شكوى ضد الشاعرة روضة الحاج

[زكريا عبد المنعم]

الاخو الاعزاء
تحياتى لكم جميعاً
اشارت الساعة الى اقتراب موعد الحلقة الاخيرة من برنامج امير الشعراء والذى ظللت اتابعه منذ بدايته قبل عدة اسابيع ومعى بعض( العزابةالكحيانين) مجبورين بعد ان مارست ديكتاتوريتى وهيمنتى وسيطرت على الريموت كلو عشان خاطر روضة
المهم الجميع تهيأ لحضور تلك الليلة الحافلة بالمفاجاءات وفى هذه الاثناء كانت دموعى تتقاطر وانا لاننى كنت( بقطع بصل) ههههههههه
طبعاً العزابة موعودين بى حلة كااااااااااااااااااربة الاسبوع ده على الطلاق لحمة ضان
اها يقطع حبل التفكير وقطيع البصل والدموع واحد من الجماعة يكورك : (عوك المسابقة بدت )
وجرى اخوك على المسابقة اها اندمت اندماجة جد وقاشر بالجماعة : وعامل فيها بفهم شعر وهالك ياكضب ....................
المهم تابعنا روضة لغااااااااااااية ما استلمت الجوائز حقتها ونبارك لها طبعاُ واحساسنا فيه شى من الخليط بين الفرح والاحباط وحيث انه ومن غير ذلك وباعتار على انه ومن الممكن وغيرها من الفلسفات الاتعلمناها من لجنة التحكيم وبينما نحن كذلك اذا بى اصيح : عووووووووووووووووووووووووك الحلة حرقت

وجرى على المطبخ لكن زى ما قال الفنان وردى بعد ايه ...................
اها انا ارفع لكم الشكوى دى رايكم شنو ؟؟؟؟

مع حبى لكم

[البشير دفع الله]

التحية والتقدير اخوي زكريا عبدالمنعم
في البدء نهنئي أنفسنا وروضة الحاج بالدرجة التي وصلت اليها , ويكفيها أنها أميرة الشاعرات العربيات , فلا شاعرة عربية وصلت لما وصلت اليه أ. روضة الحاج , وعلى الرغم من مقاييس لجنة التحكيم , والتصويت , ومحاربتها من العرب عموما , باعتبارها أتت من أفريقيا السمراء .
وكفارة للحلة الاتحرقت , وتعيش وتحرق غيرها ان شاء الله , وحلة تفوت ولا حد يموت
من حقك تقديم شكوى بلا شك , وأنا معاك , وعندي واحد صاحبي محامي كارب , ممكن يساعدك في الموضوع ده .

[زكريا عبد المنعم]

الشكر اجزله لك اخى العزيز البشير
يشهد الله كم اسعدنى مرورك الكريم
حقيقة روضة التى اذاقتنا دموع الفرحة واثلجت صدورنا اظهرت لنا كيف يحارب السمر الرائعون وهم يرفعون علم السودان عالياً
كنا نتمنى ان تتوج الاميرة وتسكت الالسن لكن ابت فلول العرب الا ان تقصيها قدر ما استطاعت
عموما الف مبروووك للرائعة روضة الحاج وللسودان ممثل في شخصها ومزيداً من الملاح اقصد النجاح
مع حبى

[محمد عبيد ادريس]

الاخ زكريا عبد المنعم .... تحياتى ..

يا خوى الجاتك فى حلتك سامحتك ..... الا يشفع لروضه الحاج ما وصلت اليه واوصلت صوت السودان قويا ان تسامحها على الحله التى افنيت فيها وقتك وجهدك ومال العذابه ..
الا يشفع لها انها المرأه الوحيده التى وصلت للنهائيات ...
الا يشفع لها احرازها المركز الرابع رغم كل شئ ...

اذا لم يشفع لها كل ذلك ... اعمل تبرعات عشان تعوض الحله .. وحا (نصوت ) ليك الحله ...

مودتى ....

[زكريا عبد المنعم]

ود العبيد .............
وينك يا رائع ......... والله مشتاقين
والله العزاء فى نجاحها
والحلة تطير رغم الدميعات السكبناها فى قطيع البصل:p
المهم مبروك ليها لكن برضو ما بعفيكم
والا تسوا لى تعويض
اها ابدوا التبرعات
مع حبى

[ابو عبد الحفيظ]

اخي العزيز زكريا عبد المنعم لك التحية
اولاً الجاتك في حلتك سامحتك وياما اتحرقت حلل يومها
والتهنئة لروضة الحاج الجائزة المالية وان كان نظام التأهل لامير الشعراء كان غير عادل وهو التصويت ؟ ولو كان عبر لجان تحكيم لتغيرت الموازين والسودان غني بامراء الشعر العربي من قبل فاز المرحوم فراج الطيب السراج بوسام دجلة والفرات في مسابقة علي مستوي العالم العربي وبعده فاز المرحوم البروفسير عبد الله الطيب بجائزة الملك فيصل وايضاً علي مستوي الوطن العربي
يعني نحن فزنا من قبل بمراكز ارفع وبعد منافسات شرسة نقدر لروضة الحاج مجهودها ونتمني لها الفايدة من تجربتها لتجويد ادائها للافضل ويطرح البركة لها في المائتان الف درهم
ويعوضك يازكريا بطقم عشاء فاخر وبملية تلاجة ،،،،، اها قصرت معاك ؟؟؟؟

[زكريا عبد المنعم]

اخوى ابو عبد الحفيظ
تحية طيبة
والله ما قصرت تب ربى يديك الصحة والعافية
ومرورك وكلامك السمح ده براهو بالدنيا
كتر الف خيرك
مودتى

[ابو عبد الحفيظ]

اخوى ابو عبد الحفيظ
تحية طيبة
والله ما قصرت تب ربى يديك الصحة والعافية
ومرورك وكلامك السمح ده براهو بالدنيا
كتر الف خيرك
مودتى

يديك الف عافية الرائع زكريا تستاهل كل خير
ولابد لنا من المرور علي حروفك التي هي نجومٌ تزين المنتديات
اتمني لك موفور الصحة والعافية

[ميـــدو]

الجاتك في حلتك سامحتك

والله الحلة ما كانت تكون مشكلة لو فازت روضة الحاج بالمركز الاول لكن (الله يجازي اللي كان السبب)

ع العموم ما تزعل مني ليك كيس بصل كبييييييييييييييييير


لك ودي

[خالد حسن بخيت]

ياسيدى العزيز .. تحياتى واحتراماتى لشخصكم الكريم ولموضوعكم العظيم..

