حلمنتيشيات

[sudani]

قال سقراط

قال سقراط صفات الجماعه اياهم اربعه :_
ان يصبرو صبر ايوب
ويقولون الرووب
ثم يسجلون الشيخ ديوب
قالوا وماذا بعد؟ قال
ان يطلع فريقهم بعد ذلك مغلوب
فيحصبون اللاعبين بالطوب


جني وجن
---------
جني وجن المسؤول المتسيب وعامل فيها حازم
وجني وجن المجاملات الما ليها لازم

جني وجن الونسه في المطاعم
وجني وجن معاكسة الجنس الناعم

جني وجن عبارة شغلك نضيف
وجني وجن البقول ليك نحن كدا وانتو كيف

وجني وجن الشافع البشحد الضيف
وجني وجن الحرامي وعامل فيها شريف


حاجات وحاجات
--------------
حاجات زي الدعايه في نص المسلسل
زوجه بوبوباره تبيع دهبها عشان تشتري هاتف محمول ..
شارع فيهو سته مجانين وعشرين مسطول .
.شافع سعودي يناديك اااي يازول..
.حريم يلبسو مراكيب رجال يلبسو دكتور شول

حاجات تنجنن البقر
----------------
مغترب يقول ليك العود احمد
وزوجه تقول ليك لو ما لقيت شغل اشحد
وجار اي مشكله في بيتو يسوقك تشهد


حاجات تخليك منظراتي
---------------------
لاعب كوره يومو كلو قاعد في ضل النيمه
واداره ما عندها غير الخساسه والنميمه
ومدرب يلعب بالخطط القديمه
ولعيبه يرقصو بعد الهزيمه


دوزنه
-----
الليله المريخ يا اخوانا بي فنو
سمعنا كلام كتير بس قلت استنو
سمعنا بي جبره وتصريح كمان عنو
والله لو (شلعوك) بحلف بقول جنو


مقطع
------
عالم مركب بالغلط
طابونه بتبيع اسكريم
راكوبه في نص الزلط
كديسه لابسه فنيله كط
مستر عتود لابس شبط
الحفله رابه الجكس بط
التيس يبشر في الغنم
خرفان منعنشه واقفه لط

[sudani]

تغزل في السستر
د. أحمد الأمين محمد - المتججه الأممي

أنا العيان
حرارتي الضاربة فوق ميتين
و لا بينفع بخور تيمان
ولا بتنزل بنوفالجين
رقدت سنين
سريري تعب
مركب فوق وريدي درب
تعب و رعب
جحر عيني يدخل فارة أم سيسي
و أجرجر نفسي بالسيسي
أتقول مخنوق
مصنقع فوق
و كل ما يوم يشيلوا الدم
يزيدوا الهم
يقولوا مقاسو طالع كم.. و طالع كم
و أنا الساكت و غالبني
و غالبني
محل ما أشوفها أتكلم
و ما بسلم
و حاكي البلي و الشمبر
و كان قمت
بقع في السلم أتكسر
عشان تظهر
تمر بسراير العنبر
و تاخد نبضي بت سستر

عيونها الزي عيونها براها
تطعن بالإبار مرضاها
و إبرة ترك و في منديل
وما بتتعب
تكركب في البلاط كركب
وقلبي يدق يسو رب رب
و ناري الليلة تتعلق
دا عنبر كم؟ و شايل كم؟
دكاترتو كم؟
و فت سستر؟؟؟

تجهجه في خلايق الله
و أنا العيان
حرارتي المابية تتدلى
أدوش دوشة
أهضرب هضربة زولا
رقد في برشو خت رويسو فوق بنبر
و لما الناس تقول هستر
وتتغالط.. أظن هستر
أظن دفتر.. أظن بامية.. أظن كستر
أدق الطارة وأتحكر
أدوبي أشكر السستر
أوصف في بنات آوى
كضب كان قالوا بتداوى
و فاضل في المداواة الكي
و ما أظن زاتو ينفع في
أدوخ كلما العيون ترمش
و لما السلسلة تكشكش
أزوغ أتضارى في الكورودور
واخدر لابسة بقت نور
و خاتة الكاب على جنبة
و راشة الريحة فايحة زهور
تموت كرعي أقع و أزحف
وراك طرطور
عشان أرتاح
عليك الله و عليك الله
تفجخي راسي بى ساطور

[sudani]

