همهمه-الفرح فارق دروبنا

همهمه

الشاعر: عبد الحفيظ محمد الحسن
(ربيع ود مبلول)

نصحى من النوم نهمهم زي ملايين الغلابه
توعد أحلامنا وتخلف نمسح العين بي عذابه
وتمشى أيامنا وتعدي سكة الهم والرتابه
وتاني بنلملم دموعنا النشقّت قلب السحابه
***
الفرح فارق دروبنا ومد خطوات الكآبه
وإتواترت الآم عُمرنا و بقينا نتوسد عذابه
وياما إتفاقم حُزنا وبكىّ أوتار الربابه
وبرضو بنلاحق أملنا وكل سكة ندقوا بابه
***
ياما إتلاشت حروفنا وشلت احساس الكتابه
نصحى من النوم حلمنا يخلو من لمحة دُعابه
كم مسح في وجوهنا بمسة وفيها أتمدد صلابه
ما الأمل نجامتو غابن قبل ما نكمّل حسابه
***
كل زول كم دارى همو ولملمت أرضو الرحابه
وفي سبيل اللقمة ياما ناس بتعلن للحرابه
تبدأ بالأرحام تخاصم وتقطع أوصال القرابه
وتسعي لي راحة نفوسا الكّملت دم التعابة
***
كل يوم تآكل لحومنا وأصلو ما ضاقت غرابه
ما المهم تكبر.. وتكبر عامله كل دنيتنا غابه
وديمة لي بُنيانا ترفع ونحن مأوانا الخرابه
بتقتل ايديهم حلمنا وأصلو ما خافت حسابه
***
ناس بتسحر ليك مظهر ودارسا قانون الخطابه
تفلق وتداوي وتشرّع وبالحديث عامله الرقابه
أصلو ما حسّت جروحنا ولا قرت في الوش مصابه
وشايله من دمعتنا مكسب وبيهو بتكبّر نصابه
***
يا حليل مشوار سمحنا وفرحه الروح بي شبابه
بيهو كم إنسان بيحلم وقلبو متأمل تشابى
راجي في الليل نجمه تطلع تطرد الهم بالكتابه
كم صبر... ومداهو صبرو شابه إيمان الصحابه
***
كل زول مع نفسو بنضم واصلو ما محتاج صحابه
عارف إنو أحلامو ضلّت وليهو ضنّت بي غيابه
إسال إحساسو وإجاوب وليهو ما تبشفع اجابه
بلقى في الآخر خطاهُ بتمشى في زحمة غلابه

 

(ربيع ودمبلول) ليتك اخى عبدالمنعم تعرفنا به عن قرب فكلماته تشبه اهل بلادى الغلابة ناس محمد احمد والعازة ،،،
ولكن نرجو ان يعود ليل الفرح ويفارقنا ليل الكآبة والسرور يملا دارنا والفرح يملا المدينة والبيوتات الحزينة ,,,
شكرا لهذا الاختيار وفى انتظار ان تعرفنا على كاتب الكلنات المدوزنة بنبض الغُبُش .

 

شاعرنا/ ود مبلول شخص بسيط من منطقتنا
ومبدع بمعنى الكلمه
له أشعار قمة في الروعة سأحاول ومعي
أخي/ الشيخ السنوسي (عضو بالمنتدى)
بالمشاركة ببعض أشعاره
وأكيد هو بعرفك فقد كنت من المبدعين في (لعب كورة القدم)
تعرفك كل المنطقة وتعمل ليك ألف حساب.

شكراً لمرورك أخي/ مامون

 

نصحى من النوم نهمهم زي ملايين الغلابه
توعد أحلامنا وتخلف نمسح العين بي عذابه
وتمشى أيامنا وتعدي سكة الهم والرتابه
وتاني بنلملم دموعنا النشقّت قلب السحابه

 

فعلا والله قصيده توشحت بثوب الحزن وتكدرت بملائات هموم اهل بلدي الغبش والغلابه

التحيه لود مبلول ولك اخي عبد المنعم

 

تسلم اخي عبدالمنعم الطاهر علي النقل والتوضيح ومزيدا من كلمات شاعرنا ود مبلول