ولقد عزفت على أكثر الأوتار إيلاماً فى حياة الشعوب السمراء وهو هضم حقوقها والتآمر عليها فى جميع المحافل لإخراجها من جو الشهرة والظهور والمنافسات وإثبات الذات وليست المؤامرة دائرة على روضة الحاج وحدها بل لنتذكر جميعاً الأحداث التى سبقت قرعة إختيار الدولة المنظمة لكأس العالم 2006م..وكيف تم التلاعب ضد جنوب أفريقيا لمنح شرف تنظيمها لألمانيا ثم الآن أيضاً يحاولون سحب البساط مرة أخرى من تحت أقدام جنوب أفريقيا ولكن لا أدرى لصالح من؟؟

لنا الله ياإخوتى ظهرت أشراط الساعة وما زالت المؤامرات ضد الشعوب السمراء تحاك حتى من أقرب الجيران ولا حول ولا قوة إلا بالله!!!!!!!!!!!!

وأبعث إلى أختى الفاضلة الأستاذة روضة الحاج بهذه الرسالة فأقول:

أختى العزيزة بل أخت كل السودانيين والشعوب السمراء الأفريقية الأصيلة..
ستظلين أنت أنت ..روضة الحاج التى حيرت الصغير قبل الكبير فى بلاغتها وعذب كلامها وحلاوة إلقاءها لكلمات أقل مايقال عنها أنها كانت كالدر المنثور الذى أضاء تلك الليالى الشعرية وأثار حفيظة جميع الشعراء والمستمعين ولجنة المجاملات(الحكام) والتى شعرت بأنها لجنة تلقى على الناس كلمات جوفاء مقروءة أو منقولة بكل تمثيل لإيهام الناس بأنها لجنة مثقفة وعلى دراية بالشعر والأدب .. فالعتبى لك حتى ترضى ياروضة..
وخيرها فى غيرها.... ويكفيك فخراً أنك كنت تمثلين السودان الذى خرج من المغارات المظلمة لينشر نور الشعر والعلم والأدب وفنون الكرة وليبدأ صحوة فى جميع المجالات ندعو الله لوطننا العزة والإزدهار والرخاء والتقدم دوماً فى جميع المجالات وإنك ياروضة وسام على صدر وطننا السودان وتاج على رؤوس جميع فتيات ونساء السودان يتفاخرن بك فى جميع المحافل ..... فالسودان كان ولازال البلد الأكثر ثقافة وقراءة بشهادة الجميع ...وعشت ياوطن تنبت فيه شتلات الطيبة والمحبة المروية بنهر الإيمان والتقوى العذب..

مع تحيات أخوكم أبو عبد الله.

[شهد الملائكة]

حله شنو البتتحسر عليها دي يا ابو الزيك انا لو منك ما اتعشاء ذاتي

عارف المغصة الداخله فيني من امير الشعراء لحدي هسع ما مرقت

لو ما عارفاكم بتقولوا علي كذابة كان قلت ليكم لحدي الان ما اكلت حاجة

وعلي قول الرئيس الجاءتك في حلتك ولحمت ضانك سامحتك

[ابوعمار]

اخى العزيز زكريا اولا الف الف مبروك للشاعره روضه الحاج مع انه كان تستاهل المركز الاول بدون منازع وثانيا كفاره شديد للحله الحرقت وما عندك مشكله ليك حله جاهزه بى ملاحه رايك شنو بس ورينا الملاح الكان فى الحله ملاح شنو عشان نعمل ليك زيه هههههههههههههههه مع خالص ودى وتقديرى اخى العزيز.

[زكريا عبد المنعم]

حله شنو البتتحسر عليها دي يا ابو الزيك انا لو منك ما اتعشاء ذاتي

عارف المغصة الداخله فيني من امير الشعراء لحدي هسع ما مرقت

لو ما عارفاكم بتقولوا علي كذابة كان قلت ليكم لحدي الان ما اكلت حاجة

وعلي قول الرئيس الجاءتك في حلتك ولحمت ضانك سامحتك

شهد الملائكة
شكراً لهذا المرور العطر
اذداد البوست القاً بمرورك الكريم
مع حبى

[زكريا عبد المنعم]

اخى العزيز زكريا اولا الف الف مبروك للشاعره روضه الحاج مع انه كان تستاهل المركز الاول بدون منازع وثانيا كفاره شديد للحله الحرقت وما عندك مشكله ليك حله جاهزه بى ملاحه رايك شنو بس ورينا الملاح الكان فى الحله ملاح شنو عشان نعمل ليك زيه هههههههههههههههه مع خالص ودى وتقديرى اخى العزيز.

الغالى ابو عمار
اسعدنى مرورك الغالى والله طلتك دى زاتها احسن من الحله هههههههههههه
ما بتقصر والله يا باشاء لكن اقولك شى: حلتك دى خلها لى بعد رمضان
مع مودتى

[ود القبايل]

حلة بس !!!!! الله يعوضك ...