الإستيكة
محمد أحمد إسماعيل
بتصرف
قال ليك محمد كان في المكتبة.. قعدت جنبو بت حلوة.. قالت ليت ليهو "تسمح؟" و
شالت منو الإستيكة قبل ما يرد.. و ختتها فوق منديلها و جاء الهواء كفى المنديل
على الإستيكة.. فقامت شالتها جوة المنديل جوة شنطتها و مشت الكافتيريا
وجات راجعة.. فقال ليها

قال تسمح؟
و كيف يا الحلوة ما بسمح؟
أصابعي العشرة تكتب ليك
و قلبي أبقيه إستيكة
عشان بس للغلط يمسح
يذوب بين أصبعين حلوين
يتوه وسط السطور يسرح
و لمن تنتهي الكلمات
يخش الشنطة في منديل
و نمشي القهوة نتفسح
-------
و صار عاشق يطيع سحرك
يجيب الفانتا شان أمرك
تختي الشنطة في حكرك
وقلبي الدايش وسط منديلل
يسكلب ساي يقول يا ليل
و جوة الشنطة يتمرجح
و ترجعي تاني يا الحلوة
و أكون راجيك هناك مصلوب
أشوف الناس طشاش في طشاش
و أقرأ سطوري بالمقلوب
-------
تقعدي
و أعاين ليك.. تغمضي إنتي
تعايني لي.. أغمض أنا
و أعاين ليك.. تغمضي إنتي
تعايني لي.. أغمض أنا
نعيد الكرة من أول
و أعاين ليك.. تغمضي إنتي
تعايني لي.. أغمض أنا
و أعاين ليك.. تفري البسمة
تضوي سنة
-------
أحك راسي
و أبلع ريق
و أتنحنح
و أجر الكرسي لي قدام
و أرجعو تاااني و أتزحزح
و أقول للسمحة لو تسمح
ممكن كلمة في زاوية؟
تقول بسمح

-------
تقوم السمحة تتلمم
و تتبسم
و أنا أتراجف.. و أتخمخم
و أقوم أفرح
و أدق الجيك
و أطق روري
و أرمي الكرسي.. أوبس سوري
و أقع في الجنبي.. أوبس سوري
و أدقش الماشي.. أوبس سوري
و جنب السلم.. أوبس سوري

-------
هناك في الزاوية نتقعد
و أستغفر.. و أتشهد
و أشيل أنفاسي.. و أتنهد
و أقول ليكي
والله
و غايتو الزول
و الحاصل
و في الواقع
و ما عارف
هه ما قادر أقول ليكي

-------
تقول لي
هي يا دا
و فيها شنو
و معانا منو
و يخسي عليك
و قول يعني
هه ما تخجل.. و تتعقد

-------
أنا أتعقد؟؟؟
أجر الكرسي
أزيد الخمسة تدليكة
و أقول ليها
وبي صوتا ندي و رايع
يفيض رقة و موسيقى
من فضلك
و أترجاك
ترجعي لي الإستيكة

[sudani]

عايز اكون منك قريب أى
حاجة قريبة منك
أبقى أختك أبقى أمك
أبقى ليك فستان يضمك
أببقى مقعد فيه تقعدى
ةقلبى مسند ليك جنبك
واحدة من أنغام جميلة تدندنيها
أو مجلة بتقرآ فيها
أو حفيرة صغيرة
لما تكنسى تدفينها
أدفنينى
ما مامهم لو تدفنينى
بس مهم شوفة عيونك وابقى حاجة قريبة منك
أبقى مصحف وتبقى تالى
تبقى لوءلو وأبقى غواصة
تفتش فى اللاالى
وابقى حب اللب تسالى وتكسرينى
مامهم لو تكسرينى بس
مهم المس سنونك وابقى حاجة قريبة منك
تبقى كعبة وابقى طايبقى جنة ولجمالك ابقى شاف
تبقى مقلة وابقى سيلا دمعو جارف
وتمسحينى ما مهم لو تمسحينى
بس مهم شوفت عيونك وابقى حاجة قريبة منك
ابقى شكلة وتبقى حجاز
ابقى لمبة وتبقى لى جاز
تبقى فينى وتحرقينى

[بوح]

ههههههههههههههه


سودانى يارائع .ز


المشاركه جمييييييييييييييله


لحظه
كان تعقد من زمان عشان نشوف الروائع دى :wink::wink:




ودام الود

[sudani]

