانت سمحة , والناس سمحين
تعرف يا عماد
آخر السعينيات يعني 77 , 78 , 79 , كانت التلفزيونات قليلة ونادرة في حلتنا , وكانت طبعا أبيض وأسود , ماركة ناشيونال , وقالوا دي كانت أحسن ماركة , وصندوق كبير أشبه بالخشب أو الفورمايكا , ومافي روموت ولا يحزنون , ومفتاح التلفاز بارز زي مفتاح الرادي تسمع له صرير وتك في الآخر , أبوي كان مغترب في الزمن داك ( يعني الغربة مرض وراثي ) بس أبوي أعقل مني خارج نفسه بسرعه وجاب معها التلفزيون طبعا .
المهم دخل بيتنا التلفاز مبكرا , وعرفه أهل القرية , ومن المغرب يتوافد الجيران على بيتنا لمشاهدة التلفزيون , ويتفرقون بعد نشرة الاخبار التي كانت تقدم في التاسعة مساء , وطبعا لا أنسى منظر النساء , وهن يحملن ( بنابرهن ) , والرجال ( مصاليهم ) , فالاسرة عندنا لا تسع الجميع .
أما يوم الجمعة فيمتلي بيتنا صباحا , كأنه روضة أطفال , ولا تكاد تسمع شيئا من الضجيج , لمشاهدة جنة الأطفال .
كان لكل شئ طعم ومذاق
مخارجة :
والله قربت أبكي
............

[أم آية]

العزيز بشير دفع الله

يا سلام ياخى ... انت اكيد دفعتنا ... آخر الدفعات التى عاشت العصر الذهبى فى السودان ... بالله تذكر الثعلب وولده .. يا با يا با :D والله منتظرك لازم تجينى صادى.

تحياتي

عماد ساتى والبشير دفع الله يديكم العافية
الناس ديل انا زاااااااتى بتذكرهم (بس ماتقولوا عجوز وللا كبيرة, صغيرة وجاهلة )
دا كان زمن وردى وجميل عشنا فيه كأطفال بحق لكن اطفال اليوم غصبا عنهم بحسابات المادة والانترنت طلعوا اطفال كبار ومااستمتعوا بطفولتهم زيينا ووقعوا فى يد اصحاب المصلحة والفائدة زى سودانى البتعمل دعاية لخدماتها عبرهم
عليك الله زمان كان جرس التلفون رن جمبك بترد عليه؟؟
هسى الماقام من الواطة شايل موبايل
تقول لى طفولة !! ديل بسنونهم

[أم آية]

آي بلحيل بتذكر
وبتذكر كمان جنة الاطفال كانوا بجيبوها يوم الجمعة وبجيبوا بعد جنة الاطفال مسلسل سندباد , والعم صالح وعلي بابا , وبالعصر كانوا بجيبوا مسلسل هاني , والليث الأبيض كمان .
يا خوي ده زمن ما بتنسي
الدنيا زاته كانت سمحة , والناس سمحين
تعرف يا عماد
آخر السعينيات يعني 77 , 78 , 79 , كانت التلفزيونات قليلة ونادرة في حلتنا , وكانت طبعا أبيض وأسود , ماركة ناشيونال , وقالوا دي كانت أحسن ماركة , وصندوق كبير أشبه بالخشب أو الفورمايكا , ومافي روموت ولا يحزنون , ومفتاح التلفاز بارز زي مفتاح الرادي تسمع له صرير وتك في الآخر , أبوي كان مغترب في الزمن داك ( يعني الغربة مرض وراثي ) بس أبوي أعقل مني خارج نفسه بسرعه وجاب معها التلفزيون طبعا .
المهم دخل بيتنا التلفاز مبكرا , وعرفه أهل القرية , ومن المغرب يتوافد الجيران على بيتنا لمشاهدة التلفزيون , ويتفرقون بعد نشرة الاخبار التي كانت تقدم في التاسعة مساء , وطبعا لا أنسى منظر النساء , وهن يحملن ( بنابرهن ) , والرجال ( مصاليهم ) , فالاسرة عندنا لا تسع الجميع .
أما يوم الجمعة فيمتلي بيتنا صباحا , كأنه روضة أطفال , ولا تكاد تسمع شيئا من الضجيج , لمشاهدة جنة الأطفال .
كان لكل شئ طعم ومذاق
مخارجة :
والله قربت أبكي
............

يالبشير دفع الله التلفزيون كان بى صندوق الخشب وكان عنده بابين بالجمبات لمن تقفل التلفزيون تجرهم وتقفلو زى الدولاب
وبرضو ماكبيرة صغيرة وجاهلة