ههههههههههههههه


سودانى يارائع .ز


المشاركه جمييييييييييييييله


لحظه
كان تعقد من زمان عشان نشوف الروائع دى :wink::wink:




ودام الود

تسلمى يا ستهن وروحك الجميلة

[الكردفاني]

هاهاهاها ولا خطير ياعريس، حلمنتيشيات في الصميم.
إحترامي

[مصطفى سنجه]

مشاركة رائعه وجميلة جدا جدا

[زيكس]

ههههههههههههههههههههههههههههههههههه

يازول انت جبت الكلام ده من وين ههههههههههههههههههههههههههههههههه



مشكوووور ويسلمووووووووو

[الكردفاني]

زكس ياغالي وين أنت ماظاهر؟ إشتيافااااااات والله.

[مصطفى سنجه]

ههههههههههههههههههههههههها

دهـ شنو ياسودانى :

[ابو التيمان]

السلام عليكم ورحمة الله وبركاته
اول مشاركة لى بنقل ليكم قصيدة عبدو
كتبت هذه القصيدة في طالب في جامعة الخرطوم اسمو "عبدو" وكان بحب واحدة لدرجة الجنون وكان خجولاً فلمّا حكى لزميله في الداخلية عن قصة هذه البنت نصحه زميله بأن يفاتحها في الأمر ، فرد عبدو :- "حفضل أكهربها ليك لو جا ملاك يخطبها ح ترفض وأحسن أكون تقيل أنا زول جميل وقيافة " ... وفضل صاحبنا "عبدو" يكهرب لحدي ما بطاريتو نزلت وفي النهاية جا مغترب وخطب البت .. وصار عبدو يكيل و كان هناك مصطلح في جامعة الخرطوم متعارف عليه "إذا أحب طالب زميلته وتزوّجت من غيرو" شاكوش بمعنى آخر .. بقولوا "أدتو شريط"..


في الليلة ديك القصة ذاتها بقت عليك
يا عبدو وأدوك الشريط
يوم قولنا ليك أنضم معاها وكلّما
أبيت تسمع كلامنا وبقيت لميض
وقلته أحسن أكون تقيل أنا ما جميل
وبقيت تقيل لامن سقوك موية الغسيل
وجيت تنطط زي زمان وتباري بقعور الشجر
كايس كراسي الخيزران ..
وقعدته يا زينة الرجال.. كهربجي قال
رفعوا الستار والبت تجي ومرات تقيف
ومعاها يا زول ولداً حريف
والوقفة كانت وقفة ولف
صاحبنا بالاحساس عرف
سألته والناس كلّموك
ووقعته في شارع الزلط
تبكي وتجعّر والعيون اتورّمت
ويد القميص ضهر القميص كم القميص
حتى الفنيلة اتشرّطت
يا عبدو عيب
قوم يلا صلي على الحبيب
الواطه صبحت دايرين ننوم
يا أخوانّا لأ أنا عايز أموت أقع البحر
يا عبدو عيب
الدنيا حر .. والموية بتسخّن عليك
ثلاثة ساعات زولنا يسب ويكيل
ودموعو سايلات بالكفوف
وشرايطو تلمع في الكتوف
بقى فيلسوف
في علاقة بين يوم السبت وعين الحسود؟!
ومقارنات بين الجهل والجمال!!
وسوء الإختيار
قال شينة قال ...!
قال شينة قولنا كلام صحيح
وخطيبها زاتو ولد قبيح
بس ياخي قوم الواطة صبحت دايرين ننوم
قام تاني جاب سيرة البحر
وقام تاني جاب سيرة البحر

[ابو التيمان]

معليش يا ناس كررتها ليكم ما شفتها فى البوست التانى

ارجو المعذرة

[ابو نون]

الشريط حلو يس اوعي يكون ادوك ليهو

[ابو التيمان]

الشريط حلو يس اوعي يكون ادوك ليهو



يا حليل زمن الشرطان و النجوم .....

[بوح]

الأخ أبوالتيمان

تحية ود

أضأت شرفات المكان بمشاركتك ووجودك بيننا ..



دعنا نتنسم عبير الجمال هنا وكن بالجوار



ودام الود

[القلب الكبير]

مبااااااااااااااااااااااااااالغة

[بوح]

القلب الكبير تحية من القلب ..

لك الود وأنت تمارس الاقامة هنا ..

كن كما انت بكل الروعه




ودام الود

[الق المعانى]

مشكور سوداني يارائع , وايضا ابو التيمان